1. பட²மகதி²னஸிக்கா²பத³ம்

இமே கோ² பனாயஸ்மந்தோ திம்ஸ நிஸ்ஸக்³கி³யா பாசித்தியா

த⁴ம்மா உத்³தே³ஸம் ஆக³ச்ச²ந்தி.

459. தேனே ஸமயேன பு³த்³தோ⁴ ப⁴க³வா வேஸாலியம் விஹரதி கோ³தமகே சேதியே. தேன கோ² பன ஸமயேன ப⁴க³வதா பி⁴க்கூ²னம் திசீவரம் அனுஞ்ஞாதம் ஹோதி. ச²ப்³ப³க்³கி³யா பி⁴க்கூ² – ‘‘ப⁴க³வதா திசீவரம் அனுஞ்ஞாத’’ந்தி அஞ்ஞேனேவ திசீவரேன கா³மம் பவிஸந்தி, அஞ்ஞேன திசீவரேன ஆராமே அச்ச²ந்தி, அஞ்ஞேன திசீவரேன நஹானம் ஓதரந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகசீவரம் தா⁴ரேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, அதிரேகசீவரம் தா⁴ரேதா²’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அதிரேகசீவரம் தா⁴ரேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

460. ‘‘யோ பன பி⁴க்கு² அதிரேகசீவரம் தா⁴ரேய்ய, நிஸ்ஸக்³கி³யம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

461. [மஹாவ. 347] தேன கோ² பன ஸமயேன ஆயஸ்மதோ ஆனந்த³ஸ்ஸ அதிரேகசீவரம் உப்பன்னம் ஹோதி. ஆயஸ்மா ச ஆனந்தோ³ தம் சீவரம் ஆயஸ்மதோ ஸாரிபுத்தஸ்ஸ தா³துகாமோ ஹோதி. ஆயஸ்மா ச ஸாரிபுத்தோ ஸாகேதே விஹரதி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வதா ஸிக்கா²பத³ம் பஞ்ஞத்தம் – ‘ந அதிரேகசீவரம் தா⁴ரேதப்³ப³’ந்தி. இத³ஞ்ச மே அதிரேகசீவரம் உப்பன்னம். அஹஞ்சிமம் சீவரம் ஆயஸ்மதோ ஸாரிபுத்தஸ்ஸ தா³துகாமோ. ஆயஸ்மா ச ஸாரிபுத்தோ ஸாகேதே விஹரதி. கத²ம் நு கோ² மயா படிபஜ்ஜிதப்³ப³’’ந்தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. ‘‘கீவசிரம் பனானந்த³, ஸாரிபுத்தோ ஆக³ச்சி²ஸ்ஸதீ’’தி? ‘‘நவமம் வா, ப⁴க³வா, தி³வஸம் த³ஸமம் வா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

462. ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே த³ஸாஹபரமம் அதிரேகசீவரம் தா⁴ரேதப்³ப³ம். தம் அதிக்காமயதோ நிஸ்ஸக்³கி³யம் பாசித்திய’’ந்தி.

463. நிட்டி²தசீவரஸ்மிந்தி பி⁴க்கு²னோ சீவரம் கதம் வா ஹோதி நட்ட²ம் வா வினட்ட²ம் வா த³ட்³ட⁴ம் வா சீவராஸா வா உபச்சி²ன்னா.

உப்³ப⁴தஸ்மிம் கதி²னேதி அட்ட²ன்னம் மாதிகானம் அஞ்ஞதராய மாதிகாய உப்³ப⁴தம் ஹோதி, ஸங்கே⁴ன வா அந்தரா உப்³ப⁴தம் ஹோதி.

த³ஸாஹபரமந்தி த³ஸாஹபரமதா தா⁴ரேதப்³ப³ம்.

அதிரேகசீவரம் நாம அனதி⁴ட்டி²தம் அவிகப்பிதம்.

சீவரம் நாம ச²ன்னம் சீவரானம் அஞ்ஞதரம் சீவரம், விகப்பனுபக³ம் பச்சி²மம்.

