9. ரூபியஸம்வோஹாரஸிக்கா²பத³ம்

587. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² நானப்பகாரகம் ரூபியஸம்வோஹாரம் ஸமாபஜ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா நானப்பகாரகம் ரூபியஸம்வோஹாரம் ஸமாபஜ்ஜிஸ்ஸந்தி, ஸேய்யதா²பி கி³ஹீ காமபோ⁴கி³னோ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² நானப்பகாரகம் ரூபியஸம்வோஹாரம் ஸமாபஜ்ஜிஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, நானப்பகாரகம் ரூபியஸம்வோஹாரம் ஸமாபஜ்ஜதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, நானப்பகாரகம் ரூபியஸம்வோஹாரம் ஸமாபஜ்ஜிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

588. ‘‘யோ பன பி⁴க்கு² நானப்பகாரகம் ரூபியஸம்வோஹாரம் ஸமாபஜ்ஜேய்ய, நிஸ்ஸக்³கி³யம் பாசித்திய’’ந்தி.

589. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

நானப்பகாரகம் நாம கதம்பி அகதம்பி கதாகதம்பி. கதம் நாம ஸீஸூபக³ம் கீ³வூபக³ம் ஹத்தூ²பக³ம் பாதூ³பக³ம் கடூபக³ம். அகதம் நாம க⁴னகதம் வுச்சதி. கதாகதம் நாம தது³ப⁴யம்.

ரூபியம் நாம ஸத்து²வண்ணோ கஹாபணோ, லோஹமாஸகோ, தா³ருமாஸகோ, ஜதுமாஸகோ யே வோஹாரம் க³ச்ச²ந்தி.

ஸமாபஜ்ஜேய்யாதி கதேன கதம் சேதாபேதி, நிஸ்ஸக்³கி³யம் பாசித்தியம் [நிஸ்ஸக்³கி³யம் ஹோதி (ஸ்யா.)]. கதேன அகதம் சேதாபேதி, நிஸ்ஸக்³கி³யம் பாசித்தியம். கதேன கதாகதம் சேதாபேதி, நிஸ்ஸக்³கி³யம் பாசித்தியம். அகதேன கதம் சேதாபேதி, நிஸ்ஸக்³கி³யம் பாசித்தியம். அகதேன அகதம் சேதாபேதி, நிஸ்ஸக்³கி³யம் பாசித்தியம். அகதேன கதாகதம் சேதாபேதி, நிஸ்ஸக்³கி³யம் பாசித்தியம். கதாகதேன கதம் சேதாபேதி, நிஸ்ஸக்³கி³யம் பாசித்தியம். கதாகதேன அகதம் சேதாபேதி, நிஸ்ஸக்³கி³யம் பாசித்தியம். கதாகதேன கதாகதம் சேதாபேதி, நிஸ்ஸக்³கி³யம் பாசித்தியம். ஸங்க⁴மஜ்ஜே² நிஸ்ஸஜ்ஜிதப்³ப³ம். ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம். தேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, நானப்பகாரகம் ரூபியஸம்வோஹாரம் ஸமாபஜ்ஜிம். இத³ம் மே நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. ஸசே தத்த² ஆக³ச்ச²தி ஆராமிகோ வா உபாஸகோ வா ஸோ வத்தப்³போ³ – ‘‘ஆவுஸோ, இமம் ஜானாஹீ’’தி. ஸசே ஸோ ப⁴ணதி – ‘‘இமினா கிம் ஆஹரிய்யதூ’’தி, ந வத்தப்³போ³ – ‘‘இமம் வா இமம் வா ஆஹரா’’தி. கப்பியம் ஆசிக்கி²தப்³ப³ம் – ஸப்பி வா தேலம் வா மது⁴ வா பா²ணிதம் வா. ஸசே ஸோ தேன பரிவத்தேத்வா கப்பியம் ஆஹரதி, ரூபியசேதாபகம் ட²பேத்வா, ஸப்³பே³ஹேவ பரிபு⁴ஞ்ஜிதப்³ப³ம். ஏவஞ்சேதம் லபே⁴த², இச்சேதம் குஸலம்; நோ சே லபே⁴த², ஸோ வத்தப்³போ³ – ‘‘ஆவுஸோ, இமம் ச²ட்³டே³ஹீ’’தி. ஸசே ஸோ ச²ட்³டே³தி, இச்சேதம் குஸலம்; நோ சே ச²ட்³டே³தி, பஞ்சஹங்கே³ஹி ஸமன்னாக³தோ பி⁴க்கு² ரூபியச²ட்³ட³கோ ஸம்மன்னிதப்³போ³ – யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, ச²ட்³டி³தாச²ட்³டி³தஞ்ச ஜானேய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மம் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

590. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ரூபியச²ட்³ட³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² ரூபியச²ட்³ட³கோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

தேன ஸம்மதேன பி⁴க்கு²னா அனிமித்தம் கத்வா பாதேதப்³ப³ம். ஸசே நிமித்தம் கத்வா பாதேதி, ஆபத்தி து³க்கடஸ்ஸ.

591. ரூபியே ரூபியஸஞ்ஞீ ரூபியம் சேதாபேதி, நிஸ்ஸக்³கி³யம் பாசித்தியம். ரூபியே வேமதிகோ ரூபியம் சேதாபேதி, நிஸ்ஸக்³கி³யம் பாசித்தியம். ரூபியே அரூபியஸஞ்ஞீ ரூபியம் சேதாபேதி, நிஸ்ஸக்³கி³யம் பாசித்தியம். அரூபியே ரூபியஸஞ்ஞீ ரூபியம் சேதாபேதி, நிஸ்ஸக்³கி³யம் பாசித்தியம். அரூபியே வேமதிகோ ரூபியம் சேதாபேதி, நிஸ்ஸக்³கி³யம் பாசித்தியம். அரூபியே அரூபியஸஞ்ஞீ ரூபியம் சேதாபேதி, நிஸ்ஸக்³கி³யம் பாசித்தியம்.

அரூபியே ரூபியஸஞ்ஞீ, ஆபத்தி து³க்கடஸ்ஸ. அரூபியே வேமதிகோ, ஆபத்தி து³க்கடஸ்ஸ. அரூபியே அரூபியஸஞ்ஞீ, அனாபத்தி.

592. அனாபத்தி உம்மத்தகஸ்ஸ, ஆதி³கம்மிகஸ்ஸாதி.

ரூபியஸம்வோஹாரஸிக்கா²பத³ம் நிட்டி²தம் நவமம்.