10. கயவிக்கயஸிக்கா²பத³ம்

593. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பட்டோ ஹோதி சீவரகம்மம் காதும். ஸோ படபிலோதிகானம் ஸங்கா⁴டிம் கரித்வா ஸுரத்தம் ஸுபரிகம்மகதம் கத்வா பாருபி. அத² கோ² அஞ்ஞதரோ பரிப்³பா³ஜகோ மஹக்³க⁴ம் படம் பாருபித்வா யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘ஸுந்த³ரா கோ² த்யாயம், ஆவுஸோ, ஸங்கா⁴டி; தே³ஹி மே படேனா’’தி. ‘‘ஜானாஹி, ஆவுஸோ’’தி. ‘‘ஆமாவுஸோ, ஜானாமீ’’தி. ‘‘ஹந்தா³வுஸோ’’தி, அதா³ஸி. அத² கோ² ஸோ பரிப்³பா³ஜகோ தம் ஸங்கா⁴டிம் பாருபித்வா பரிப்³பா³ஜகாராமம் அக³மாஸி. பரிப்³பா³ஜகா தம் பரிப்³பா³ஜகம் ஏதத³வோசும் – ‘‘ஸுந்த³ரா கோ² த்யாயம், ஆவுஸோ, ஸங்கா⁴டி; குதோ தயா லத்³தா⁴’’தி? ‘‘தேன மே, ஆவுஸோ, படேன பரிவத்திதா’’தி. ‘‘கதிஹிபி த்யாயம், ஆவுஸோ, ஸங்கா⁴டி ப⁴விஸ்ஸதி, ஸோயேவ தே படோ வரோ’’தி.

அத² கோ² ஸோ பரிப்³பா³ஜகோ – ‘‘ஸச்சம் கோ² பரிப்³பா³ஜகா ஆஹம்ஸு – ‘கதிஹிபி ம்யாயம் ஸங்கா⁴டி ப⁴விஸ்ஸதி! ஸோயேவ மே படோ வரோ’’’தி யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘ஹந்த³ தே, ஆவுஸோ, ஸங்கா⁴டி [ஸங்கா⁴டிம் (ஸ்யா. க.)]; தே³ஹி மே பட’’ந்தி. ‘‘நனு த்வம், ஆவுஸோ, மயா வுத்தோ – ‘ஜானாஹி, ஆவுஸோ’தி! நாஹ த³ஸ்ஸாமீ’’தி. அத² கோ² ஸோ பரிப்³பா³ஜகோ உஜ்ஜா²யதி கி²ய்யதி விபாசேதி – ‘‘கி³ஹீபி நம் கி³ஹிஸ்ஸ விப்படிஸாரிஸ்ஸ தே³ந்தி, கிம் பன பப்³ப³ஜிதோ பப்³ப³ஜிதஸ்ஸ ந த³ஸ்ஸதீ’’தி! அஸ்ஸோஸும் கோ² பி⁴க்கூ² தஸ்ஸ பரிப்³பா³ஜகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பரிப்³பா³ஜகேன ஸத்³தி⁴ம் கயவிக்கயம் ஸமாபஜ்ஜிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, பரிப்³பா³ஜகேன ஸத்³தி⁴ம் கயவிக்கயம் ஸமாபஜ்ஜஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பரிப்³பா³ஜகேன ஸத்³தி⁴ம் கயவிக்கயம் ஸமாபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

594. ‘‘யோ பன பி⁴க்கு² நானப்பகாரகம் கயவிக்கயம் ஸமாபஜ்ஜேய்ய, நிஸ்ஸக்³கி³யம் பாசித்திய’’ந்தி.

595. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

நானப்பகாரகம் நாம சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா, அந்தமஸோ சுண்ணபிண்டோ³பி த³ந்தகட்ட²ம்பி த³ஸிகஸுத்தம்பி.

கயவிக்கயம் ஸமாபஜ்ஜேய்யாதி இமினா இமம் தே³ஹி, இமினா இமம் ஆஹர, இமினா இமம் பரிவத்தேஹி, இமினா இமம் சேதாபேஹீதி. அஜ்ஜா²சரதி, ஆபத்தி து³க்கடஸ்ஸ. யதோ கயிதஞ்ச ஹோதி விக்கயிதஞ்ச அத்தனோ ப⁴ண்ட³ம் பரஹத்த²க³தம் பரப⁴ண்ட³ம் அத்தனோ ஹத்த²க³தம், நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… அஹம், ப⁴ந்தே, நானப்பகாரகம் கயவிக்கயம் ஸமாபஜ்ஜிம். இத³ம் மே நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

596. கயவிக்கயே கயவிக்கயஸஞ்ஞீ, நிஸ்ஸக்³கி³யம் பாசித்தியம். கயவிக்கயே வேமதிகோ, நிஸ்ஸக்³கி³யம் பாசித்தியம். கயவிக்கயே நகயவிக்கயஸஞ்ஞீ, நிஸ்ஸக்³கி³யம் பாசித்தியம்.

நகயவிக்கயே கயவிக்கயஸஞ்ஞீ, ஆபத்தி து³க்கடஸ்ஸ. நகயவிக்கயே வேமதிகோ, ஆபத்தி து³க்கடஸ்ஸ. நகயவிக்கயே நகயவிக்கயஸஞ்ஞீ, அனாபத்தி.

597. அனாபத்தி – அக்³க⁴ம் புச்ச²தி, கப்பியகாரகஸ்ஸ ஆசிக்க²தி, ‘‘இத³ம் அம்ஹாகம் அத்தி², அம்ஹாகஞ்ச இமினா ச இமினா ச அத்தோ²’’தி ப⁴ணதி, உம்மத்தகஸ்ஸ, ஆதி³கம்மிகஸ்ஸாதி.

கயவிக்கயஸிக்கா²பத³ம் நிட்டி²தம் த³ஸமம்.

கோஸியவக்³கோ³ து³தியோ.

தஸ்ஸுத்³தா³னம் –

கோஸியா ஸுத்³த⁴த்³வேபா⁴கா³, ச²ப்³ப³ஸ்ஸானி நிஸீத³னம்;

த்³வே ச லோமானி உக்³க³ண்ஹே, உபோ⁴ நானப்பகாரகாதி.