2. உதோ³ஸிதஸிக்கா²பத³ம்

471. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கூ² பி⁴க்கூ²னம் ஹத்தே² சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமந்தி. தானி சீவரானி சிரம் நிக்கி²த்தானி கண்ணகிதானி ஹோந்தி. தானி பி⁴க்கூ² ஓதாபேந்தி. அத்³த³ஸா கோ² ஆயஸ்மா ஆனந்தோ³ ஸேனாஸனசாரிகம் ஆஹிண்ட³ந்தோ தே பி⁴க்கூ² தானி சீவரானி ஓதாபேந்தே. தி³ஸ்வான யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘கஸ்ஸிமானி, ஆவுஸோ, சீவரானி கண்ணகிதானீ’’தி? அத² கோ² தே பி⁴க்கூ² ஆயஸ்மதோ ஆனந்த³ஸ்ஸ ஏதமத்த²ம் ஆரோசேஸும். ஆயஸ்மா ஆனந்தோ³ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கூ² பி⁴க்கூ²னம் ஹத்தே² சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமிஸ்ஸந்தீ’’தி! அத² கோ² ஆயஸ்மா ஆனந்தோ³ தே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸி…பே… ‘‘ஸச்சம் கிர, பி⁴க்க²வே, பி⁴க்கூ² பி⁴க்கூ²னம் ஹத்தே² சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா பி⁴க்கூ²னம் ஹத்தே² சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

472. ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே ஏகரத்தம்பி சே பி⁴க்கு² திசீவரேன விப்பவஸேய்ய, நிஸ்ஸக்³கி³யம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

473. தேன கோ² பன ஸமயேன அஞ்ஞதரோ பி⁴க்கு² கோஸம்பி³யம் கி³லானோ ஹோதி. ஞாதகா தஸ்ஸ பி⁴க்கு²னோ ஸந்திகே தூ³தம் பாஹேஸும் – ‘‘ஆக³ச்ச²து ப⁴த³ந்தோ, மயம், உபட்ட²ஹிஸ்ஸாமா’’தி. பி⁴க்கூ²பி ஏவமாஹம்ஸு – ‘‘க³ச்சா²வுஸோ, ஞாதகா தம் உபட்ட²ஹிஸ்ஸந்தீ’’தி. ஸோ ஏவமாஹ – ‘‘ப⁴க³வதாவுஸோ, ஸிக்கா²பத³ம் பஞ்ஞத்தம் – ‘ந திசீவரேன விப்பவஸிதப்³ப³’ந்தி. அஹஞ்சம்ஹி கி³லானோ. ந ஸக்கோமி திசீவரம் ஆதா³ய பக்கமிதும். நாஹம் க³மிஸ்ஸாமீ’’தி. ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ திசீவரேன அவிப்பவாஸஸம்முதிம் தா³தும். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, கி³லானோ. ந ஸக்கோமி திசீவரம் ஆதா³ய பக்கமிதும். ஸோஹம், ப⁴ந்தே, ஸங்க⁴ம் திசீவரேன அவிப்பவாஸஸம்முதிம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

474. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ. ந ஸக்கோதி திசீவரம் ஆதா³ய பக்கமிதும். ஸோ ஸங்க⁴ம் திசீவரேன அவிப்பவாஸஸம்முதிம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதிம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ. ந ஸக்கோதி திசீவரம் ஆதா³ய பக்கமிதும். ஸோ ஸங்க⁴ம் திசீவரேன அவிப்பவாஸஸம்முதிம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதிம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதியா தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ திசீவரேன அவிப்பவாஸஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

475. ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே ஏகரத்தம்பி சே பி⁴க்கு² திசீவரேன விப்பவஸேய்ய, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்திய’’ந்தி.

476. ‘‘நிட்டி²தசீவரஸ்மிந்தி பி⁴க்கு²னோ சீவரம் கதம் வா ஹோதி நட்ட²ம் வா வினட்ட²ம் வா த³ட்³ட⁴ம் வா சீவராஸா வா உபச்சி²ன்னா.

உப்³ப⁴தஸ்மிம் கதி²னேதி அட்ட²ன்னம் மாதிகானம் அஞ்ஞதராய மாதிகாய உப்³ப⁴தம் ஹோதி, ஸங்கே⁴ன வா அந்தரா உப்³ப⁴தம் ஹோதி.

ஏகரத்தம்பி சே பி⁴க்கு² திசீவரேன விப்பவஸேய்யாதி ஸங்கா⁴டியா வா உத்தராஸங்கே³ன வா அந்தரவாஸகேன வா.

