2. ஊனபஞ்சப³ந்த⁴னஸிக்கா²பத³ம்

609. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. தேன கோ² பன ஸமயேன அஞ்ஞதரேன கும்ப⁴காரேன பி⁴க்கூ² பவாரிதா ஹோந்தி – ‘‘யேஸம் அய்யானம் பத்தேன அத்தோ² அஹம் பத்தேனா’’தி. தேன கோ² பன ஸமயேன பி⁴க்கூ² ந மத்தம் ஜானித்வா ப³ஹூ பத்தே விஞ்ஞாபேந்தி. யேஸம் கு²த்³த³கா பத்தா தே மஹந்தே பத்தே விஞ்ஞாபேந்தி. யேஸம் மஹந்தா பத்தா தே கு²த்³த³கே பத்தே விஞ்ஞாபேந்தி. அத² கோ² ஸோ கும்ப⁴காரோ பி⁴க்கூ²னம் ப³ஹூ பத்தே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ராபிஸ்ஸ கிலமந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா ப³ஹூ பத்தே விஞ்ஞாபேஸ்ஸந்தி! அயம் இமேஸம் ப³ஹூ பத்தே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ராபிஸ்ஸ கிலமந்தீ’’தி.

அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² ந மத்தம் ஜானித்வா ப³ஹூ பத்தே விஞ்ஞாபேஸ்ஸந்தீ’’தி! அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, பி⁴க்கூ² ந மத்தம் ஜானித்வா ப³ஹூ பத்தே விஞ்ஞாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ந மத்தம் ஜானித்வா ப³ஹூ பத்தே விஞ்ஞாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பத்தோ விஞ்ஞாபேதப்³போ³. யோ விஞ்ஞாபேய்ய, ஆபத்தி து³க்கடஸ்ஸா’’தி.

610. தேன கோ² பன ஸமயேன அஞ்ஞதரஸ்ஸ பி⁴க்கு²னோ பத்தோ பி⁴ன்னோ ஹோதி. அத² கோ² ஸோ பி⁴க்கு² – ‘‘ப⁴க³வதா படிக்கி²த்தம் பத்தம் விஞ்ஞாபேது’’ந்தி குக்குச்சாயந்தோ ந விஞ்ஞாபேதி. ஹத்தே²ஸு பிண்டா³ய சரதி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஹத்தே²ஸு பிண்டா³ய சரிஸ்ஸந்தி, ஸேய்யதா²பி தித்தி²யா’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, நட்ட²பத்தஸ்ஸ வா பி⁴ன்னபத்தஸ்ஸ வா பத்தம் விஞ்ஞாபேது’’ந்தி.

611. தேன கோ² பன ஸமயேன ச²ப்³ப³க்³கி³யா பி⁴க்கூ² – ‘‘ப⁴க³வதா அனுஞ்ஞாதம் நட்ட²பத்தஸ்ஸ வா பி⁴ன்னபத்தஸ்ஸ வா பத்தம் விஞ்ஞாபேது’’ந்தி அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபேந்தி. அத² கோ² ஸோ கும்ப⁴காரோ பி⁴க்கூ²னம் ததே²வ ப³ஹூ பத்தே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ராபிஸ்ஸ கிலமந்தி. மனுஸ்ஸா ததே²வ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா ப³ஹூ பத்தே விஞ்ஞாபேஸ்ஸந்தி! அயம் இமேஸம் ப³ஹூ பத்தே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ராபிஸ்ஸ கிலமந்தீ’’தி.

அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

612. ‘‘யோ பன பி⁴க்கு² ஊனபஞ்சப³ந்த⁴னேன பத்தேன அஞ்ஞம் நவம் பத்தம் சேதாபேய்ய, நிஸ்ஸக்³கி³யம் பாசித்தியம். தேன பி⁴க்கு²னா ஸோ பத்தோ பி⁴க்கு²பரிஸாய நிஸ்ஸஜ்ஜிதப்³போ³. யோ ச தஸ்ஸா பி⁴க்கு²பரிஸாய பத்தபரியந்தோ ஸோ தஸ்ஸ பி⁴க்கு²னோ பதா³தப்³போ³ – ‘அயம் தே, பி⁴க்கு², பத்தோ யாவ பே⁴த³னாய தா⁴ரேதப்³போ³’தி. அயம் தத்த² ஸாமீசீ’’தி.

613. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஊனபஞ்சப³ந்த⁴னோ நாம பத்தோ அப³ந்த⁴னோ வா ஏகப³ந்த⁴னோ வா த்³விப³ந்த⁴னோ வா திப³ந்த⁴னோ வா சதுப³ந்த⁴னோ வா. அப³ந்த⁴னோகாஸோ நாம பத்தோ யஸ்ஸ த்³வங்கு³லா ராஜி ந ஹோதி. ப³ந்த⁴னோகாஸோ நாம பத்தோ யஸ்ஸ த்³வங்கு³லா ராஜி ஹோதி. நவோ நாம பத்தோ விஞ்ஞத்திம் உபாதா³ய வுச்சதி.

சேதாபேய்யாதி விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யோ ஹோதி. ஸங்க⁴மஜ்ஜே² நிஸ்ஸஜ்ஜிதப்³போ³. ஸப்³பே³ஹேவ அதி⁴ட்டி²தபத்தம் க³ஹேத்வா ஸன்னிபதிதப்³ப³ம். ந லாமகோ பத்தோ அதி⁴ட்டா²தப்³போ³ – ‘‘மஹக்³க⁴ம் பத்தம் க³ஹேஸ்ஸாமீ’’தி. ஸசே லாமகம் பத்தம் அதி⁴ட்டே²தி – ‘‘மஹக்³க⁴ம் பத்தம் க³ஹேஸ்ஸாமீ’’தி, ஆபத்தி து³க்கடஸ்ஸ. ஏவஞ்ச பன, பி⁴க்க²வே, நிஸ்ஸஜ்ஜிதப்³போ³. தேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அயம் மே, ப⁴ந்தே, பத்தோ ஊனபஞ்சப³ந்த⁴னேன பத்தேன சேதாபிதோ நிஸ்ஸக்³கி³யோ. இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. பஞ்சஹங்கே³ஹி ஸமன்னாக³தோ பி⁴க்கு² பத்தக்³கா³ஹாபகோ ஸம்மன்னிதப்³போ³ – யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, கா³ஹிதாகா³ஹிதஞ்ச ஜானேய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மம் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

614. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் பத்தக்³கா³ஹாபகம் ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் பத்தக்³கா³ஹாபகம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பத்தக்³கா³ஹாபகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² பத்தக்³கா³ஹாபகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

615. தேன ஸம்மதேன பி⁴க்கு²னா பத்தோ கா³ஹேதப்³போ³. தே²ரோ வத்தப்³போ³ – ‘‘க³ண்ஹாது, ப⁴ந்தே, தே²ரோ பத்த’’ந்தி. ஸசே தே²ரோ க³ண்ஹாதி, தே²ரஸ்ஸ பத்தோ து³தியஸ்ஸ கா³ஹேதப்³போ³. ந ச தஸ்ஸ அனுத்³த³யதாய ந க³ஹேதப்³போ³. யோ ந க³ண்ஹேய்ய, ஆபத்தி து³க்கடஸ்ஸ. அபத்தகஸ்ஸ ந கா³ஹேதப்³போ³. ஏதேனேவ உபாயேன யாவ ஸங்க⁴னவகா கா³ஹேதப்³பா³. யோ ச தஸ்ஸா பி⁴க்கு²பரிஸாய பத்தபரியந்தோ, ஸோ தஸ்ஸ பி⁴க்கு²னோ பதா³தப்³போ³ – ‘‘அயம் தே, பி⁴க்கு², பத்தோ யாவ பே⁴த³னாய தா⁴ரேதப்³போ³’’தி.

தேன பி⁴க்கு²னா ஸோ பத்தோ ந அதே³ஸே நிக்கி²பிதப்³போ³, ந அபோ⁴கே³ன பு⁴ஞ்ஜிதப்³போ³, ந விஸ்ஸஜ்ஜேதப்³போ³ – ‘‘கதா²யம் பத்தோ நஸ்ஸேய்ய வா வினஸ்ஸேய்ய வா பி⁴ஜ்ஜேய்ய வா’’தி? ஸசே அதே³ஸே வா நிக்கி²பதி அபோ⁴கே³ன வா பு⁴ஞ்ஜதி விஸ்ஸஜ்ஜேதி வா, ஆபத்தி து³க்கடஸ்ஸ.

அயம் தத்த² ஸாமீசீதி அயம் தத்த² அனுத⁴ம்மதா.

