1. பத்தஸிக்கா²பத³ம்

598. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² ப³ஹூ பத்தே ஸன்னிசயம் கரோந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ப³ஹூ பத்தே ஸன்னிசயம் கரிஸ்ஸந்தி, பத்தவாணிஜ்ஜம் வா ஸமணா ஸக்யபுத்தியா கரிஸ்ஸந்தி ஆமத்திகாபணம் வா பஸாரேஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகபத்தம் தா⁴ரேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, அதிரேகபத்தம் தா⁴ரேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அதிரேகபத்தம் தா⁴ரேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய …பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

599. ‘‘யோ பன பி⁴க்கு² அதிரேகபத்தம் தா⁴ரேய்ய, நிஸ்ஸக்³கி³யம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

600. தேன கோ² பன ஸமயேன ஆயஸ்மதோ ஆனந்த³ஸ்ஸ அதிரேகபத்தோ உப்பன்னோ ஹோதி. ஆயஸ்மா ச ஆனந்தோ³ தம் பத்தம் ஆயஸ்மதோ ஸாரிபுத்தஸ்ஸ தா³துகாமோ ஹோதி. ஆயஸ்மா ச ஸாரிபுத்தோ ஸாகேதே விஹரதி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வதா ஸிக்கா²பத³ம் பஞ்ஞத்தம் – ‘ந அதிரேகபத்தோ தா⁴ரேதப்³போ³’தி. அயஞ்ச மே அதிரேகபத்தோ உப்பன்னோ. அஹஞ்சிமம் பத்தம் ஆயஸ்மதோ ஸாரிபுத்தஸ்ஸ தா³துகாமோ. ஆயஸ்மா ச ஸாரிபுத்தோ ஸாகேதே விஹரதி. கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸி. ‘‘கீவசிரம் பனானந்த³, ஸாரிபுத்தோ ஆக³ச்சி²ஸ்ஸதீ’’தி? ‘‘நவமம் வா, ப⁴க³வா, தி³வஸம் த³ஸமம் வா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, த³ஸாஹபரமம் அதிரேகபத்தம் தா⁴ரேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

601. ‘‘த³ஸாஹபரமம் அதிரேகபத்தோ தா⁴ரேதப்³போ³. தம் அதிக்காமயதோ நிஸ்ஸக்³கி³யம் பாசித்திய’’ந்தி.

602. த³ஸாஹபரமந்தி த³ஸாஹபரமதா தா⁴ரேதப்³போ³.

அதிரேகபத்தோ நாம அனதி⁴ட்டி²தோ அவிகப்பிதோ.

பத்தோ நாம த்³வே பத்தா அயோபத்தோ மத்திகாபத்தோதி.

தயோ பத்தஸ்ஸ வண்ணா உக்கட்டோ² பத்தோ மஜ்ஜி²மோ பத்தோ ஓமகோ பத்தோ. உக்கட்டோ² நாம பத்தோ அட்³டா⁴ள்ஹகோத³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். மஜ்ஜி²மோ நாம பத்தோ நாளிகோத³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். ஓமகோ நாம பத்தோ பத்தோ²த³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். ததோ உக்கட்டோ² அபத்தோ, ஓமகோ அபத்தோ.

தம் அதிக்காமயதோ நிஸ்ஸக்³கி³யோ ஹோதீதி ஏகாத³ஸே அருணுக்³க³மனே நிஸ்ஸக்³கி³யோ ஹோதி. நிஸ்ஸஜ்ஜிதப்³போ³ ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³போ³. தேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அயம் மே, ப⁴ந்தே, பத்தோ த³ஸாஹாதிக்கந்தோ நிஸ்ஸக்³கி³யோ. இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³, நிஸ்ஸட்ட²பத்தோ தா³தப்³போ³.

603. ‘‘ஸுணாது மே, ப⁴ந்தே, ஸங்கோ⁴. அயம் பத்தோ இத்த²ன்னாமஸ்ஸ பி⁴க்கு²னோ நிஸ்ஸக்³கி³யோ ஸங்க⁴ஸ்ஸ நிஸ்ஸட்டோ². யதி³ ஸங்க⁴ஸ்ஸ பத்தகல்லம், ஸங்கோ⁴ இமம் பத்தம் இத்த²ன்னாமஸ்ஸ பி⁴க்கு²னோ த³தே³ய்யா’’தி.

