8. அச்சேகசீவரஸிக்கா²பத³ம்

646. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ மஹாமத்தோ பவாஸம் க³ச்ச²ந்தோ பி⁴க்கூ²னம் ஸந்திகே தூ³தம் பாஹேஸி – ‘‘ஆக³ச்ச²ந்து ப⁴த³ந்தா வஸ்ஸாவாஸிகம் த³ஸ்ஸாமீ’’தி. பி⁴க்கூ² – ‘வஸ்ஸம்வுட்டா²னம் ப⁴க³வதா வஸ்ஸாவாஸிகம் அனுஞ்ஞாத’ந்தி, குக்குச்சாயந்தா நாக³மம்ஸு. அத² கோ² ஸோ மஹாமத்தோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா மயா தூ³தே பஹிதே நாக³ச்சி²ஸ்ஸந்தி! அஹஞ்ஹி ஸேனாய க³ச்சா²மி. து³ஜ்ஜானம் ஜீவிதம் து³ஜ்ஜானம் மரண’’ந்தி. அஸ்ஸோஸும் கோ² பி⁴க்கூ² தஸ்ஸ மஹாமத்தஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அச்சேகசீவரம் படிக்³க³ஹேத்வா நிக்கி²பிது’’ந்தி.

647. தேன கோ² பன ஸமயேன பி⁴க்கூ² – ‘‘ப⁴க³வதா அனுஞ்ஞாதம் அச்சேகசீவரம் படிக்³க³ஹேத்வா நிக்கி²பிது’’ந்தி, அச்சேகசீவரானி படிக்³க³ஹேத்வா சீவரகாலஸமயம் அதிக்காமேந்தி. தானி சீவரானி சீவரவம்ஸே ப⁴ண்டி³காப³த்³தா⁴னி திட்ட²ந்தி. அத்³த³ஸ கோ² ஆயஸ்மா ஆனந்தோ³ ஸேனாஸனசாரிகம் ஆஹிண்ட³ந்தோ தானி சீவரானி சீவரவம்ஸே ப⁴ண்டி³காப³த்³தா⁴னி. திட்ட²ந்தே தி³ஸ்வா பி⁴க்கூ² ஏதத³வோச – ‘‘கஸ்ஸிமானி, ஆவுஸோ, சீவரானி சீவரவம்ஸே ப⁴ண்டி³காப³த்³தா⁴னி திட்ட²ந்தீ’’தி? ‘‘அம்ஹாகம், ஆவுஸோ, அச்சேகசீவரானீ’’தி. ‘‘கீவசிரம் பனாவுஸோ, இமானி சீவரானி நிக்கி²த்தானீ’’தி? அத² கோ² தே பி⁴க்கூ² ஆயஸ்மதோ ஆனந்த³ஸ்ஸ யதா²னிக்கி²த்தம் ஆரோசேஸும். ஆயஸ்மா ஆனந்தோ³ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கூ² அச்சேகசீவரம் படிக்³க³ஹேத்வா சீவரகாலஸமயம் அதிக்காமேஸ்ஸந்தீ’’தி! அத² கோ² ஆயஸ்மா ஆனந்தோ³ தே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸி…பே… – ‘‘ஸச்சம் கிர, பி⁴க்க²வே, பி⁴க்கூ² அச்சேகசீவரம் படிக்³க³ஹேத்வா சீவரகாலஸமயம் அதிக்காமேந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா அச்சேகசீவரம் படிக்³க³ஹேத்வா சீவரகாலஸமயம் அதிக்காமேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

648. ‘‘த³ஸாஹானாக³தம் கத்திகதேமாஸிகபுண்ணமம் பி⁴க்கு²னோ பனேவ அச்சேகசீவரம் உப்பஜ்ஜேய்ய, அச்சேகம் மஞ்ஞமானேன பி⁴க்கு²னா படிக்³க³ஹேதப்³ப³ம், படிக்³க³ஹேத்வா யாவ சீவரகாலஸமயம் நிக்கி²பிதப்³ப³ம். ததோ சே உத்தரி நிக்கி²பேய்ய, நிஸ்ஸக்³கி³யம் பாசித்திய’’ந்தி.