தம் அதிக்காமயதோ நிஸ்ஸக்³கி³யம் ஹோதீ [ஹோதீதி இத³ம் பத³ம் ஸப்³ப³போத்த²கேஸு அத்தி², ஸிக்கா²பதே³ பன நத்தி², ஏவமுபரிபி] தி ஏகாத³ஸே அருணுக்³க³மனே நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம். தேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘இத³ம் மே, ப⁴ந்தே, சீவரம் த³ஸாஹாதிக்கந்தம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. நிஸ்ஸட்ட²சீவரம் தா³தப்³ப³ம்.

464. ‘‘ஸுணாது மே, ப⁴ந்தே, ஸங்கோ⁴. இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஸங்க⁴ஸ்ஸ நிஸ்ஸட்ட²ம். யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யா’’தி.

465. தேன பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸு வசனீயா – ‘‘இத³ம் மே, ப⁴ந்தே, சீவரம் த³ஸாஹாதிக்கந்தம் நிஸ்ஸக்³கி³யம். இமாஹம் ஆயஸ்மந்தானம் நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. நிஸ்ஸட்ட²சீவரம் தா³தப்³ப³ம்.

466. ‘‘ஸுணந்து மே ஆயஸ்மந்தா. இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஆயஸ்மந்தானம் நிஸ்ஸட்ட²ம். யதா³யஸ்மந்தானம் பத்தகல்லம், ஆயஸ்மந்தா இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யு’’ந்தி.

467. தேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘இத³ம் மே, ஆவுஸோ, சீவரம் த³ஸாஹாதிக்கந்தம் நிஸ்ஸக்³கி³யம். இமாஹம் ஆயஸ்மதோ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. தேன பி⁴க்கு²னா ஆபத்தி படிக்³க³ஹேதப்³பா³. நிஸ்ஸட்ட²சீவரம் தா³தப்³ப³ம் – ‘‘இமம் சீவரம் ஆயஸ்மதோ த³ம்மீ’’தி.

468. த³ஸாஹாதிக்கந்தே அதிக்கந்தஸஞ்ஞீ, நிஸ்ஸக்³கி³யம் பாசித்தியம். த³ஸாஹாதிக்கந்தே வேமதிகோ, நிஸ்ஸக்³கி³யம் பாசித்தியம். த³ஸாஹாதிக்கந்தே அனதிக்கந்தஸஞ்ஞீ, நிஸ்ஸக்³கி³யம் பாசித்தியம். அனதி⁴ட்டி²தே அதி⁴ட்டி²தஸஞ்ஞீ, நிஸ்ஸக்³கி³யம் பாசித்தியம். அவிகப்பிதே விகப்பிதஸஞ்ஞீ, நிஸ்ஸக்³கி³யம் பாசித்தியம். அவிஸ்ஸஜ்ஜிதே விஸ்ஸஜ்ஜிதஸஞ்ஞீ, நிஸ்ஸக்³கி³யம் பாசித்தியம். அனட்டே² நட்ட²ஸஞ்ஞீ, நிஸ்ஸக்³கி³யம் பாசித்தியம். அவினட்டே² வினட்ட²ஸஞ்ஞீ, நிஸ்ஸக்³கி³யம் பாசித்தியம். அத³ட்³டே⁴ த³ட்³ட⁴ஸஞ்ஞீ, நிஸ்ஸக்³கி³யம் பாசித்தியம். அவிலுத்தே விலுத்தஸஞ்ஞீ, நிஸ்ஸக்³கி³யம் பாசித்தியம்.

நிஸ்ஸக்³கி³யம் சீவரம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. த³ஸாஹானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. த³ஸாஹானதிக்கந்தே வேமதிகோ, ஆபத்தி து³க்கடஸ்ஸ. த³ஸாஹானதிக்கந்தே அனதிக்கந்தஸஞ்ஞீ, அனாபத்தி.

469. அனாபத்தி அந்தோத³ஸாஹம் அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, உம்மத்தகஸ்ஸ, ஆதி³கம்மிகஸ்ஸாதி.

470. தேன கோ² பன ஸமயேன ச²ப்³ப³க்³கி³யா பி⁴க்கூ² நிஸ்ஸட்ட²சீவரம் ந தே³ந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, நிஸ்ஸட்ட²சீவரம் ந தா³தப்³ப³ம். யோ ந த³தே³ய்ய, ஆபத்தி து³க்கடஸ்ஸா’’தி.

கதி²னஸிக்கா²பத³ம் நிட்டி²தம் பட²மம்.