3. பே⁴ஸஜ்ஜஸிக்கா²பத³ம்

618. [இத³ம் வத்து² மஹாவ. 270] தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா பிலிந்த³வச்சோ² ராஜக³ஹே பப்³பா⁴ரம் ஸோதா⁴பேதி லேணம் கத்துகாமோ. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்த³வச்சோ² தேனுபஸங்கமி; உபஸங்கமித்வா ஆயஸ்மந்தம் பிலிந்த³வச்ச²ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தம் பிலிந்த³வச்ச²ம் ஏதத³வோச – ‘‘கிம், ப⁴ந்தே, தே²ரோ காராபேதீ’’தி? ‘‘பப்³பா⁴ரம் மஹாராஜ, ஸோதா⁴பேமி லேணம் கத்துகாமோ’’தி. ‘‘அத்தோ², ப⁴ந்தே, அய்யஸ்ஸ ஆராமிகேனா’’தி? ‘‘ந கோ², மஹாராஜ, ப⁴க³வதா ஆராமிகோ அனுஞ்ஞாதோ’’தி. ‘‘தேன ஹி, ப⁴ந்தே, ப⁴க³வந்தம் படிபுச்சி²த்வா மம ஆரோசேய்யாதா²’’தி. ‘‘ஏவம் மஹாராஜா’’தி கோ² ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சஸ்ஸோஸி. அத² கோ² ஆயஸ்மா பிலிந்த³வச்சோ² ராஜானம் மாக³த⁴ம் ஸேனியம் பி³ம்பி³ஸாரம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மதா பிலிந்த³வச்சே²ன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ உட்டா²யாஸனா ஆயஸ்மந்தம் பிலிந்த³வச்ச²ம் அபி⁴வாதே³த்வா பத³க்கி²ணம் கத்வா பக்காமி.

619. அத² கோ² ஆயஸ்மா பிலிந்த³வச்சோ² ப⁴க³வதோ ஸந்திகே தூ³தம் பாஹேஸி – ‘‘ராஜா, ப⁴ந்தே, மாக³தோ⁴ ஸேனியோ பி³ம்பி³ஸாரோ ஆராமிகம் தா³துகாமோ. கத²ம் நு கோ², ப⁴ந்தே, மயா படிபஜ்ஜிதப்³ப³’’ந்தி? அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஆராமிக’’ந்தி. து³தியம்பி கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்தி³வச்சோ² தேனுபஸங்கமி; உபஸங்கமித்வா ஆயஸ்மந்தம் பிலிந்த³வச்ச²ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தம் பிலிந்த³வச்ச²ம் ஏதத³வோச – ‘‘அனுஞ்ஞாதோ, ப⁴ந்தே, ப⁴க³வதா ஆராமிகோ’’தி? ‘‘ஏவம், மஹாராஜா’’தி. ‘‘தேன ஹி, ப⁴ந்தே, அய்யஸ்ஸ ஆராமிகம் த³ம்மீ’’தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மதோ பிலிந்த³வச்ச²ஸ்ஸ ஆராமிகம் படிஸ்ஸுணித்வா விஸ்ஸரித்வா சிரேன ஸதிம் படிலபி⁴த்வா அஞ்ஞதரம் ஸப்³ப³த்த²கம் மஹாமத்தம் ஆமந்தேஸி – ‘‘யோ மயா, ப⁴ணே, அய்யஸ்ஸ ஆராமிகோ படிஸ்ஸுதோ, தி³ன்னோ ஸோ ஆராமிகோ’’தி? ‘‘ந கோ², தே³வ, அய்யஸ்ஸ ஆராமிகோ தி³ன்னோ’’தி. ‘‘கீவசிரம் நு கோ², ப⁴ணே, இதோ ஹி தம் ஹோதீ’’தி? அத² கோ² ஸோ மஹாமத்தோ ரத்தியோ க³ணேத்வா [விக³ணேத்வா (க.)] ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘பஞ்ச, தே³வ, ரத்திஸதானீ’’தி. ‘‘தேன ஹி, ப⁴ணே, அய்யஸ்ஸ பஞ்ச ஆராமிகஸதானி தே³ஹீ’’தி. ‘‘ஏவம், தே³வா’’தி கோ² ஸோ மஹாமத்தோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுணித்வா ஆயஸ்மதோ பிலிந்த³வச்ச²ஸ்ஸ பஞ்ச ஆராமிகஸதானி பாதா³ஸி [அதா³ஸி (ஸ்யா.)], பாடியேக்கோ கா³மோ நிவிஸி. ஆராமிககா³மகோதிபி நம் ஆஹம்ஸு, பிலிந்த³கா³மகோதிபி நம் ஆஹம்ஸு.

