6. அஞ்ஞாதகவிஞ்ஞத்திஸிக்கா²பத³ம்

515. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பட்டோ [பட்டோ² (ஸ்யா. க.)] ஹோதி த⁴ம்மிம் கத²ம் காதும். அத² கோ² அஞ்ஞதரோ ஸேட்டி²புத்தோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² தம் ஸேட்டி²புத்தம் ஆயஸ்மா உபனந்தோ³ ஸக்யபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ஸோ ஸேட்டி²புத்தோ ஆயஸ்மதா உபனந்தே³ன ஸக்யபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘வதே³ய்யாத², ப⁴ந்தே, யேன அத்தோ². படிப³லா மயம் அய்யஸ்ஸ தா³தும் யதி³த³ம் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ர’’ந்தி. ‘‘ஸசே மே த்வம், ஆவுஸோ, தா³துகாமோஸி, இதோ ஏகம் ஸாடகம் தே³ஹீ’’தி. ‘‘அம்ஹாகம் கோ², ப⁴ந்தே, குலபுத்தானம் கிஸ்மிம் விய ஏகஸாடகம் க³ந்தும். ஆக³மேஹி, ப⁴ந்தே, யாவ க⁴ரம் க³ச்சா²மி. க⁴ரம் க³தோ இதோ வா ஏகம் ஸாடகம் பஹிணிஸ்ஸாமி இதோ வா ஸுந்த³ரதர’’ந்தி. து³தியம்பி கோ² ஆயஸ்மா உபனந்தோ³ ஸக்யபுத்தோ தம் ஸேட்டி²புத்தம் ஏதத³வோச ‘‘ஸசே மே த்வம் ஆவுஸோ தா³துகாமோஸி இதோ ஏகம் ஸாடகம் தே³ஹீ’’தி. அம்ஹாகம் கோ² ப⁴ந்தே குலபுத்தானம் கிஸ்மிம் விய ஏகஸாடகம் க³ந்தும், ஆக³மேஹி ப⁴ந்தே யாவ க⁴ரம் க³ச்சா²மி, க⁴ரம் க³தோ இதோ வா ஏகம் ஸாடகம் பஹிணிஸ்ஸாமி இதோ வா ஸுந்த³ரதரந்தி. ததியம்பி கோ² ஆயஸ்மா உபனந்தோ³ ஸக்யபுத்தோ தம் ஸேட்டி²புத்தம் ஏதத³வோச ‘‘ஸசே மே த்வம் ஆவுஸோ தா³துகாமோஸி, இதோ ஏகம் ஸாடகம் தே³ஹீ’’தி. அம்ஹாகம் கோ² ப⁴ந்தே குலபுத்தானம் கிஸ்மிம் விய ஏகஸாடகம் க³ந்தும், ஆக³மேஹி ப⁴ந்தே யாவ க⁴ரம் க³ச்சா²மி, க⁴ரம் க³தோ இதோ வா ஏகம் ஸாடகம் பஹிணிஸ்ஸாமி இதோ வா ஸுந்த³ரதரந்தி. ‘‘கிம் பன தயா, ஆவுஸோ, அதா³துகாமேன பவாரிதேன யம் த்வம் பவாரேத்வா ந தே³ஸீ’’தி.

அத² கோ² ஸோ ஸேட்டி²புத்தோ ஆயஸ்மதா உபனந்தே³ன ஸக்யபுத்தேன நிப்பீளியமானோ ஏகம் ஸாடகம் த³த்வா அக³மாஸி. மனுஸ்ஸா தம் ஸேட்டி²புத்தம் ஏதத³வோசும் – ‘‘கிஸ்ஸ த்வம் அய்யோ ஏகஸாடகோ ஆக³ச்ச²ஸீ’’தி? அத² கோ² ஸோ ஸேட்டி²புத்தோ தேஸம் மனுஸ்ஸானம் ஏதமத்த²ம் ஆரோசேஸி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமேஸம் ஸுகரா த⁴ம்மனிமந்தனாபி காதும் [நயிமே ஸுகரா த⁴ம்மனிமந்தனாயபி காதும் (ஸ்யா.)]. கத²ஞ்ஹி நாம ஸேட்டி²புத்தேன த⁴ம்மனிமந்தனாய கயிரமானாய ஸாடகம் க³ஹேஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ஸேட்டி²புத்தம் சீவரம் விஞ்ஞாபேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, ஸேட்டி²புத்தம் சீவரம் விஞ்ஞாபேஸீ’’தி? ‘‘ஸச்சம், ப⁴க³வா’’தி. ‘‘ஞாதகோ தே, உபனந்த³, அஞ்ஞாதகோ’’தி? ‘‘அஞ்ஞாதகோ, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதகஸ்ஸ ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. தத்த² நாம த்வம், மோக⁴புரிஸ, அஞ்ஞாதகம் ஸேட்டி²புத்தம் சீவரம் விஞ்ஞாபேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

516. ‘‘யோ பன பி⁴க்கு² அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேய்ய, நிஸ்ஸக்³கி³யம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