அஞ்ஞத்ர பி⁴க்கு²ஸம்முதியாதி ட²பேத்வா பி⁴க்கு²ஸம்முதிம்.

நிஸ்ஸக்³கி³யம் ஹோதீதி ஸஹ அருணுக்³க³மனா [அருணுக்³க³மனேன (ஸீ. ஸ்யா.)] நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் ரத்திவிப்பவுத்த²ம் [ரத்திம் விப்பவுத்த²ம் (ஸீ.)] அஞ்ஞத்ர பி⁴க்கு²ஸம்முதியா நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

477. கா³மோ ஏகூபசாரோ நானூபசாரோ. நிவேஸனம் ஏகூபசாரம் நானூபசாரம். உதோ³ஸிதோ ஏகூபசாரோ நானூபசாரோ. அட்டோ ஏகூபசாரோ நானூபசாரோ. மாளோ ஏகூபசாரோ நானூபசாரோ. பாஸாதோ³ ஏகூபசாரோ நானூபசாரோ. ஹம்மியம் ஏகூபசாரம் நானூபசாரம். நாவா ஏகூபசாரா நானூபசாரா. ஸத்தோ² ஏகூபசாரோ நானூபசாரோ. கே²த்தம் ஏகூபசாரம் நானூபசாரம். த⁴ஞ்ஞகரணம் ஏகூபசாரம் நானூபசாரம். ஆராமோ ஏகூபசாரோ நானூபசாரோ. விஹாரோ ஏகூபசாரோ நானூபசாரோ. ருக்க²மூலம் ஏகூபசாரம் நானூபசாரம். அஜ்ஜோ²காஸோ ஏகூபசாரோ நானூபசாரோ.

478. கா³மோ ஏகூபசாரோ நாம ஏககுலஸ்ஸ கா³மோ ஹோதி பரிக்கி²த்தோ ச. அந்தோகா³மே சீவரம் நிக்கி²பித்வா அந்தோகா³மே வத்த²ப்³ப³ம். அபரிக்கி²த்தோ ஹோதி, யஸ்மிம் க⁴ரே சீவரம் நிக்கி²த்தம் ஹோதி தஸ்மிம் க⁴ரே வத்த²ப்³ப³ம், ஹத்த²பாஸா வா ந விஜஹிதப்³ப³ம்.

479. நானாகுலஸ்ஸ கா³மோ ஹோதி பரிக்கி²த்தோ ச. யஸ்மிம் க⁴ரே சீவரம் நிக்கி²த்தம் ஹோதி தஸ்மிம் க⁴ரே வத்த²ப்³ப³ம் ஸபா⁴யே வா த்³வாரமூலே வா, ஹத்த²பாஸா வா ந விஜஹிதப்³ப³ம். ஸபா⁴யம் க³ச்ச²ந்தேன ஹத்த²பாஸே சீவரம் நிக்கி²பித்வா ஸபா⁴யே வா வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம். ஸபா⁴யே சீவரம் நிக்கி²பித்வா ஸபா⁴யே வா வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம். அபரிக்கி²த்தோ ஹோதி, யஸ்மிம் க⁴ரே சீவரம் நிக்கி²த்தம் ஹோதி தஸ்மிம் க⁴ரே வத்த²ப்³ப³ம், ஹத்த²பாஸா வா ந விஜஹிதப்³ப³ம்.

480. ஏககுலஸ்ஸ நிவேஸனம் ஹோதி பரிக்கி²த்தஞ்ச, நானாக³ப்³பா⁴ நானாஓவரகா. அந்தோனிவேஸனே சீவரம் நிக்கி²பித்வா அந்தோனிவேஸனே வத்த²ப்³ப³ம். அபரிக்கி²த்தம் ஹோதி, யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம், ஹத்த²பாஸா வா ந விஜஹிதப்³ப³ம்.

481. நானாகுலஸ்ஸ நிவேஸனம் ஹோதி பரிக்கி²த்தஞ்ச, நானாக³ப்³பா⁴ நானாஓவரகா. யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம். அபரிக்கி²த்தம் ஹோதி, யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம், ஹத்த²பாஸா வா ந விஜஹிதப்³ப³ம்.

482. ஏககுலஸ்ஸ உதோ³ஸிதோ ஹோதி பரிக்கி²த்தோ ச, நானாக³ப்³பா⁴ நானாஓவரகா. அந்தோஉதோ³ஸிதே சீவரம் நிக்கி²பித்வா அந்தோஉதோ³ஸிதே வத்த²ப்³ப³ம். அபரிக்கி²த்தோ ஹோதி, யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம், ஹத்த²பாஸா வா ந விஜஹிதப்³ப³ம்.