620. தேன கோ² பன ஸமயேன ஆயஸ்மா பிலிந்த³வச்சோ² தஸ்மிம் கா³மகே குலூபகோ ஹோதி. அத² கோ² ஆயஸ்மா பிலிந்த³வச்சோ² புப்³ப³ண்ஹஸமயம் நிவாஸேத்வா பத்தசீவரம் ஆதா³ய பிலிந்த³கா³மகம் பிண்டா³ய பாவிஸி. தேன கோ² பன ஸமயேன தஸ்மிம் கா³மகே உஸ்ஸவோ ஹோதி. தா³ரகா அலங்கதா மாலாகிதா கீளந்தி. அத² கோ² ஆயஸ்மா பிலிந்த³வச்சோ² பிலிந்த³கா³மகே ஸபதா³னம் பிண்டா³ய சரமானோ யேன அஞ்ஞதரஸ்ஸ ஆராமிகஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. தேன கோ² பன ஸமயேன தஸ்ஸா ஆராமிகினியா தீ⁴தா அஞ்ஞே தா³ரகே அலங்கதே மாலாகிதே பஸ்ஸித்வா ரோத³தி – ‘‘மாலம் மே தே³த², அலங்காரம் மே தே³தா²’’தி. அத² கோ² ஆயஸ்மா பிலிந்த³வச்சோ² தம் ஆராமிகினிம் ஏதத³வோச – ‘‘கிஸ்ஸாயம் தா³ரிகா ரோத³தீ’’தி? ‘‘அயம், ப⁴ந்தே, தா³ரிகா அஞ்ஞே தா³ரகே அலங்கதே மாலாகிதே பஸ்ஸித்வா ரோத³தி – ‘மாலம் மே தே³த², அலங்காரம் மே தே³தா²’தி. குதோ அம்ஹாகம் து³க்³க³தானம் மாலா குதோ, அலங்காரோ’’தி? அத² கோ² ஆயஸ்மா பிலிந்த³வச்சோ² அஞ்ஞதரம் திணண்டு³பகம் க³ஹேத்வா தம் ஆராமிகினிம் ஏதத³வோச – ‘‘ஹந்தி³மம் திணண்டு³பகம் தஸ்ஸா தா³ரிகாய ஸீஸே படிமுஞ்சா’’தி. அத² கோ² ஸா ஆராமிகினீ தம் திணண்டு³பகம் க³ஹேத்வா தஸ்ஸா தா³ரிகாய ஸீஸே படிமுஞ்சி. ஸா அஹோஸி ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா ரஞ்ஞோபி அந்தேபுரே ஸுவண்ணமாலா. மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஆரோசேஸும் – ‘‘அமுகஸ்ஸ, தே³வ, ஆராமிகஸ்ஸ க⁴ரே ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா தே³வஸ்ஸாபி அந்தேபுரே ஸுவண்ணமாலா. குதோ தஸ்ஸ து³க்³க³தஸ்ஸ! நிஸ்ஸம்ஸயம் சோரிகாய ஆப⁴தா’’தி!! அத² கோ² ராஜா மாக³தோ⁴ ஸேனியோ பி³ம்பி³ஸாரோ தம் ஆராமிககுலம் ப³ந்தா⁴பேஸி. து³தியம்பி கோ² ஆயஸ்மா பிலிந்த³வச்சோ² புப்³ப³ண்ஹஸமயம் நிவாஸேத்வா பத்தசீவரம் ஆதா³ய பிலிந்த³கா³மகம் பிண்டா³ய பாவிஸி. பிலிந்த³கா³மகே ஸபதா³னம் பிண்டா³ய சரமானோ யேன தஸ்ஸ ஆராமிகஸ்ஸ நிவேஸனம் தேனுபஸங்கமி; உபஸங்கமித்வா படிவிஸ்ஸகே புச்சி² – ‘‘கஹம் இமம் ஆராமிககுலம் க³த’’ந்தி? ‘‘ஏதிஸ்ஸா, ப⁴ந்தே, ஸுவண்ணமாலாய காரணா ரஞ்ஞா ப³ந்தா⁴பித’’ந்தி.

