10. பரிணதஸிக்கா²பத³ம்

657. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாவத்தி²யம் அஞ்ஞதரஸ்ஸ பூக³ஸ்ஸ ஸங்க⁴ஸ்ஸ ஸசீவரப⁴த்தம் படியத்தம் ஹோதி – ‘‘போ⁴ஜேத்வா சீவரேன அச்சா²தே³ஸ்ஸாமா’’தி. அத² கோ² ச²ப்³ப³க்³கி³யா பி⁴க்கூ² யேன ஸோ பூகோ³ தேனுபஸங்கமிம்ஸு; உபஸங்கமித்வா தம் பூக³ம் ஏதத³வோசும் – ‘‘தே³தா²வுஸோ, அம்ஹாகம் இமானி சீவரானீ’’தி. ‘‘ந மயம், ப⁴ந்தே, த³ஸ்ஸாம. அம்ஹாகம் ஸங்க⁴ஸ்ஸ அனுவஸ்ஸம் ஸசீவரபி⁴க்கா² பஞ்ஞத்தா’’தி. ‘‘ப³ஹூ, ஆவுஸோ, ஸங்க⁴ஸ்ஸ தா³யகா, ப³ஹூ ஸங்க⁴ஸ்ஸ ப⁴த்தா [ப⁴த்³தா³ (க.)]. மயம் தும்ஹே நிஸ்ஸாய தும்ஹே ஸம்பஸ்ஸந்தா இத⁴ விஹராம. தும்ஹே சே அம்ஹாகம் ந த³ஸ்ஸத², அத² கோ சரஹி அம்ஹாகம் த³ஸ்ஸதி? தே³தா²வுஸோ, அம்ஹாகம் இமானி சீவரானீ’’தி. அத² கோ² ஸோ பூகோ³ ச²ப்³ப³க்³கி³யேஹி பி⁴க்கூ²ஹி நிப்பீளியமானோ யதா²படியத்தம் சீவரம் ச²ப்³ப³க்³கி³யானம் பி⁴க்கூ²னம் த³த்வா ஸங்க⁴ம் ப⁴த்தேன பரிவிஸி. யே தே பி⁴க்கூ² ஜானந்தி ஸங்க⁴ஸ்ஸ ஸசீவரப⁴த்தம் படியத்தம், ந ச ஜானந்தி ச²ப்³ப³க்³கி³யானம் பி⁴க்கூ²னம் தி³ன்னந்தி, தே ஏவமாஹம்ஸு – ‘‘ஓணோஜேதா²வுஸோ, ஸங்க⁴ஸ்ஸ சீவர’’ந்தி. ‘‘நத்தி², ப⁴ந்தே. யதா²படியத்தம் சீவரம் அய்யா ச²ப்³ப³க்³கி³யா அத்தனோ பரிணாமேஸு’’ந்தி. யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஜானம் ஸங்கி⁴கம் லாப⁴ம் பரிணதம் அத்தனோ பரிணாமேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, ஜானம் ஸங்கி⁴கம் லாப⁴ம் பரிணதம் அத்தனோ பரிணாமேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, ஜானம் ஸங்கி⁴கம் லாப⁴ம் பரிணதம் அத்தனோ பரிணாமேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

658. ‘‘யோ பன பி⁴க்கு² ஜானம் ஸங்கி⁴கம் லாப⁴ம் பரிணதம் அத்தனோ பரிணாமேய்ய, நிஸ்ஸக்³கி³யம் பாசித்திய’’ந்தி.

659. யோ பனாதி யோ யாதி³ஸோ…பே… பி⁴க்கூ²தி…பே… அய இமஸ்மிம் அத்தே² அதி⁴ப்பேதோ பி⁴க்கூ²தி.

[பாசி. 491] ஜானாதி நாம ஸாமம் வா ஜானாதி அஞ்ஞே வா தஸ்ஸ ஆரோசேந்தி ஸோ வா ஆரோசேதி.

[பாசி. 491] ஸங்கி⁴கம் நாம ஸங்க⁴ஸ்ஸ தி³ன்னம் ஹோதி பரிச்சத்தம்.

[பாசி. 491] லாபோ⁴ நாம சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா. அந்தமஸோ சுண்ணபிண்டோ³பி, த³ந்தகட்ட²ம்பி, த³ஸிகஸுத்தம்பி.

[பாசி. 491] பரிணதம் நாம த³ஸ்ஸாம கரிஸ்ஸாமாதி வாசா பி⁴ன்னா ஹோதி.

அத்தனோ பரிணாமேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, ஜானம் ஸங்கி⁴கம் லாப⁴ம் பரிணதம் அத்தனோ பரிணாமிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

660. பரிணதே பரிணதஸஞ்ஞீ அத்தனோ பரிணாமேதி, நிஸ்ஸக்³கி³யம் பாசித்தியம்.

பரிணதே வேமதிகோ அத்தனோ பரிணாமேதி, ஆபத்தி து³க்கடஸ்ஸ. பரிணதே அபரிணதஸஞ்ஞீ அத்தனோ பரிணாமேதி, அனாபத்தி. ஸங்க⁴ஸ்ஸ பரிணதம் அஞ்ஞஸங்க⁴ஸ்ஸ வா சேதியஸ்ஸ வா பரிணாமேதி, ஆபத்தி து³க்கடஸ்ஸ. சேதியஸ்ஸ பரிணதம் அஞ்ஞசேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா பரிணாமேதி, ஆபத்தி து³க்கடஸ்ஸ. புக்³க³லஸ்ஸ பரிணதம் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேதி, ஆபத்தி து³க்கடஸ்ஸ. அபரிணதே பரிணதஸஞ்ஞீ, ஆபத்தி து³க்கடஸ்ஸ. அபரிணதே வேமதிகோ, ஆபத்தி து³க்கடஸ்ஸ. அபரிணதே அபரிணதஸஞ்ஞீ, அனாபத்தி.

661. அனாபத்தி கத்த² தே³மாதி புச்சி²யமானோ யத்த² தும்ஹாகம் தே³ய்யத⁴ம்மோ பரிபோ⁴க³ம் வா லபே⁴ய்ய படிஸங்கா²ரம் வா லபே⁴ய்ய சிரட்டி²திகோ வா அஸ்ஸ யத்த² வா பன தும்ஹாகம் சித்தம் பஸீத³தி தத்த² தே³தா²தி ப⁴ணதி, உம்மத்தகஸ்ஸ, ஆதி³கம்மிகஸ்ஸாதி.

பரிணதஸிக்கா²பத³ம் நிட்டி²தம் த³ஸமம்.

பத்தவக்³கோ³ ததியோ.

தஸ்ஸுத்³தா³னம் –

த்³வே ச பத்தானி பே⁴ஸஜ்ஜம், வஸ்ஸிகா தா³னபஞ்சமம்;

ஸாமம் வாயாபனச்சேகோ, ஸாஸங்கம் ஸங்கி⁴கேன சாதி.

662. உத்³தி³ட்டா² கோ², ஆயஸ்மந்தோ, திம்ஸ நிஸ்ஸக்³கி³யா பாசித்தியா த⁴ம்மா. தத்தா²யஸ்மந்தே புச்சா²மி – ‘கச்சித்த² பரிஸுத்³தா⁴’? து³தியம்பி புச்சா²மி – ‘கச்சித்த² பரிஸுத்³தா⁴’? ததியம்பி புச்சா²மி – ‘கச்சித்த² பரிஸுத்³தா⁴’? பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

நிஸ்ஸக்³கி³யகண்ட³ம் நிட்டி²தம்.