5. சீவரபடிக்³க³ஹணஸிக்கா²பத³ம்

508. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன உப்பலவண்ணா பி⁴க்கு²னீ ஸாவத்தி²யம் விஹரதி. அத² கோ² உப்பலவண்ணா பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதப்படிக்கந்தா யேன அந்த⁴வனம் தேனுபஸங்கமி தி³வாவிஹாராய. அந்த⁴வனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. தேன கோ² பன ஸமயேன சோரா கதகம்மா கா³விம் வதி⁴த்வா மம்ஸம் க³ஹேத்வா அந்த⁴வனம் பவிஸிம்ஸு. அத்³த³ஸா கோ² சோரகா³மணிகோ உப்பலவண்ணம் பி⁴க்கு²னிம் அஞ்ஞதரஸ்மிம் ருக்க²மூலே தி³வாவிஹாரம் நிஸின்னம். தி³ஸ்வானஸ்ஸ ஏதத³ஹோஸி – ‘‘ஸசே மே புத்தபா⁴துகா பஸ்ஸிஸ்ஸந்தி விஹேடி²ஸ்ஸந்தி இமம் பி⁴க்கு²னி’’ந்தி அஞ்ஞேன மக்³கே³ன அக³மாஸி. அத² கோ² ஸோ சோரகா³மணிகோ மம்ஸே பக்கே வரமம்ஸானி க³ஹேத்வா பண்ணபுடம் [பண்ணேன புடம் (ஸ்யா.)] ப³ந்தி⁴த்வா உப்பலவண்ணாய பி⁴க்கு²னியா அவிதூ³ரே ருக்கே² ஆலக்³கே³த்வா – ‘‘யோ பஸ்ஸதி ஸமணோ வா ப்³ராஹ்மணோ வா தி³ன்னம்யேவ ஹரதூ’’தி, வத்வா பக்காமி. அஸ்ஸோஸி கோ² உப்பலவண்ணா பி⁴க்கு²னீ ஸமாதி⁴ம்ஹா வுட்ட²ஹித்வா தஸ்ஸ சோரகா³மணிகஸ்ஸ இமம் வாசம் பா⁴ஸமானஸ்ஸ. அத² கோ² உப்பலவண்ணா பி⁴க்கு²னீ தம் மம்ஸம் க³ஹேத்வா உபஸ்ஸயம் அக³மாஸி. அத² கோ² உப்பலவண்ணா பி⁴க்கு²னீ தஸ்ஸா ரத்தியா அச்சயேன தம் மம்ஸம் ஸம்பாதே³த்வா உத்தராஸங்கே³ன ப⁴ண்டி³கம் ப³ந்தி⁴த்வா வேஹாஸம் அப்³பு⁴க்³க³ந்த்வா வேளுவனே பச்சுட்டா²ஸி [பச்சுபட்டா²ஸி (?)].

தேன கோ² பன ஸமயேன ப⁴க³வா கா³மம் பிண்டா³ய பவிட்டோ² ஹோதி. ஆயஸ்மா உதா³யீ ஓஹிய்யகோ ஹோதி விஹாரபாலோ. அத² கோ² உப்பலவண்ணா பி⁴க்கு²னீ யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தம் உதா³யிம் ஏதத³வோச – ‘‘கஹம், ப⁴ந்தே, ப⁴க³வா’’தி? ‘‘பவிட்டோ², ப⁴கி³னி, ப⁴க³வா கா³மம் பிண்டா³யா’’தி. ‘‘இமம், ப⁴ந்தே, மம்ஸம் ப⁴க³வதோ தே³ஹீ’’தி. ‘‘ஸந்தப்பிதோ தயா, ப⁴கி³னி, ப⁴க³வா மம்ஸேன. ஸசே மே த்வம் அந்தரவாஸகம் த³தே³ய்யாஸி, ஏவம் அஹம்பி ஸந்தப்பிதோ ப⁴வேய்யம் அந்தரவாஸகேனா’’தி. ‘‘மயம் கோ², ப⁴ந்தே, மாதுகா³மா நாம கிச்ச²லாபா⁴. இத³ஞ்ச மே அந்திமம் பஞ்சமம் சீவரம். நாஹம் த³ஸ்ஸாமீ’’தி. ‘‘ஸேய்யதா²பி, ப⁴கி³னி, புரிஸோ ஹத்தி²ம் த³த்வா கச்சே² ஸஜ்ஜேய்ய [விஸ்ஸஜ்ஜேய்ய (ஸ்யா.)] ஏவமேவ கோ² த்வம் ப⁴கி³னி ப⁴க³வதோ மம்ஸம் த³த்வா மயி அந்தரவாஸகே ஸஜ்ஜஸீ’’தி [அந்தரவாஸகம் ந ஸஜ்ஜஸீதி (க.), மய்ஹம் அந்தரவாஸகம் விஸ்ஸஜ்ஜேஹீதி (ஸ்யா.)]. அத² கோ² உப்பலவண்ணா பி⁴க்கு²னீ ஆயஸ்மதா உதா³யினா நிப்பீளியமானா அந்தரவாஸகம் த³த்வா உபஸ்ஸயம் அக³மாஸி. பி⁴க்கு²னியோ உப்பலவண்ணாய பி⁴க்கு²னியா பத்தசீவரம் படிக்³க³ண்ஹந்தியோ உப்பலவண்ணம் பி⁴க்கு²னிம் ஏதத³வோசும் – ‘‘கஹம் தே, அய்யே, அந்தரவாஸகோ’’தி? உப்பலவண்ணா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. பி⁴க்கு²னியோ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யோ உதா³யீ பி⁴க்கு²னியா சீவரம் படிக்³க³ஹேஸ்ஸதி கிச்ச²லாபோ⁴ மாதுகா³மோ’’தி. அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ பி⁴க்கு²னியா சீவரம் படிக்³க³ஹேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உதா³யி, பி⁴க்கு²னியா சீவரம் படிக்³க³ஹேஸீ’’தி? ‘‘ஸச்சம், ப⁴க³வா’’தி. ‘‘ஞாதிகா தே, உதா³யி, அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. தத்த² நாம த்வம், மோக⁴புரிஸ, அஞ்ஞாதிகாய பி⁴க்கு²னியா ஹத்த²தோ சீவரம் படிக்³க³ஹேஸ்ஸஸி! நேதம் மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

