8. ரூபியஸிக்கா²பத³ம்

582. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ அஞ்ஞதரஸ்ஸ குலஸ்ஸ குலூபகோ ஹோதி நிச்சப⁴த்திகோ. யம் தஸ்மிம் குலே உப்பஜ்ஜதி கா²த³னீயம் வா போ⁴ஜனீயம் வா ததோ ஆயஸ்மதோ உபனந்த³ஸ்ஸ ஸக்யபுத்தஸ்ஸ படிவிஸோ ட²பிய்யதி. தேன கோ² பன ஸமயேன ஸாயம் தஸ்மிம் குலே மம்ஸம் உப்பன்னம் ஹோதி. ததோ ஆயஸ்மதோ உபனந்த³ஸ்ஸ ஸக்யபுத்தஸ்ஸ படிவிஸோ ட²பிதோ ஹோதி. தஸ்ஸ குலஸ்ஸ தா³ரகோ ரத்தியா பச்சூஸஸமயம் பச்சுட்டா²ய ரோத³தி – ‘‘மம்ஸம் மே தே³தா²’’தி. அத² கோ² ஸோ புரிஸோ பஜாபதிம் ஏதத³வோச – ‘‘அய்யஸ்ஸ படிவிஸம் தா³ரகஸ்ஸ தே³ஹி. அஞ்ஞம் சேதாபேத்வா அய்யஸ்ஸ த³ஸ்ஸாமா’’தி.

அத² கோ² ஆயஸ்மா உபனந்தோ³ ஸக்யபுத்தோ புப்³ப³ண்ஹஸமயம் நிவாஸேத்வா பத்தசீவரம் ஆதா³ய யேன தம் குலம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸோ புரிஸோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ புரிஸோ ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘ஹிய்யோ கோ², ப⁴ந்தே, ஸாயம் மம்ஸம் உப்பன்னம் அஹோஸி. ததோ அய்யஸ்ஸ படிவிஸோ ட²பிதோ. அயம், ப⁴ந்தே, தா³ரகோ ரத்தியா பச்சூஸஸமயம் பச்சுட்டா²ய ரோத³தி – ‘மம்ஸம் மே தே³தா²’தி. அய்யஸ்ஸ படிவிஸோ தா³ரகஸ்ஸ தி³ன்னோ. கஹாபணேன, ப⁴ந்தே, கிம் ஆஹரிய்யதூ’’தி? ‘‘பரிச்சத்தோ மே, ஆவுஸோ, கஹாபணோ’’தி? ‘‘ஆம, ப⁴ந்தே, பரிச்சத்தோ’’தி. ‘‘தஞ்ஞேவ மே, ஆவுஸோ, கஹாபணம் தே³ஹீ’’தி.

அத² கோ² ஸோ புரிஸோ ஆயஸ்மதோ உபனந்த³ஸ்ஸ ஸக்யபுத்தஸ்ஸ கஹாபணம் த³த்வா உஜ்ஜா²யதி கி²ய்யதி விபாசேதி – ‘‘ததே²வ மயம் ரூபியம் படிக்³க³ண்ஹாம ஏவமேவிமே ஸமணா ஸக்யபுத்தியா ரூபியம் படிக்³க³ண்ஹந்தீ’’தி. அஸ்ஸோஸும் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ரூபியம் படிக்³க³ஹேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, ரூபியம் படிக்³க³ஹேஸீ’’தி [படிக்³க³ண்ஹாஸீதி (ஸ்யா.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ரூபியம் படிக்³க³ஹேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

583. ‘‘யோ பன பி⁴க்கு² ஜாதரூபரஜதம் உக்³க³ண்ஹேய்ய வா உக்³க³ண்ஹாபேய்ய வா உபனிக்கி²த்தம் வா ஸாதி³யேய்ய, நிஸ்ஸக்³கி³யம் பாசித்திய’’ந்தி.

584. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஜாதரூபம் நாம ஸத்து²வண்ணோ வுச்சதி.

ரஜதம் நாம கஹாபணோ லோஹமாஸகோ தா³ருமாஸகோ ஜதுமாஸகோ யே வோஹாரம் க³ச்ச²ந்தி.

