7. மஹாபேஸகாரஸிக்கா²பத³ம்

641. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ புரிஸோ பவாஸம் க³ச்ச²ந்தோ பஜாபதிம் ஏதத³வோச – ‘‘ஸுத்தம் தா⁴ரயித்வா அமுகஸ்ஸ தந்தவாயஸ்ஸ தே³ஹி, சீவரம் வாயாபேத்வா நிக்கி²ப, ஆக³தோ அய்யம் உபனந்த³ம் சீவரேன அச்சா²தே³ஸ்ஸாமீ’’தி. அஸ்ஸோஸி கோ² அஞ்ஞதரோ பிண்ட³சாரிகோ பி⁴க்கு² தஸ்ஸ புரிஸஸ்ஸ இமம் வாசம் பா⁴ஸமானஸ்ஸ. அத² கோ² ஸோ பி⁴க்கு² யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘மஹாபுஞ்ஞோஸி த்வம், ஆவுஸோ உபனந்த³, அமுகஸ்மிம் ஓகாஸே அஞ்ஞதரோ புரிஸோ பவாஸம் க³ச்ச²ந்தோ பஜாபதிம் ஏதத³வோச – ‘‘ஸுத்தம் தா⁴ரயித்வா அமுகஸ்ஸ தந்தவாயஸ்ஸ தே³ஹி, சீவரம் வாயாபேத்வா நிக்கி²ப, ஆக³தோ அய்யம் உபனந்த³ம் சீவரேன அச்சா²தே³ஸ்ஸாமீ’’தி. ‘‘அத்தா²வுஸோ, மம் ஸோ உபட்டா²கோ’’தி. ஸோபி கோ² தந்தவாயோ ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²கோ ஹோதி. அத² கோ² ஆயஸ்மா உபனந்தோ³ ஸக்யபுத்தோ யேன ஸோ தந்தவாயோ தேனுபஸங்கமி; உபஸங்கமித்வா தம் தந்தவாயம் ஏதத³வோச – ‘‘இத³ம் கோ², ஆவுஸோ, சீவரம் மம் உத்³தி³ஸ்ஸ விய்யதி; ஆயதஞ்ச கரோஹி வித்த²தஞ்ச. அப்பிதஞ்ச ஸுவீதஞ்ச ஸுப்பவாயிதஞ்ச ஸுவிலேகி²தஞ்ச ஸுவிதச்சி²தஞ்ச கரோஹீ’’தி. ‘‘ஏதே கோ² மே, ப⁴ந்தே, ஸுத்தம் தா⁴ரயித்வா அத³ம்ஸு; இமினா ஸுத்தேன சீவரம் வினாஹீ’’தி. ‘‘ந, ப⁴ந்தே, ஸக்கா ஆயதம் வா வித்த²தம் வா அப்பிதம் வா காதும். ஸக்கா ச கோ², ப⁴ந்தே, ஸுவீதஞ்ச ஸுப்பவாயிதஞ்ச ஸுவிலேகி²தஞ்ச ஸுவிதச்சி²தஞ்ச காது’’ந்தி. ‘‘இங்க⁴ த்வம், ஆவுஸோ, ஆயதஞ்ச கரோஹி வித்த²தஞ்ச அப்பிதஞ்ச. ந தேன ஸுத்தேன படிப³த்³த⁴ம் ப⁴விஸ்ஸதீ’’தி.

அத² கோ² ஸோ தந்தவாயோ யதா²ப⁴தம் ஸுத்தம் தந்தே உபனேத்வா யேன ஸா இத்தீ² தேனுபஸங்கமி; உபஸங்கமித்வா தம் இத்தி²ம் ஏதத³வோச – ‘‘ஸுத்தேன, அய்யே, அத்தோ²’’தி. ‘‘நனு த்வம் அய்யோ [அய்ய (ஸ்யா.)] மயா வுத்தோ – ‘இமினா ஸுத்தேன சீவரம் வினாஹீ’’’தி. ‘‘ஸச்சாஹம், அய்யே, தயா வுத்தோ – ‘இமினா ஸுத்தேன சீவரம் வினாஹீ’தி. அபிச, மம் அய்யோ உபனந்தோ³ ஏவமாஹ – ‘இங்க⁴ த்வம், ஆவுஸோ, ஆயதஞ்ச கரோஹி வித்த²தஞ்ச அப்பிதஞ்ச, ந தேன ஸுத்தேன படிப³த்³த⁴ம் ப⁴விஸ்ஸதீ’’’தி. அத² கோ² ஸா இத்தீ² யத்தகம்யேவ ஸுத்தம் பட²மம் அதா³ஸி தத்தகம் பச்சா² அதா³ஸி. அஸ்ஸோஸி கோ² ஆயஸ்மா உபனந்தோ³ ஸக்யபுத்தோ – ‘‘ஸோ கிர புரிஸோ பவாஸதோ ஆக³தோ’’தி. அத² கோ² ஆயஸ்மா உபனந்தோ³ ஸக்யபுத்தோ யேன தஸ்ஸ புரிஸஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸோ புரிஸோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ புரிஸோ பஜாபதிம் ஏதத³வோச – ‘‘வீதம் தம் சீவர’’ந்தி? ‘‘ஆமாய்ய, வீதம் தம் சீவர’’ந்தி. ‘‘ஆஹர, அய்யம் உபனந்த³ம் சீவரேன அச்சா²தே³ஸ்ஸாமீ’’தி. அத² கோ² ஸா இத்தீ² தம் சீவரம் நீஹரித்வா ஸாமிகஸ்ஸ த³த்வா ஏதமத்த²ம் ஆரோசேஸி. அத² கோ² ஸோ புரிஸோ ஆயஸ்மதோ உபனந்த³ஸ்ஸ ஸக்யபுத்தஸ்ஸ சீவரம் த³த்வா உஜ்ஜா²யதி கி²ய்யதி விபாசேதி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமே ஸுகரா சீவரேன அச்சா²தே³தும். கத²ஞ்ஹி நாம அய்யோ உபனந்தோ³ மயா புப்³பே³ அப்பவாரிதோ தந்தவாயே [க³ஹபதிகஸ்ஸ தந்தவாயே (க.)] உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி.

