5. சீவரஅச்சி²ந்த³னஸிக்கா²பத³ம்

631. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பா⁴துனோ ஸத்³தி⁴விஹாரிகம் பி⁴க்கு²ம் ஏதத³வோச – ‘‘ஏஹாவுஸோ, ஜனபத³சாரிகம் பக்கமிஸ்ஸாமா’’தி. ‘‘நாஹம், ப⁴ந்தே, க³மிஸ்ஸாமி; து³ப்³ப³லசீவரோம்ஹீ’’தி. ‘‘ஏஹாவுஸோ, அஹம் தே சீவரம் த³ஸ்ஸாமீ’’தி தஸ்ஸ சீவரம் அதா³ஸி. அஸ்ஸோஸி கோ² ஸோ பி⁴க்கு² – ‘‘ப⁴க³வா கிர ஜனபத³சாரிகம் பக்கமிஸ்ஸதீ’’தி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ந தா³னாஹம் ஆயஸ்மதா உபனந்தே³ன ஸக்யபுத்தேன ஸத்³தி⁴ம் ஜனபத³சாரிகம் பக்கமிஸ்ஸாமி, ப⁴க³வதா ஸத்³தி⁴ம் ஜனபத³சாரிகம் பக்கமிஸ்ஸாமீ’’தி. அத² கோ² ஆயஸ்மா உபனந்தோ³ ஸக்யபுத்தோ தம் பி⁴க்கு²ம் ஏதத³வோச – ‘‘ஏஹி தா³னி, ஆவுஸோ, ஜனபத³சாரிகம் பக்கமிஸ்ஸாமா’’தி. ‘‘நாஹம், ப⁴ந்தே, தயா ஸத்³தி⁴ம் ஜனபத³சாரிகம் பக்கமிஸ்ஸாமி, ப⁴க³வதா ஸத்³தி⁴ம் ஜனபத³சாரிகம் பக்கமிஸ்ஸாமீ’’தி. ‘‘யம்பி த்யாஹம், ஆவுஸோ, சீவரம் அதா³ஸிம், மயா ஸத்³தி⁴ம் ஜனபத³சாரிகம் பக்கமிஸ்ஸதீ’’தி, குபிதோ அனத்தமனோ அச்சி²ந்தி³.

அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பி⁴க்கு²ஸ்ஸ ஸாமம் சீவரம் த³த்வா குபிதோ அனத்தமனோ அச்சி²ந்தி³ஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, பி⁴க்கு²ஸ்ஸ ஸாமம் சீவரம் த³த்வா குபிதோ அனத்தமனோ அச்சி²ந்தீ³’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பி⁴க்கு²ஸ்ஸ ஸாமம் சீவரம் த³த்வா குபிதோ அனத்தமனோ அச்சி²ந்தி³ஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

632. ‘‘யோ பன பி⁴க்கு² பி⁴க்கு²ஸ்ஸ ஸாமம் சீவரம் த³த்வா குபிதோ அனத்தமனோ அச்சி²ந்தே³ய்ய வா அச்சி²ந்தா³பேய்ய வா, நிஸ்ஸக்³கி³யம் பாசித்திய’’ந்தி.

633. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ஸ்ஸாதி அஞ்ஞஸ்ஸ பி⁴க்கு²ஸ்ஸ.

ஸாமந்தி ஸயம் த³த்வா.

சீவரம் நாம ச²ன்னம் சீவரானம் அஞ்ஞதரம் சீவரம், விகப்பனுபக³ம் பச்சி²மம்.

குபிதோ அனத்தமனோதி அனபி⁴ரத்³தோ⁴ ஆஹதசித்தோ கி²லஜாதோ.

அச்சி²ந்தே³ய்யாதி ஸயம் அச்சி²ந்த³தி, நிஸ்ஸக்³கி³யம் பாசித்தியம் [நிஸ்ஸக்³கி³யம் ஹோதி (ஸ்யா.)].

அச்சி²ந்தா³பேய்யாதி அஞ்ஞம் ஆணாபேதி, ஆபத்தி து³க்கடஸ்ஸ. ஸகிம் ஆணத்தோ ப³ஹுகம்பி அச்சி²ந்த³தி, நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் பி⁴க்கு²ஸ்ஸ ஸாமம் த³த்வா அச்சி²ன்னம் நிஸ்ஸக்³கி³யம் இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி …பே… த³தே³ய்யுந்தி…பே… ஆயஸ்மதோ த³ம்மீதி.

634. உபஸம்பன்னே உபஸம்பன்னஸஞ்ஞீ சீவரம் த³த்வா குபிதோ அனத்தமனோ அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம். உபஸம்பன்னே வேமதிகோ சீவரம் த³த்வா குபிதோ அனத்தமனோ அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம். உபஸம்பன்னே அனுபஸம்பன்னஸஞ்ஞீ சீவரம் த³த்வா குபிதோ அனத்தமனோ அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம்.

அஞ்ஞம் பரிக்கா²ரம் த³த்வா குபிதோ அனத்தமனோ அச்சி²ந்த³தி வா அச்சி²ந்தா³பேதி வா, ஆபத்தி து³க்கடஸ்ஸ. அனுபஸம்பன்னஸ்ஸ சீவரம் வா அஞ்ஞம் வா பரிக்கா²ரம் த³த்வா குபிதோ அனத்தமனோ அச்சி²ந்த³தி வா அச்சி²ந்தா³பேதி வா, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

635. அனாபத்தி – ஸோ வா தே³தி, தஸ்ஸ வா விஸ்ஸஸந்தோ க³ண்ஹாதி, உம்மத்தகஸ்ஸ ஆதி³கம்மிகஸ்ஸாதி.

சீவரஅச்சி²ந்த³னஸிக்கா²பத³ம் நிட்டி²தம் பஞ்சமம்.