621. அத² கோ² ஆயஸ்மா பிலிந்த³வச்சோ² யேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்த³வச்சோ² தேனுபஸங்கமி; உபஸங்கமித்வா ஆயஸ்மந்தம் பிலிந்த³வச்ச²ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜானம் மாக³த⁴ம் ஸேனியம் பி³ம்பி³ஸாரம் ஆயஸ்மா பிலிந்த³வச்சோ² ஏதத³வோச – ‘‘கிஸ்ஸ, மஹாராஜ, ஆராமிககுலம் ப³ந்தா⁴பித’’ந்தி? ‘‘தஸ்ஸ, ப⁴ந்தே, ஆராமிகஸ்ஸ க⁴ரே ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா அம்ஹாகம்பி அந்தேபுரே ஸுவண்ணமாலா. குதோ தஸ்ஸ து³க்³க³தஸ்ஸ! நிஸ்ஸம்ஸயம் சோரிகாய ஆப⁴தா’’தி!! அத² கோ² ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ம் ஸுவண்ணந்தி அதி⁴முச்சி. ஸோ அஹோஸி ஸப்³ப³ஸோவண்ணமயோ. ‘‘இத³ம் பன தே, மஹாராஜ, தாவ ப³ஹும் ஸுவண்ணம் குதோ’’தி? ‘‘அஞ்ஞாதம், ப⁴ந்தே, அய்யஸ்ஸேவேஸோ இத்³தா⁴னுபா⁴வோ’’தி. தம் ஆராமிககுலம் முஞ்சாபேஸி. மனுஸ்ஸா – ‘‘அய்யேன கிர பிலிந்த³வச்சே²ன ஸராஜிகாய பரிஸாய உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸித’’ந்தி, அத்தமனா அபி⁴ப்பஸன்னா ஆயஸ்மதோ பிலிந்த³வச்ச²ஸ்ஸ பஞ்ச பே⁴ஸஜ்ஜானி அபி⁴ஹரிம்ஸு, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம். பகதியாபி ச ஆயஸ்மா பிலிந்த³வச்சோ² லாபீ⁴ ஹோதி பஞ்சன்னம் பே⁴ஸஜ்ஜானம். லத்³த⁴ம் லத்³த⁴ம் பரிஸாய விஸ்ஸஜ்ஜேதி. பரிஸா சஸ்ஸ ஹோதி பா³ஹுல்லிகா. லத்³த⁴ம் லத்³த⁴ம் கோலம்பே³பி க⁴டேபி பூரேத்வா படிஸாமேதி, பரிஸ்ஸாவனானிபி த²விகாயோபி பூரேத்வா வாதபானேஸு லக்³கே³தி. தானி ஓலீனவிலீனானி திட்ட²ந்தி. உந்தூ³ரேஹிபி விஹாரா ஓகிண்ணவிகிண்ணா ஹோந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘அந்தோகோட்டா²கா³ரிகா இமே ஸமணா ஸக்யபுத்தியா, ஸேய்யதா²பி ராஜா மாக³தோ⁴ ஸேனியோ பி³ம்பி³ஸாரோ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² ஏவரூபாய பா³ஹுல்லாய சேதேஸ்ஸந்தீ’’தி! அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, பி⁴க்கூ² ஏவரூபாய பா³ஹுல்லாய சேதேந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ஏவரூபாய பா³ஹுல்லாய சேதேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

622. ‘‘யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸஜ்ஜானி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம், தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னி. தம் அதிக்காமயதோ நிஸ்ஸக்³கி³யம் பாசித்திய’’ந்தி.

623. யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸ்ஸஜ்ஜானீதி ஸப்பி நாம கோ³ஸப்பி வா அஜிகாஸப்பி வா மஹிம்ஸஸப்பி [மஹிஸஸப்பி (ஸீ. ஸ்யா.)] வா யேஸம் மம்ஸம் கப்பதி தேஸம் ஸப்பி. நவனீதம் நாம தேஸம் யேவ நவனீதம். தேலம் நாம திலதேலம் ஸாஸபதேலம் மது⁴கதேலம் ஏரண்ட³தேலம் வஸாதேலம். மது⁴ நாம மக்கி²காமது⁴. பா²ணிதம் நாம உச்சு²ம்ஹா நிப்³ப³த்தம்.

தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னீதி ஸத்தாஹபரமதா பரிபு⁴ஞ்ஜிதப்³பா³னி.

தம் அதிக்காமயதோ நிஸ்ஸக்³கி³யம் ஹோதீதி அட்ட²மே அருணுக்³க³மனே நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, பே⁴ஸஜ்ஜம் ஸத்தாஹாதிக்கந்தம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

624. ஸத்தாஹாதிக்கந்தே அதிக்கந்தஸஞ்ஞீ, நிஸ்ஸக்³கி³யம் பாசித்தியம். ஸத்தாஹாதிக்கந்தே வேமதிகோ, நிஸ்ஸக்³கி³யம் பாசித்தியம். ஸத்தாஹாதிக்கந்தே அனதிக்கந்தஸஞ்ஞீ, நிஸ்ஸக்³கி³யம் பாசித்தியம். அனதி⁴ட்டி²தே அதி⁴ட்டி²தஸஞ்ஞீ, நிஸ்ஸக்³கி³யம் பாசித்தியம். அவிஸ்ஸஜ்ஜிதே விஸ்ஸஜ்ஜிதஸஞ்ஞீ, நிஸ்ஸக்³கி³யம் பாசித்தியம். அனட்டே² நட்ட²ஸஞ்ஞீ, நிஸ்ஸக்³கி³யம் பாசித்தியம். அவினட்டே² வினட்ட²ஸஞ்ஞீ, நிஸ்ஸக்³கி³யம் பாசித்தியம். அத³ட்³டே⁴ த³ட்³ட⁴ஸஞ்ஞீ, நிஸ்ஸக்³கி³யம் பாசித்தியம். அவிலுத்தே விலுத்தஸஞ்ஞீ, நிஸ்ஸக்³கி³யம் பாசித்தியம்.

நிஸ்ஸட்ட²ம் படிலபி⁴த்வா ந காயிகேன பரிபோ⁴கே³ன பரிபு⁴ஞ்ஜிதப்³ப³ம், ந அஜ்ஜோ²ஹரிதப்³ப³ம், பதீ³பே வா காளவண்ணே வா உபனேதப்³ப³ம், அஞ்ஞேன பி⁴க்கு²னா காயிகேன பரிபோ⁴கே³ன பரிபு⁴ஞ்ஜிதப்³ப³ம், ந அஜ்ஜோ²ஹரிதப்³ப³ம்.

ஸத்தாஹானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. ஸத்தாஹானதிக்கந்தே வேமதிகோ, ஆபத்தி து³க்கடஸ்ஸ. ஸத்தாஹானதிக்கந்தே அனதிக்கந்தஸஞ்ஞீ, அனாபத்தி.

625. அனாபத்தி அந்தோஸத்தாஹம் அதி⁴ட்டே²தி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, அனுபஸம்பன்னஸ்ஸ சத்தேன வந்தேன முத்தேன அனபேக்கோ² த³த்வா படிலபி⁴த்வா பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.

பே⁴ஸஜ்ஜஸிக்கா²பத³ம் நிட்டி²தம் ததியம்.