509. ‘‘யோ பன பி⁴க்கு² அஞ்ஞாதிகாய பி⁴க்கு²னியா ஹத்த²தோ சீவரம் படிக்³க³ண்ஹேய்ய, நிஸ்ஸக்³கி³யம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

510. தேன கோ² பன ஸமயேன பி⁴க்கூ² குக்குச்சாயந்தா பி⁴க்கு²னீனம் பாரிவத்தகசீவரம் ந படிக்³க³ண்ஹந்தி. பி⁴க்கு²னியோ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா அம்ஹாகம் பாரிவத்தகசீவரம் ந படிக்³க³ஹேஸ்ஸந்தீ’’தி! அஸ்ஸோஸும் கோ² பி⁴க்கூ² தாஸம் பி⁴க்கு²னீனம் உஜ்ஜா²யந்தீனம் கி²ய்யந்தீனம் விபாசேந்தீனம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பஞ்சன்னம் பாரிவத்தகம் படிக்³க³ஹேதும் – பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா. அனுஜானாமி, பி⁴க்க²வே, இமேஸம் பஞ்சன்னம் பாரிவத்தகம் படிக்³க³ஹேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத².

511. ‘‘யோ பன பி⁴க்கு² அஞ்ஞாதிகாய பி⁴க்கு²னியா ஹத்த²தோ சீவரம் படிக்³க³ண்ஹேய்ய, அஞ்ஞத்ர பாரிவத்தகா, நிஸ்ஸக்³கி³யம் பாசித்திய’’ந்தி.

512. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

பி⁴க்கு²னீ நாம உப⁴தோஸங்கே⁴ உபஸம்பன்னா.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

அஞ்ஞத்ர பாரிவத்தகாதி ட²பேத்வா பாரிவத்தகம்.

படிக்³க³ண்ஹாதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் அஞ்ஞாதிகாய பி⁴க்கு²னியா ஹத்த²தோ படிக்³க³ஹிதம், அஞ்ஞத்ர பாரிவத்தகா, நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

513. அஞ்ஞாதிகாய அஞ்ஞாதிகஸஞ்ஞீ சீவரம் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யம் பாசித்தியம். அஞ்ஞாதிகாய வேமதிகோ சீவரம் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யம் பாசித்தியம். அஞ்ஞாதிகாய ஞாதிகஸஞ்ஞீ சீவரம் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யம் பாசித்தியம்.

ஏகதோஉபஸம்பன்னாய ஹத்த²தோ சீவரம் படிக்³க³ண்ஹாதி, அஞ்ஞத்ர பாரிவத்தகா, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.

514. அனாபத்தி ஞாதிகாய, பாரிவத்தகம் பரித்தேன வா விபுலம், விபுலேன வா பரித்தம், பி⁴க்கு² விஸ்ஸாஸம் க³ண்ஹாதி, தாவகாலிகம் க³ண்ஹாதி, சீவரம் ட²பேத்வா அஞ்ஞம் பரிக்கா²ரம் க³ண்ஹாதி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

சீவரபடிக்³க³ஹணஸிக்கா²பத³ம் நிட்டி²தம் பஞ்சமம்.