483. நானாகுலஸ்ஸ உதோ³ஸிதோ ஹோதி பரிக்கி²த்தோ ச, நானாக³ப்³பா⁴ நானாஓவரகா. யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம். அபரிக்கி²த்தோ ஹோதி, யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம், ஹத்த²பாஸா வா ந விஜஹிதப்³ப³ம்.

484. ஏககுலஸ்ஸ அட்டோ ஹோதி, அந்தோஅட்டே சீவரம் நிக்கி²பித்வா அந்தோஅட்டே வத்த²ப்³ப³ம். நானாகுலஸ்ஸ அட்டோ ஹோதி, நானாக³ப்³பா⁴ நானாஓவரகா. யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம்.

485. ஏககுலஸ்ஸ மாளோ ஹோதி, அந்தோமாளே சீவரம் நிக்கி²பித்வா அந்தோமாளே வத்த²ப்³ப³ம். நானாகுலஸ்ஸ மாளோ ஹோதி நானாக³ப்³பா⁴ நானாஓவரகா, யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம்.

486. ஏககுலஸ்ஸ பாஸாதோ³ ஹோதி, அந்தோபாஸாதே³ சீவரம் நிக்கி²பித்வா அந்தோபாஸாதே³ வத்த²ப்³ப³ம். நானாகுலஸ்ஸ பாஸாதோ³ ஹோதி, நானாக³ப்³பா⁴ நானாஓவரகா. யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம்.

487. ஏககுலஸ்ஸ ஹம்மியம் ஹோதி. அந்தோஹம்மியே சீவரம் நிக்கி²பித்வா அந்தோஹம்மியே வத்த²ப்³ப³ம். நானாகுலஸ்ஸ ஹம்மியம் ஹோதி, நானாக³ப்³பா⁴ நானாஓவரகா. யஸ்மிம் க³ப்³பே⁴ சீவரம் நிக்கி²த்தம் ஹோதி தஸ்மிம் க³ப்³பே⁴ வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம்.

488. ஏககுலஸ்ஸ நாவா ஹோதி. அந்தோனாவாய சீவரம் நிக்கி²பித்வா அந்தோனாவாய வத்த²ப்³ப³ம். நானாகுலஸ்ஸ நாவா ஹோதி நானாக³ப்³பா⁴ நானாஓவரகா. யஸ்மிம் ஓவரகே சீவரம் நிக்கி²த்தம் ஹோதி தஸ்மிம் ஓவரகே வத்த²ப்³ப³ம், ஹத்த²பாஸா வா ந விஜஹிதப்³ப³ம்.

489. ஏககுலஸ்ஸ ஸத்தோ² ஹோதி. ஸத்தே² சீவரம் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரம் ந விஜஹிதப்³ப³ம். நானாகுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா ஹத்த²பாஸா ந விஜஹிதப்³ப³ம்.

490. ஏககுலஸ்ஸ கே²த்தம் ஹோதி பரிக்கி²த்தஞ்ச. அந்தோகே²த்தே சீவரம் நிக்கி²பித்வா அந்தோகே²த்தே வத்த²ப்³ப³ம். அபரிக்கி²த்தம் ஹோதி, ஹத்த²பாஸா ந விஜஹிதப்³ப³ம். நானாகுலஸ்ஸ கே²த்தம் ஹோதி பரிக்கி²த்தஞ்ச. அந்தோகே²த்தே சீவரம் நிக்கி²பித்வா த்³வாரமூலே வா வத்த²ப்³ப³ம், ஹத்த²பாஸா வா ந விஜஹிதப்³ப³ம். அபரிக்கி²த்தம் ஹோதி, ஹத்த²பாஸா ந விஜஹிதப்³ப³ம்.

491. ஏககுலஸ்ஸ த⁴ஞ்ஞகரணம் ஹோதி பரிக்கி²த்தஞ்ச. அந்தோத⁴ஞ்ஞகரணே சீவரம் நிக்கி²பித்வா அந்தோத⁴ஞ்ஞகரணே வத்த²ப்³ப³ம். அபரிக்கி²த்தம் ஹோதி, ஹத்த²பாஸா ந விஜஹிதப்³ப³ம். நானாகுலஸ்ஸ த⁴ஞ்ஞகரணம் ஹோதி பரிக்கி²த்தஞ்ச. அந்தோத⁴ஞ்ஞகரணே சீவரம் நிக்கி²பித்வா த்³வாரமூலே வா வத்த²ப்³ப³ம், ஹத்த²பாஸா வா ந விஜஹிதப்³ப³ம். அபரிக்கி²த்தம் ஹோதி, ஹத்த²பாஸா ந விஜஹிதப்³ப³ம்.