அஸ்ஸோஸும் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ புப்³பே³ அப்பவாரிதோ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, புப்³பே³ அப்பவாரிதோ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜீ’’தி? ‘‘ஸச்சம், ப⁴க³வா’’தி. ‘‘ஞாதகோ தே, உபனந்த³, அஞ்ஞாதகோ’’தி? ‘‘அஞ்ஞாதகோ, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதகஸ்ஸ ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. தத்த² நாம த்வம், மோக⁴புரிஸ, புப்³பே³ அப்பவாரிதோ அஞ்ஞாதகஸ்ஸ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

642. ‘‘பி⁴க்கு²ம் பனேவ உத்³தி³ஸ்ஸ அஞ்ஞாதகோ க³ஹபதி வா க³ஹபதானீ வா தந்தவாயேஹி சீவரம் வாயாபேய்ய, தத்ர சே ஸோ பி⁴க்கு² புப்³பே³ அப்பவாரிதோ தந்தவாயே உபஸங்கமித்வா சீவரே விகப்பம் ஆபஜ்ஜேய்ய – ‘இத³ம் கோ², ஆவுஸோ, சீவரம் மம் உத்³தி³ஸ்ஸ விய்யதி. ஆயதஞ்ச கரோத² வித்த²தஞ்ச. அப்பிதஞ்ச ஸுவீதஞ்ச ஸுப்பவாயிதஞ்ச ஸுவிலேகி²தஞ்ச ஸுவிதச்சி²தஞ்ச கரோத². அப்பேவ நாம மயம்பி ஆயஸ்மந்தானம் கிஞ்சிமத்தம் அனுபத³ஜ்ஜேய்யாமா’தி. ஏவஞ்ச ஸோ பி⁴க்கு² வத்வா கிஞ்சிமத்தம் அனுபத³ஜ்ஜேய்ய அந்தமஸோ பிண்ட³பாதமத்தம்பி, நிஸ்ஸக்³கி³யம் பாசித்திய’’ந்தி.

643. பி⁴க்கு²ம் பனேவ உத்³தி³ஸ்ஸாதி பி⁴க்கு²ஸ்ஸத்தா²ய பி⁴க்கு²ம் ஆரம்மணம் கரித்வா பி⁴க்கு²ம் அச்சா²தே³துகாமோ.

அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதானீ நாம யா காசி அகா³ரம் அஜ்ஜா²வஸதி.

தந்தவாயேஹீதி பேஸகாரேஹி.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

வாயாபேய்யாதி வினாபேதி.

தத்ர சே ஸோ பி⁴க்கூ²தி யம் பி⁴க்கு²ம் உத்³தி³ஸ்ஸ சீவரம் விய்யதி ஸோ பி⁴க்கு².

புப்³பே³ அப்பவாரிதோதி புப்³பே³ அவுத்தோ ஹோதி – ‘‘கீதி³ஸேன தே, ப⁴ந்தே, சீவரேன அத்தோ², கீதி³ஸம் தே சீவரம் வாயாபேமீ’’தி?

தந்தவாயே உபஸங்கமித்வாதி க⁴ரம் க³ந்த்வா யத்த² கத்த²சி உபஸங்கமித்வா.

சீவரே விகப்பம் ஆபஜ்ஜேய்யாதி – ‘‘இத³ம் கோ², ஆவுஸோ, சீவரம் மம் உத்³தி³ஸ்ஸ விய்யதி, ஆயதஞ்ச கரோத² வித்த²தஞ்ச. அப்பிதஞ்ச ஸுவீதஞ்ச ஸுப்பவாயிதஞ்ச ஸுவிலேகி²தஞ்ச ஸுவிதச்சி²தஞ்ச கரோத². அப்பேவ நாம மயம்பி ஆயஸ்மந்தானம் கிஞ்சிமத்தம் அனுபத³ஜ்ஜேய்யாமா’’தி.

ஏவஞ்ச ஸோ பி⁴க்கு² வத்வா கிஞ்சிமத்தம் அனுபத³ஜ்ஜேய்ய அந்தமஸோ பிண்ட³பாதமத்தம்பீதி. பிண்ட³பாதோ நாம யாகு³பி ப⁴த்தம்பி கா²த³னீயம்பி சுண்ணபிண்டோ³பி த³ந்தகட்ட²ம்பி த³ஸிகஸுத்தம்பி, அந்தமஸோ த⁴ம்மம்பி ப⁴ணதி.

தஸ்ஸ வசனேன ஆயதம் வா வித்த²தம் வா அப்பிதம் வா கரோதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகஸ்ஸ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபன்னம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

644. அஞ்ஞாதகே அஞ்ஞாதகஸஞ்ஞீ புப்³பே³ அப்பவாரிதோ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே வேமதிகோ புப்³பே³ அப்பவாரிதோ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே ஞாதகஸஞ்ஞீ புப்³பே³ அப்பவாரிதோ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம்.

ஞாதகே அஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.

645. அனாபத்தி – ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் வாயாபேதுகாமஸ்ஸ அப்பக்³க⁴ம் வாயாபேதி, உம்மத்தகஸ்ஸ, ஆதி³கம்மிகஸ்ஸாதி.

மஹாபேஸகாரஸிக்கா²பத³ம் நிட்டி²தம் ஸத்தமம்.