649. த³ஸாஹானாக³தந்தி த³ஸாஹானாக³தாய பவாரணாய.

கத்திகதேமாஸிகபுண்ணமந்தி பவாரணா கத்திகா வுச்சதி.

அச்சேகசீவரம் நாம ஸேனாய வா க³ந்துகாமோ ஹோதி, பவாஸம் வா க³ந்துகாமோ ஹோதி, கி³லானோ வா ஹோதி, க³ப்³பி⁴னீ வா ஹோதி, அஸ்ஸத்³த⁴ஸ்ஸ வா ஸத்³தா⁴ உப்பன்னா ஹோதி, அப்பஸன்னஸ்ஸ வா பஸாதோ³ உப்பன்னோ ஹோதி, ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா வஸ்ஸாவாஸிகம் த³ஸ்ஸாமீ’’தி, ஏதம் அச்சேகசீவரம் நாம.

அச்சேகம் மஞ்ஞமானேன பி⁴க்கு²னா படிக்³க³ஹேதப்³ப³ம் படிக்³க³ஹேத்வா யாவ சீவரகாலஸமயம் நிக்கி²பிதப்³ப³ந்தி ஸஞ்ஞாணம் கத்வா நிக்கி²பிதப்³ப³ம் – ‘‘இத³ம் அச்சேகசீவர’’ந்தி.

சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்சமாஸா.

ததோ சே உத்தரி நிக்கி²பேய்யாதி அனத்த²தே கதி²னே வஸ்ஸானஸ்ஸ பச்சி²மம் தி³வஸம் அதிக்காமேதி, நிஸ்ஸக்³கி³யம் பாசித்தியம் [நிஸ்ஸக்³கி³யம் ஹோதி (ஸ்யா.)]. அத்த²தே கதி²னே கதி²னுத்³தா⁴ரதி³வஸம் அதிக்காமேதி, நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, அச்சேகசீவரம் சீவரகாலஸமயம் அதிக்காமிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

650. அச்சேகசீவரே அச்சேகசீவரஸஞ்ஞீ சீவரகாலஸமயம் அதிக்காமேதி, நிஸ்ஸக்³கி³யம் பாசித்தியம். அச்சேகசீவரே வேமதிகோ சீவரகாலஸமயம் அதிக்காமேதி, நிஸ்ஸக்³கி³யம் பாசித்தியம். அச்சேகசீவரே அனச்சேகசீவரஸஞ்ஞீ சீவரகாலஸமயம் அதிக்காமேதி, நிஸ்ஸக்³கி³யம் பாசித்தியம். அனதி⁴ட்டி²தே அதி⁴ட்டி²தஸஞ்ஞீ …பே… அவிகப்பிதே விகப்பிதஸஞ்ஞீ… அவிஸ்ஸஜ்ஜிதே விஸ்ஸஜ்ஜிதஸஞ்ஞீ… அனட்டே² நட்ட²ஸஞ்ஞீ… அவினட்டே² வினட்ட²ஸஞ்ஞீ… அத³ட்³டே⁴ த³ட்³ட⁴ஸஞ்ஞீ… அவிலுத்தே விலுத்தஸஞ்ஞீ சீவரகாலஸமயம் அதிக்காமேதி, நிஸ்ஸக்³கி³யம் பாசித்தியம்.

நிஸ்ஸக்³கி³யம் சீவரம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. அனச்சேகசீவரே அச்சேகசீவரஸஞ்ஞீ, ஆபத்தி து³க்கடஸ்ஸ. அனச்சேகசீவரே வேமதிகோ, ஆபத்தி து³க்கடஸ்ஸ. அனச்சேகசீவரே அனச்சேகசீவரஸஞ்ஞீ, அனாபத்தி.

651. அனாபத்தி – அந்தோஸமயே அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, உம்மத்தகஸ்ஸ, ஆதி³கம்மிகஸ்ஸாதி.

அச்சேகசீவரஸிக்கா²பத³ம் நிட்டி²தம் அட்ட²மம்.