517. தேன கோ² பன ஸமயேன ஸம்ப³ஹுலா பி⁴க்கூ² ஸாகேதா ஸாவத்தி²ம் 2 அத்³தா⁴னமக்³க³ப்படிபன்னா ஹோந்தி. அந்தராமக்³கே³ சோரா நிக்க²மித்வா தே பி⁴க்கூ² அச்சி²ந்தி³ம்ஸு. அத² கோ² தே பி⁴க்கூ² – ‘‘ப⁴க³வதா படிக்கி²த்தம் அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேது’’ந்தி, குக்குச்சாயந்தா ந விஞ்ஞாபேஸும். யதா²னக்³கா³வ ஸாவத்தி²ம் க³ந்த்வா பி⁴க்கூ² அபி⁴வாதே³ந்தி. பி⁴க்கூ² ஏவமாஹம்ஸு – ‘‘ஸுந்த³ரா கோ² இமே, ஆவுஸோ, ஆஜீவகா யே இமே பி⁴க்கூ²ஸு அபி⁴வாதே³ந்தீ’’தி. தே ஏவமாஹம்ஸு – ‘‘ந மயம், ஆவுஸோ, ஆஜீவகா, பி⁴க்கூ² மய’’ந்தி. பி⁴க்கூ² ஆயஸ்மந்தம் உபாலிம் ஏதத³வோசும் – ‘‘இங்கா⁴வுஸோ உபாலி, இமே அனுயுஞ்ஜாஹீ’’தி. அத² கோ² ஆயஸ்மதா உபாலினா அனுயுஞ்ஜியமானா தே பி⁴க்கூ² ஏதமத்த²ம் ஆரோசேஸும். அத² கோ² ஆயஸ்மா உபாலி தே பி⁴க்கூ² அனுயுஞ்ஜித்வா பி⁴க்கூ² ஏதத³வோச – ‘‘பி⁴க்கூ² இமே, ஆவுஸோ. தே³த² நேஸம் சீவரானீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² நக்³கா³ ஆக³ச்சி²ஸ்ஸந்தி! நனு நாம திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி. அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அச்சி²ன்னசீவரஸ்ஸ வா நட்ட²சீவரஸ்ஸ வா அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேதும். யம் ஆவாஸம் பட²மம் உபக³ச்ச²தி, ஸசே தத்த² ஹோதி ஸங்க⁴ஸ்ஸ விஹாரசீவரம் வா உத்தரத்த²ரணம் வா பூ⁴மத்த²ரணம் வா பி⁴ஸிச்ச²வி வா, தம் க³ஹேத்வா பாருபிதும் லபி⁴த்வா ஓத³ஹிஸ்ஸாமீ’’தி. நோ சே ஹோதி ஸங்க⁴ஸ்ஸ விஹாரசீவரம் வா உத்தரத்த²ரணம் வா பு⁴மத்த²ரணம் வா பி⁴ஸிச்ச²வி வா திணேன வா பண்ணேன வா படிச்சா²தே³த்வா ஆக³ந்தப்³ப³ம்; ந த்வேவ நக்³கே³ன ஆக³ந்தப்³ப³ம். யோ ஆக³ச்சே²ய்ய, ஆபத்தி து³க்கடஸ்ஸ. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

518. ‘‘யோ பன பி⁴க்கு² அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேய்ய, அஞ்ஞத்ர ஸமயா, நிஸ்ஸக்³கி³யம் பாசித்தியம். தத்தா²யம் ஸமயோ – அச்சி²ன்னசீவரோ வா ஹோதி பி⁴க்கு² நட்ட²சீவரோ வா. அயம் தத்த² ஸமயோ’’தி.

519. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதானீ நாம யா காசி அகா³ரம் அஜ்ஜா²வஸதி.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

அஞ்ஞத்ர ஸமயாதி ட²பேத்வா ஸமயம்.

அச்சி²ன்னசீவரோ நாம பி⁴க்கு²ஸ்ஸ சீவரம் அச்சி²ன்னம் ஹோதி ராஜூஹி வா சோரேஹி வா து⁴த்தேஹி வா, யேஹி கேஹிசி வா அச்சி²ன்னம் ஹோதி.

நட்ட²சீவரோ நாம பி⁴க்கு²ஸ்ஸ சீவரம் அக்³கி³னா வா த³ட்³ட⁴ம் ஹோதி, உத³கேன வா வுள்ஹம் ஹோதி, உந்தூ³ரேஹி வா உபசிகாஹி வா கா²யிதம் ஹோதி, பரிபோ⁴க³ஜிண்ணம் வா ஹோதி.

அஞ்ஞத்ர ஸமயா விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் அஞ்ஞாதகம் க³ஹபதிகம், அஞ்ஞத்ர ஸமயா விஞ்ஞாபிதம், நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

520. அஞ்ஞாதகே அஞ்ஞாதகஸஞ்ஞீ, அஞ்ஞத்ர ஸமயா, சீவரம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞாதகே வேமதிகோ, அஞ்ஞத்ர ஸமயா, சீவரம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞாதகே ஞாதகஸஞ்ஞீ, அஞ்ஞத்ர ஸமயா, சீவரம் விஞ்ஞாபேதி, நிஸ்ஸக்³கி³யம் பாசித்தியம்.

ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.

521. அனாபத்தி ஸமயே, ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.

அஞ்ஞாதகவிஞ்ஞத்திஸிக்கா²பத³ம் நிட்டி²தம் ச²ட்ட²ம்.