616. அப³ந்த⁴னேன பத்தேன அப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னேன பத்தேன ஏகப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னேன பத்தேன த்³விப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னேன பத்தேன திப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னேன பத்தேன சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

ஏகப³ந்த⁴னேன பத்தேன அப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். ஏகப³ந்த⁴னேன பத்தேன ஏகப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். ஏகப³ந்த⁴னேன பத்தேன த்³விப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். ஏகப³ந்த⁴னேன பத்தேன திப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். ஏகப³ந்த⁴னேன பத்தேன சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

த்³விப³ந்த⁴னேன பத்தேன அப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். த்³விப³ந்த⁴னேன பத்தேன ஏகப³ந்த⁴னம் பத்தம்…பே… த்³விப³ந்த⁴னம் பத்தம்… திப³ந்த⁴னம் பத்தம்… சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

திப³ந்த⁴னேன பத்தேன அப³ந்த⁴னம் பத்தம்…பே… ஏகப³ந்த⁴னம் பத்தம்…பே… த்³விப³ந்த⁴னம் பத்தம்… திப³ந்த⁴னம் பத்தம்… சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

சதுப³ந்த⁴னேன பத்தேன அப³ந்த⁴னம் பத்தம்…பே… ஏகப³ந்த⁴னம் பத்தம்… த்³விப³ந்த⁴னம் பத்தம்… திப³ந்த⁴னம் பத்தம்… சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

அப³ந்த⁴னேன பத்தேன அப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னேன பத்தேன ஏகப³ந்த⁴னோகாஸம் பத்தம்…பே… த்³விப³ந்த⁴னோகாஸம் பத்தம் … திப³ந்த⁴னோகாஸம் பத்தம்… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

ஏகப³ந்த⁴னேன பத்தேன அப³ந்த⁴னோகாஸம் பத்தம்…பே… ஏகப³ந்த⁴னோகாஸம் பத்தம்… த்³விப³ந்த⁴னோகாஸம் பத்தம்… திப³ந்த⁴னோகாஸம் பத்தம்… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

த்³விப³ந்த⁴னேன பத்தேன அப³ந்த⁴னோகாஸம் பத்தம்…பே… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

திப³ந்த⁴னேன பத்தேன அப³ந்த⁴னோகாஸம் பத்தம்…பே… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

சதுப³ந்த⁴னேன பத்தேன அப³ந்த⁴னோகாஸம் பத்தம்…பே… ஏகப³ந்த⁴னோகாஸம் பத்தம்… த்³விப³ந்த⁴னோகாஸம் பத்தம்… திப³ந்த⁴னோகாஸம் பத்தம்… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

அப³ந்த⁴னோகாஸேன பத்தேன அப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். அப³ந்த⁴னோகாஸேன பத்தேன ஏகப³ந்த⁴னம் பத்தம்…பே… த்³விப³ந்த⁴னம் பத்தம்… திப³ந்த⁴னம் பத்தம்… சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

சதுப³ந்த⁴னோகாஸேன பத்தேன அப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம். சதுப³ந்த⁴னோகாஸேன பத்தேன ஏகப³ந்த⁴னம் பத்தம்…பே… த்³விப³ந்த⁴னம் பத்தம்… திப³ந்த⁴னம் பத்தம்… சதுப³ந்த⁴னம் பத்தம் சேதாபேதி, நிஸ்ஸக்³கி³யம் பாசித்தியம்.

அப³ந்த⁴னோகாஸேன பத்தேன அப³ந்த⁴னோகாஸம் பத்தம்…பே… ஏகப³ந்த⁴னோகாஸம் பத்தம்… த்³விப³ந்த⁴னோகாஸம் பத்தம்… திப³ந்த⁴னோகாஸம் பத்தம்… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

சதுப³ந்த⁴னோகாஸேன பத்தேன அப³ந்த⁴னோகாஸம் பத்தம்…பே… ஏகப³ந்த⁴னோகாஸம் பத்தம்… த்³விப³ந்த⁴னோகாஸம் பத்தம்… திப³ந்த⁴னோகாஸம் பத்தம்… சதுப³ந்த⁴னோகாஸம் பத்தம் சேதாபேதி, நிஸ்ஸக்³கி³யம் பாசித்தியம்.

617. அனாபத்தி நட்ட²பத்தஸ்ஸ, பி⁴ன்னபத்தஸ்ஸ, ஞாதகானம் பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.

ஊனபஞ்சப³ந்த⁴னஸிக்கா²பத³ம் நிட்டி²தம் து³தியம்.