உக்³க³ண்ஹேய்யாதி ஸயம் க³ண்ஹாதி நிஸ்ஸக்³கி³யம் பாசித்தியம் [நிஸ்ஸக்³கி³யம் ஹோதி (ஸ்யா.)].

உக்³க³ண்ஹாபேய்யாதி அஞ்ஞம் கா³ஹாபேதி நிஸ்ஸக்³கி³யம் பாசித்தியம் [நிஸ்ஸக்³கி³யம் ஹோதி (ஸ்யா.)].

உபனிக்கி²த்தம் வா ஸாதி³யேய்யாதி இத³ம் அய்யஸ்ஸ ஹோதூதி உபனிக்கி²த்தம் ஸாதி³யதி, நிஸ்ஸக்³கி³யம் ஹோதி. ஸங்க⁴மஜ்ஜே² நிஸ்ஸஜ்ஜிதப்³ப³ம். ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம் – தேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, ரூபியம் படிக்³க³ஹேஸிம். இத³ம் மே நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. ஸசே தத்த² ஆக³ச்ச²தி ஆராமிகோ வா உபாஸகோ வா ஸோ வத்தப்³போ³ – ‘‘ஆவுஸோ, இமம் ஜானாஹீ’’தி. ஸசே ஸோ ப⁴ணதி – ‘‘இமினா கிம் ஆஹரிய்யதூ’’தி, ந வத்தப்³போ³ – ‘‘இமம் வா இமம் வா ஆஹரா’’தி. கப்பியம் ஆசிக்கி²தப்³ப³ம் – ஸப்பி வா தேலம் வா மது⁴ வா பா²ணிதம் வா. ஸசே ஸோ தேன பரிவத்தேத்வா கப்பியம் ஆஹரதி ரூபியப்படிக்³கா³ஹகம் ட²பேத்வா ஸப்³பே³ஹேவ பரிபு⁴ஞ்ஜிதப்³ப³ம். ஏவஞ்சேதம் லபே⁴த², இச்சேதம் குஸலம்; நோ சே லபே⁴த², ஸோ வத்தப்³போ³ – ‘‘ஆவுஸோ, இமம் ச²ட்³டே³ஹீ’’தி. ஸசே ஸோ ச²ட்³டே³தி, இச்சேதம் குஸலம்; நோ சே ச²ட்³டே³தி, பஞ்சஹங்கே³ஹி ஸமன்னாக³தோ பி⁴க்கு² ரூபியச²ட்³ட³கோ ஸம்மன்னிதப்³போ³ – யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, ச²ட்³டி³தாச²ட்³டி³தஞ்ச ஜானேய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மம் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

585. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ரூபியச²ட்³ட³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² ரூபியச²ட்³ட³கோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

தேன ஸம்மதேன பி⁴க்கு²னா அனிமித்தம் கத்வா பாதேதப்³ப³ம். ஸசே நிமித்தம் கத்வா பாதேதி, ஆபத்தி து³க்கடஸ்ஸ.

586. ரூபியே ரூபியஸஞ்ஞீ ரூபியம் படிக்³க³ண்ஹாதி, நிஸ்ஸக்³கி³யம் பாசித்தியம். ரூபியே வேமதிகோ ரூபியம் படிக்³க³ண்ஹாதி, நிஸ்ஸக்³கி³யம் பாசித்தியம். ரூபியே அரூபியஸஞ்ஞீ ரூபியம் படிக்³க³ண்ஹாதி, நிஸ்ஸக்³கி³யம் பாசித்தியம்.

அரூபியே ரூபியஸஞ்ஞீ, ஆபத்தி து³க்கடஸ்ஸ. அரூபியே வேமதிகோ, ஆபத்தி து³க்கடஸ்ஸ. அரூபியே அரூபியஸஞ்ஞீ, அனாபத்தி.

அனாபத்தி அஜ்ஜா²ராமே வா அஜ்ஜா²வஸதே² வா உக்³க³ஹேத்வா வா உக்³க³ஹாபேத்வா வா நிக்கி²பதி – யஸ்ஸ ப⁴விஸ்ஸதி ஸோ ஹரிஸ்ஸதீதி, உம்மத்தகஸ்ஸ, ஆதி³கம்மிகஸ்ஸாதி.

ரூபியஸிக்கா²பத³ம் நிட்டி²தம் அட்ட²மம்.