6. ஸுத்தவிஞ்ஞத்திஸிக்கா²பத³ம்

636. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ச²ப்³ப³க்³கி³யா பி⁴க்கூ² சீவரகாரஸமயே ப³ஹும் ஸுத்தம் விஞ்ஞாபேஸும். கதேபி சீவரே ப³ஹும் ஸுத்தம் அவஸிட்ட²ம் ஹோதி. அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘ஹந்த³ மயம், ஆவுஸோ, அஞ்ஞம்பி ஸுத்தம் விஞ்ஞாபேத்வா தந்தவாயேஹி சீவரம் வாயாபேமா’’தி. அத² கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தம் விஞ்ஞாபேத்வா தந்தவாயேஹி சீவரம் வாயாபேஸும். வீதேபி சீவரே ப³ஹும் ஸுத்தம் அவஸிட்ட²ம் ஹோதி. து³தியம்பி கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தம் விஞ்ஞாபேத்வா தந்தவாயேஹி சீவரம் வாயாபேஸும். வீதேபி சீவரே ப³ஹும் ஸுத்தம் அவஸிட்ட²ம் ஹோதி. ததியம்பி கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தம் விஞ்ஞாபேத்வா தந்தவாயேஹி சீவரம் வாயாபேஸும். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேஸ்ஸந்தீ’’தி!

அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

637. ‘‘யோ பன பி⁴க்கு² ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேய்ய, நிஸ்ஸக்³கி³யம் பாசித்திய’’ந்தி.

638. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸாமந்தி ஸயம் விஞ்ஞாபேத்வா.

ஸுத்தம் நாம ச² ஸுத்தானி – கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³ம்.

தந்தவாயேஹீதி பேஸகாரேஹி வாயாபேதி, பயோகே³ பயோகே³ து³க்கடம் [வாயாபேதி, பயோகே³ து³க்கடம் (ஸ்யா.)]. படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் ஸாமம் ஸுத்தம் விஞ்ஞாபேத்வா தந்தவாயேஹி வாயாபிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

639. வாயாபிதே வாயாபிதஸஞ்ஞீ, நிஸ்ஸக்³கி³யம் பாசித்தியம். வாயாபிதே வேமதிகோ, நிஸ்ஸக்³கி³யம் பாசித்தியம். வாயாபிதே அவாயாபிதஸஞ்ஞீ, நிஸ்ஸக்³கி³யம் பாசித்தியம்.

அவாயாபிதே வாயாபிதஸஞ்ஞீ, ஆபத்தி து³க்கடஸ்ஸ. அவாயாபிதே வேமதிகோ, ஆபத்தி து³க்கடஸ்ஸ. அவாயாபிதே அவாயாபிதஸஞ்ஞீ, அனாபத்தி.

640. அனாபத்தி – சீவரம் ஸிப்³பே³தும், ஆயோகே³, காயப³ந்த⁴னே, அம்ஸப³ந்த⁴கே [அம்ஸவட்டகே (ஸீ.)], பத்தத்த²விகாய, பரிஸ்ஸாவனே, ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.

ஸுத்தவிஞ்ஞத்திஸிக்கா²பத³ம் நிட்டி²தம் ச²ட்ட²ம்.