9. ஸாஸங்கஸிக்கா²பத³ம்

652. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கூ² வுத்த²வஸ்ஸா ஆரஞ்ஞகேஸு ஸேனாஸனேஸு விஹரந்தி. கத்திகசோரகா பி⁴க்கூ² – ‘‘லத்³த⁴லாபா⁴’’தி பரிபாதேந்தி. ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஆரஞ்ஞகேஸு ஸேனாஸனேஸு விஹரந்தேன திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பிது’’ந்தி.

தேன கோ² பன ஸமயேன பி⁴க்கூ² – ‘‘ப⁴க³வதா அனுஞ்ஞாதம் ஆரஞ்ஞகேஸு ஸேனாஸனேஸு விஹரந்தேன திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பிது’’ந்தி திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பித்வா அதிரேகசா²ரத்தம் விப்பவஸந்தி. தானி சீவரானி நஸ்ஸந்திபி வினஸ்ஸந்திபி ட³ய்ஹந்திபி உந்தூ³ரேஹிபி க²ஜ்ஜந்தி. பி⁴க்கூ² து³ச்சோளா ஹோந்தி லூக²சீவரா. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, து³ச்சோளா லூக²சீவரா’’தி? அத² கோ² தே பி⁴க்கூ² பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பித்வா அதிரேகசா²ரத்தம் விப்பவஸிஸ்ஸந்தீ’’தி! அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, பி⁴க்கூ² திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பித்வா அதிரேகசா²ரத்தம் விப்பவஸந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பித்வா அதிரேகசா²ரத்தம் விப்பவஸிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

653. ‘‘உபவஸ்ஸம் கோ² பன கத்திகபுண்ணமம் யானி கோ² பன தானி ஆரஞ்ஞகானி ஸேனாஸனானி ஸாஸங்கஸம்மதானி ஸப்படிப⁴யானி ததா²ரூபேஸு பி⁴க்கு² ஸேனாஸனேஸு விஹரந்தோ ஆகங்க²மானோ திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பேய்ய, ஸியா ச தஸ்ஸ பி⁴க்கு²னோ கோசிதே³வ பச்சயோ தேன சீவரேன விப்பவாஸாய. சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³ம். ததோ சே உத்தரி விப்பவஸேய்ய, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்திய’’ந்தி.

654. உபவஸ்ஸம் கோ² பனாதி வுட்ட²வஸ்ஸானம்.

கத்திகபுண்ணமந்தி கத்திகசாதுமாஸினீ வுச்சதி.

[பாசி. 573] யானி கோ² பன தானி ஆரஞ்ஞகானி ஸேனாஸனானீதி ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²மம்.

[பாசி. 573] ஸாஸங்கம் நாம ஆராமே ஆராமூபசாரே சோரானம் நிவிட்டோ²காஸோ தி³ஸ்ஸதி, பு⁴த்தோகாஸோ தி³ஸ்ஸதி, டி²தோகாஸோ தி³ஸ்ஸதி, நிஸின்னோகாஸோ தி³ஸ்ஸதி, நிபன்னோகாஸோ தி³ஸ்ஸதி.

[பாசி. 573] ஸப்படிப⁴யம் நாம ஆராமே ஆராமூபசாரே சோரேஹி மனுஸ்ஸா ஹதா தி³ஸ்ஸந்தி, விலுத்தா தி³ஸ்ஸந்தி, ஆகோடிதா தி³ஸ்ஸந்தி.

[பாசி. 573] ததா²ரூபேஸு பி⁴க்கு² ஸேனாஸனேஸு விஹரந்தோதி ஏவரூபேஸு பி⁴க்கு² ஸேனாஸனேஸு விஹரந்தோ.

ஆகங்க²மானோதி இச்ச²மானோ.

திண்ணம் சீவரானம் அஞ்ஞதரம் சீவரந்தி ஸங்கா⁴டிம் வா உத்தராஸங்க³ம் வா அந்தரவாஸகம் வா.

அந்தரக⁴ரே நிக்கி²பேய்யாதி ஸமந்தா கோ³சரகா³மே நிக்கி²பேய்ய.

ஸியா ச தஸ்ஸ பி⁴க்கு²னோ கோசிதே³வ பச்சயோ தேன சீவரேன விப்பவாஸாயாதி ஸியா பச்சயோ ஸியா கரணீயம்.

சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³ந்தி சா²ரத்தபரமதா விப்பவஸிதப்³ப³ம்.

அஞ்ஞத்ர பி⁴க்கு²ஸம்முதியாதி ட²பேத்வா பி⁴க்கு²ஸம்முதிம்.

ததோ சே உத்தரி விப்பவஸேய்யாதி ஸத்தமே அருணுக்³க³மனே நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம். ‘‘இத³ம் மே, ப⁴ந்தே, சீவரம் அதிரேகசா²ரத்தம் விப்பவுட்ட²ம், அஞ்ஞத்ர பி⁴க்கு²ஸம்முதியா, நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

655. அதிரேகசா²ரத்தே அதிரேகஸஞ்ஞீ விப்பவஸதி, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். அதிரேகசா²ரத்தே வேமதிகோ விப்பவஸதி, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். அதிரேகசா²ரத்தே ஊனகஸஞ்ஞீ விப்பவஸதி, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். அப்பச்சுத்³த⁴டே பச்சுத்³த⁴டஸஞ்ஞீ…பே… அவிஸ்ஸஜ்ஜிதே விஸ்ஸஜ்ஜிதஸஞ்ஞீ… அனட்டே² நட்ட²ஸஞ்ஞீ… அவினட்டே² வினட்ட²ஸஞ்ஞீ… அத³ட்³டே⁴ த³ட்³ட⁴ஸஞ்ஞீ … அவிலுத்தே விலுத்தஸஞ்ஞீ விப்பவஸதி, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம்.

நிஸ்ஸக்³கி³யம் சீவரம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. ஊனகசா²ரத்தே அதிரேகஸஞ்ஞீ, ஆபத்தி து³க்கடஸ்ஸ. ஊனகசா²ரத்தே வேமதிகோ, ஆபத்தி து³க்கடஸ்ஸ. ஊனகசா²ரத்தே ஊனகஸஞ்ஞீ, அனாபத்தி.

656. அனாபத்தி – சா²ரத்தம் விப்பவஸதி, ஊனகசா²ரத்தம் விப்பவஸதி, சா²ரத்தம் விப்பவஸித்வா புன கா³மஸீமம் ஓக்கமித்வா வஸித்வா பக்கமதி, அந்தோ சா²ரத்தம் பச்சுத்³த⁴ரதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, பி⁴க்கு²ஸம்முதியா, உம்மத்தகஸ்ஸ, ஆதி³கம்மிகஸ்ஸாதி.

ஸாஸங்கஸிக்கா²பத³ம் நிட்டி²தம் நவமம்.