492. ஏககுலஸ்ஸ ஆராமோ ஹோதி பரிக்கி²த்தோ ச. அந்தோஆராமே சீவரம் நிக்கி²பித்வா அந்தோஆராமே வத்த²ப்³ப³ம். அபரிக்கி²த்தோ ஹோதி, ஹத்த²பாஸா ந விஜஹிதப்³ப³ம். நானாகுலஸ்ஸ ஆராமோ ஹோதி பரிக்கி²த்தோ ச. அந்தோஆராமே சீவரம் நிக்கி²பித்வா த்³வாரமூலே வா வத்த²ப்³ப³ம், ஹத்த²பாஸா வா ந விஜஹிதப்³ப³ம். அபரிக்கி²த்தோ ஹோதி, ஹத்த²பாஸா ந விஜஹிதப்³ப³ம்.

493. ஏககுலஸ்ஸ விஹாரோ ஹோதி பரிக்கி²த்தோ ச. அந்தோவிஹாரே சீவரம் நிக்கி²பித்வா அந்தோவிஹாரே வத்த²ப்³ப³ம். அபரிக்கி²த்தோ ஹோதி, யஸ்மிம் விஹாரே சீவரம் நிக்கி²த்தம் ஹோதி தஸ்மிம் விஹாரே வத்த²ப்³ப³ம், ஹத்த²பாஸா வா ந விஜஹிதப்³ப³ம். நானாகுலஸ்ஸ விஹாரோ ஹோதி பரிக்கி²த்தோ ச. யஸ்மிம் விஹாரே சீவரம் நிக்கி²த்தம் ஹோதி தஸ்மிம் விஹாரே வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம். அபரிக்கி²த்தோ ஹோதி, யஸ்மிம் விஹாரே சீவரம் நிக்கி²த்தம் ஹோதி தஸ்மிம் விஹாரே வத்த²ப்³ப³ம், ஹத்த²பாஸா வா ந விஜஹிதப்³ப³ம்.

494. ஏககுலஸ்ஸ ருக்க²மூலம் ஹோதி, யம் மஜ்ஜ²ன்ஹிகே காலே ஸமந்தா சா²யா ப²ரதி, அந்தோசா²யாய சீவரம் நிக்கி²பித்வா அந்தோசா²யாய வத்த²ப்³ப³ம். நானாகுலஸ்ஸ ருக்க²மூலம் ஹோதி, ஹத்த²பாஸா ந விஜஹிதப்³ப³ம்.

அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரம் நானூபசாரோ.

495. விப்பவுத்தே² விப்பவுத்த²ஸஞ்ஞீ அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். விப்பவுத்தே² வேமதிகோ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். விப்பவுத்தே² அவிப்பவுத்த²ஸஞ்ஞீ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம். அப்பச்சுத்³த⁴டே பச்சுத்³த⁴டஸஞ்ஞீ…பே… அவிஸ்ஸஜ்ஜிதே விஸ்ஸஜ்ஜிதஸஞ்ஞீ… அனட்டே² நட்ட²ஸஞ்ஞீ… அவினட்டே² வினட்ட²ஸஞ்ஞீ… அத³ட்³டே⁴ த³ட்³ட⁴ஸஞ்ஞீ…பே… அவிலுத்தே விலுத்தஸஞ்ஞீ, அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம்.

நிஸ்ஸக்³கி³யம் சீவரம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. அவிப்பவுத்தே² விப்பவுத்த²ஸஞ்ஞீ, ஆபத்தி து³க்கடஸ்ஸ. அவிப்பவுத்தே² வேமதிகோ, ஆபத்தி து³க்கடஸ்ஸ. அவிப்பவுத்தே² அவிப்பவுத்த²ஸஞ்ஞீ, அனாபத்தி.

496. அனாபத்தி அந்தோஅருணே பச்சுத்³த⁴ரதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, பி⁴க்கு²ஸம்முதியா, உம்மத்தகஸ்ஸ, ஆதி³கம்மிகஸ்ஸாதி.

உதோ³ஸிதஸிக்கா²பத³ம் நிட்டி²தம் து³தியம்.