7. ஏளகலோமதோ⁴வாபனஸிக்கா²பத³ம்

576. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னீஹி ஏளகலோமானி தோ⁴வாபேந்திபி ரஜாபேந்திபி விஜடாபேந்திபி. பி⁴க்கு²னியோ ஏளகலோமானி தோ⁴வந்தியோ ரஜந்தியோ விஜடேந்தியோ ரிஞ்சந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞம். அத² கோ² மஹாபஜாபதி கோ³தமீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தம் கோ² மஹாபஜாபதிம் கோ³தமிம் ப⁴க³வா ஏதத³வோச – ‘‘கச்சி, கோ³தமி, பி⁴க்கு²னியோ அப்பமத்தா ஆதாபினியோ பஹிதத்தா விஹரந்தீ’’தி? ‘‘குதோ, ப⁴ந்தே, பி⁴க்கு²னீனம் அப்பமாதோ³! அய்யா ச²ப்³ப³க்³கி³யா பி⁴க்கு²னீஹி ஏளகலோமானி தோ⁴வாபேந்திபி ரஜாபேந்திபி விஜடாபேந்திபி. பி⁴க்கு²னியோ ஏளகலோமானி தோ⁴வந்தியோ ரஜந்தியோ விஜடேந்தியோ ரிஞ்சந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞ’’ந்தி.

அத² கோ² ப⁴க³வா மஹாபஜாபதிம் கோ³தமிம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² மஹாபஜாபதி கோ³தமீ ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ச²ப்³ப³க்³கி³யே பி⁴க்கூ² படிபுச்சி² – ‘‘ஸச்சம் கிர தும்ஹே, பி⁴க்க²வே, பி⁴க்கு²னீஹி ஏளகலோமானி தோ⁴வாபேத²பி ரஜாபேத²பி விஜடாபேத²பீ’’தி? ‘‘ஸச்சம், ப⁴க³வா’’தி. ‘‘ஞாதிகாயோ தும்ஹாகம், பி⁴க்க²வே, அஞ்ஞாதிகாயோ’’தி? ‘‘அஞ்ஞாதிகாயோ, ப⁴க³வா’’தி. ‘‘அஞ்ஞாதகா, மோக⁴புரிஸா, அஞ்ஞாதிகானம் ந ஜானந்தி பதிரூபம் வா அப்பதிரூபம் வா பாஸாதி³கம் வா அபாஸாதி³கம். தத்த² நாம தும்ஹே, மோக⁴புரிஸா, அஞ்ஞாதிகாஹி பி⁴க்கு²னீஹி ஏளகலோமானி தோ⁴வாபேஸ்ஸத²பி ரஜாபேஸ்ஸத²பி விஜடாபேஸ்ஸத²பி! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

577. ‘‘யோ பன பி⁴க்கு² அஞ்ஞாதிகாய பி⁴க்கு²னியா ஏளகலோமானி தோ⁴வாபேய்ய வா ரஜாபேய்ய வா விஜடாபேய்ய வா, நிஸ்ஸக்³கி³யம் பாசித்திய’’ந்தி.

578. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

பி⁴க்கு²னீ நாம உப⁴தோஸங்கே⁴ உபஸம்பன்னா.

தோ⁴வாதி ஆணாபேதி, ஆபத்தி து³க்கடஸ்ஸ. தோ⁴தானி நிஸ்ஸக்³கி³யானி ஹோந்தி. ரஜாதி ஆணாபேதி, ஆபத்தி து³க்கடஸ்ஸ. ரத்தானி நிஸ்ஸக்³கி³யானி ஹோந்தி. விஜடேஹீதி ஆணாபேதி, ஆபத்தி து³க்கடஸ்ஸ. விஜடிதானி நிஸ்ஸக்³கி³யானி ஹோந்தி. நிஸ்ஸஜ்ஜிதப்³பா³னி ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³பா³னி…பே… இமானி மே, ப⁴ந்தே, ஏளகலோமானி அஞ்ஞாதிகாய பி⁴க்கு²னியா தோ⁴வாபிதானி நிஸ்ஸக்³கி³யானி. இமானாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

579. அஞ்ஞாதிகாய அஞ்ஞாதிகஸஞ்ஞீ ஏளகலோமானி தோ⁴வாபேதி, நிஸ்ஸக்³கி³யம் பாசித்தியம். அஞ்ஞாதிகாய அஞ்ஞாதிகஸஞ்ஞீ ஏளகலோமானி தோ⁴வாபேதி ரஜாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி தோ⁴வாபேதி விஜடாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி தோ⁴வாபேதி ரஜாபேதி விஜடாபேதி, நிஸ்ஸக்³கி³யேன ஆபத்தி த்³வின்னம் து³க்கடானம்.

அஞ்ஞாதிகாய அஞ்ஞாதிகஸஞ்ஞீ ஏளகலோமானி ரஜாபேதி, நிஸ்ஸக்³கி³யம் பாசித்தியம். அஞ்ஞாதிகாய அஞ்ஞாதிகஸஞ்ஞீ ஏளகலோமானி ரஜாபேதி விஜடாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி ரஜாபேதி தோ⁴வாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி ரஜாபேதி விஜடாபேதி தோ⁴வாபேதி, நிஸ்ஸக்³கி³யேன ஆபத்தி த்³வின்னம் து³க்கடானம்.

அஞ்ஞாதிகாய அஞ்ஞாதிகஸஞ்ஞீ ஏளகலோமானி விஜடாபேதி, நிஸ்ஸக்³கி³யம் பாசித்தியம். அஞ்ஞாதிகாய அஞ்ஞாதிகஸஞ்ஞீ ஏளகலோமானி விஜடாபேதி தோ⁴வாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி விஜடாபேதி ரஜாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ ஏளகலோமானி விஜடாபேதி தோ⁴வாபேதி ரஜாபேதி, நிஸ்ஸக்³கி³யேன ஆபத்தி த்³வின்னம் து³க்கடானம்.

580. அஞ்ஞாதிகாய வேமதிகோ…பே… அஞ்ஞாதிகாய ஞாதிகஸஞ்ஞீ…பே… அஞ்ஞஸ்ஸ ஏளகலோமானி தோ⁴வாபேதி, ஆபத்தி து³க்கடஸ்ஸ. ஏகதோ உபஸம்பன்னாய தோ⁴வாபேதி, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.

581. அனாபத்தி ஞாதிகாய தா⁴வந்தியா அஞ்ஞாதிகா து³தியா ஹோதி, அவுத்தா தோ⁴வதி, அபரிபு⁴த்தம் கதப⁴ண்ட³ம் தோ⁴வாபேதி, ஸிக்க²மானாய ஸாமணேரியா உம்மத்தகஸ்ஸ ஆதி³கம்மிகஸ்ஸாதி.

ஏளகலோமதோ⁴வாபனஸிக்கா²பத³ம் நிட்டி²தம் ஸத்தமம்.