604. தேன பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸு வசனீயா – ‘‘அயம் மே, ப⁴ந்தே, பத்தோ த³ஸாஹாதிக்கந்தோ நிஸ்ஸக்³கி³யோ. இமாஹம் ஆயஸ்மந்தானம் நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³, நிஸ்ஸட்ட²பத்தோ தா³தப்³போ³.

605. ‘‘ஸுணந்து மே ஆயஸ்மந்தா. அயம் பத்தோ இத்த²ன்னாமஸ்ஸ பி⁴க்கு²னோ நிஸ்ஸக்³கி³யோ ஆயஸ்மந்தானம் நிஸ்ஸட்டோ². யதா³யஸ்மந்தானம் பத்தகல்லம், ஆயஸ்மந்தா இமம் பத்தம் இத்த²ன்னாமஸ்ஸ பி⁴க்கு²னோ த³தே³ய்யு’’ந்தி.

606. தேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அயம் மே, ஆவுஸோ, பத்தோ த³ஸாஹாதிக்கந்தோ நிஸ்ஸக்³கி³யோ. இமாஹம் ஆயஸ்மதோ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. தேன பி⁴க்கு²னா ஆபத்தி படிக்³க³ஹேதப்³பா³, நிஸ்ஸட்ட²பத்தோ தா³தப்³போ³ – ‘‘இமம் பத்தம் ஆயஸ்மதோ த³ம்மீ’’தி.

607. த³ஸாஹாதிக்கந்தே அதிக்கந்தஸஞ்ஞீ, நிஸ்ஸக்³கி³யம் பாசித்தியம். த³ஸாஹாதிக்கந்தே வேமதிகோ, நிஸ்ஸக்³கி³யம் பாசித்தியம். த³ஸாஹாதிக்கந்தே அனதிக்கந்தஸஞ்ஞீ, நிஸ்ஸக்³கி³யம் பாசித்தியம். அனதி⁴ட்டி²தே அதி⁴ட்டி²தஸஞ்ஞீ, நிஸ்ஸக்³கி³யம் பாசித்தியம். அவிகப்பிதே விகப்பிதஸஞ்ஞீ, நிஸ்ஸக்³கி³யம் பாசித்தியம். அவிஸ்ஸஜ்ஜிதே விஸ்ஸஜ்ஜிதஸஞ்ஞீ, நிஸ்ஸக்³கி³யம் பாசித்தியம். அனட்டே² நட்ட²ஸஞ்ஞீ நிஸ்ஸக்³கி³யம் பாசித்தியம். அவினட்டே² வினட்ட²ஸஞ்ஞீ, நிஸ்ஸக்³கி³யம் பாசித்தியம். அபி⁴ன்னே பி⁴ன்னஸஞ்ஞீ, நிஸ்ஸக்³கி³யம் பாசித்தியம். அவிலுத்தே விலுத்தஸஞ்ஞீ, நிஸ்ஸக்³கி³யம் பாசித்தியம்.

நிஸ்ஸக்³கி³யம் பத்தம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. த³ஸாஹானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. த³ஸாஹானதிக்கந்தே வேமதிகோ, ஆபத்தி து³க்கடஸ்ஸ. த³ஸாஹானதிக்கந்தே அனதிக்கந்தஸஞ்ஞீ, அனாபத்தி.

608. அனாபத்தி அந்தோத³ஸாஹம் அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, பி⁴ஜ்ஜதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, உம்மத்தகஸ்ஸ, ஆதி³கம்மிகஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² நிஸ்ஸட்ட²பத்தம் ந தே³ந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, நிஸ்ஸட்ட²பத்தோ ந தா³தப்³போ³. யோ ந த³தே³ய்ய, ஆபத்தி து³க்கடஸ்ஸா’’தி.

பத்தஸிக்கா²பத³ம் நிட்டி²தம் பட²மம்.