1. பட²மஅனியதஸிக்கா²பத³ம்

இமே கோ² பனாயஸ்மந்தோ த்³வே அனியதா த⁴ம்மா

உத்³தே³ஸம் ஆக³ச்ச²ந்தி.

443. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ ஸாவத்தி²யம் குலூபகோ ஹோதி, ப³ஹுகானி குலானி உபஸங்கமதி. தேன கோ² பன ஸமயேன ஆயஸ்மதோ உதா³யிஸ்ஸ உபட்டா²ககுலஸ்ஸ குமாரிகா அஞ்ஞதரஸ்ஸ குலஸ்ஸ குமாரகஸ்ஸ தி³ன்னா ஹோதி. அத² கோ² ஆயஸ்மா உதா³யீ புப்³ப³ண்ஹஸமயம் நிவாஸேத்வா பத்தசீவரமாதா³ய யேன தம் குலம் தேனுபஸங்கமி; உபஸங்கமித்வா மனுஸ்ஸே புச்சி² – ‘‘கஹம் இத்த²ன்னாமா’’தி? தே ஏவமாஹம்ஸு – ‘‘தி³ன்னா, ப⁴ந்தே, அமுகஸ்ஸ குலஸ்ஸ குமாரகஸ்ஸா’’தி. தம்பி கோ² குலம் ஆயஸ்மதோ உதா³யிஸ்ஸ உபட்டா²கம் ஹோதி. அத² கோ² ஆயஸ்மா உதா³யீ யேன தம் குலம் தேனுபஸங்கமி; உபஸங்கமித்வா மனுஸ்ஸே புச்சி² – ‘‘கஹம் இத்த²ன்னாமா’’தி? தே ஏவமாஹம்ஸு – ‘‘ஏஸாய்ய, ஓவரகே நிஸின்னா’’தி. அத² கோ² ஆயஸ்மா உதா³யீ யேன ஸா குமாரிகா தேனுபஸங்கமி; உபஸங்கமித்வா தஸ்ஸா குமாரிகாய ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேஸி காலயுத்தம் ஸமுல்லபந்தோ காலயுத்தம் த⁴ம்மம் ப⁴ணந்தோ.

தேன கோ² பன ஸமயேன விஸாகா² மிகா³ரமாதா ப³ஹுபுத்தா ஹோதி ப³ஹுனத்தா அரோக³புத்தா அரோக³னத்தா அபி⁴மங்க³லஸம்மதா. மனுஸ்ஸா யஞ்ஞேஸு ச²ணேஸு உஸ்ஸவேஸு விஸாக²ம் மிகா³ரமாதரம் பட²மம் போ⁴ஜேந்தி. அத² கோ² விஸாகா² மிகா³ரமாதா நிமந்திதா தம் குலம் அக³மாஸி. அத்³த³ஸா கோ² விஸாகா² மிகா³ரமாதா ஆயஸ்மந்தம் உதா³யிம் தஸ்ஸா குமாரிகாய ஸத்³தி⁴ம் ஏகம் ஏகாய ரஹோ படிச்ச²ன்னே ஆஸனே அலம்கம்மனியே நிஸின்னம். தி³ஸ்வான ஆயஸ்மந்தம் உதா³யிம் ஏதத³வோச – ‘‘இத³ம், ப⁴ந்தே, நச்ச²ன்னம் நப்பதிரூபம் யம் அய்யோ மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேதி. கிஞ்சாபி, ப⁴ந்தே, அய்யோ அனத்தி²கோ தேன த⁴ம்மேன, அபிச து³ஸ்ஸத்³தா⁴பயா அப்பஸன்னா மனுஸ்ஸா’’தி. ஏவம்பி கோ² ஆயஸ்மா உதா³யீ விஸாகா²ய மிகா³ரமாதுயா வுச்சமானோ நாதி³யி. அத² கோ² விஸாகா² மிகா³ரமாதா நிக்க²மித்வா பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உதா³யி, மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

444. ‘‘யோ பன பி⁴க்கு² மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேய்ய, தமேனம் ஸத்³தே⁴ய்யவசஸா உபாஸிகா தி³ஸ்வா திண்ணம் த⁴ம்மானம் அஞ்ஞதரேன வதே³ய்ய – பாராஜிகேன வா ஸங்கா⁴தி³ஸேஸேன வா பாசித்தியேன வா, நிஸஜ்ஜம் பி⁴க்கு² படிஜானமானோ திண்ணம் த⁴ம்மானம் அஞ்ஞதரேன காரேதப்³போ³ – பாராஜிகேன வா ஸங்கா⁴தி³ஸேஸேன வா பாசித்தியேன வா யேன வா ஸா ஸத்³தே⁴ய்யவசஸா உபாஸிகா வதே³ய்ய, தேன ஸோ பி⁴க்கு² காரேதப்³போ³. அயம் த⁴ம்மோ அனியதோ’’தி.

445. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா. அந்தமஸோ தத³ஹுஜாதாபி தா³ரிகா, பகே³வ மஹத்தரீ.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி மாதுகா³மோ ச.

ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோநாம ந ஸக்கா ஹோதி அக்கி²ம் வா நிக²ணீயமானே ப⁴முகம் வா உக்கி²பீயமானே ஸீஸம் வா உக்கி²பீயமானே பஸ்ஸிதும். ஸோதஸ்ஸ ரஹோநாம ந ஸக்கா ஹோதி பகதிகதா² ஸோதும்.

படிச்ச²ன்னம் நாம ஆஸனம் குட்டேன வா [குட்³டே³ன வா (ஸீ. ஸ்யா.)] கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா வா யேன கேனசி படிச்ச²ன்னம் ஹோதி.

அலம்கம்மனியேதி ஸக்கா ஹோதி மேது²னம் த⁴ம்மம் படிஸேவிதும்.

நிஸஜ்ஜம் கப்பேய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா. உபோ⁴ வா நிஸின்னா ஹோந்தி உபோ⁴ வா நிபன்னா.

ஸத்³தே⁴ய்யவசஸா நாம ஆக³தப²லா அபி⁴ஸமேதாவினீ விஞ்ஞாதஸாஸனா.

உபாஸிகா நாம பு³த்³த⁴ம் ஸரணம் க³தா, த⁴ம்மம் ஸரணம் க³தா, ஸங்க⁴ம் ஸரணம் க³தா.

தி³ஸ்வாதி பஸ்ஸித்வா.

திண்ணம் த⁴ம்மானம் அஞ்ஞதரேன வதே³ய்ய – பாராஜிகேன வா ஸங்கா⁴தி³ஸேஸேன வா பாசித்தியேன வா. நிஸஜ்ஜம் பி⁴க்கு² படிஜானமானோ திண்ணம் த⁴ம்மானம் அஞ்ஞதரேன காரேதப்³போ³ – பாராஜிகேன வா ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தே⁴ய்யவசஸா உபாஸிகா வதே³ய்ய தேன ஸோ பி⁴க்கு² காரேதப்³போ³.

446. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ ச தம் படிஜானாதி, ஆபத்தியா காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘ஸச்சாஹம் நிஸின்னோ, நோ ச கோ² மேது²னம் த⁴ம்மம் படிஸேவி’’ந்தி, நிஸஜ்ஜாய காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘நாஹம் நிஸின்னோ, அபிச கோ² நிபன்னோ’’தி, நிபஜ்ஜாய காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘நாஹம் நிஸின்னோ அபிச கோ² டி²தோ’’தி, ந காரேதப்³போ³.

447. ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ ச தம் படிஜானாதி, ஆபத்தியா காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘ஸச்சாஹம் நிபன்னோ, நோ ச கோ² மேது²னம் த⁴ம்மம் படிஸேவி’’ந்தி, நிபஜ்ஜாய காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘நாஹம் நிபன்னோ, அபிச கோ² நிஸின்னோ’’தி, நிஸஜ்ஜாய காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னம் த⁴ம்மம் படிஸேவந்தோ’’தி, ஸோ சே ஏவம் வதே³ய்ய – ‘‘நாஹம் நிபன்னோ அபிச கோ² டி²தோ’’தி, ந காரேதப்³போ³.

448. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’தி, ஸோ ச தம் படிஜானாதி, ஆபத்தியா காரேதப்³போ³…பே… ஸச்சாஹம் நிஸின்னோ நோ ச கோ² காயஸம்ஸக்³க³ம் ஸமாபஜ்ஜிந்தி, நிஸஜ்ஜாய காரேதப்³போ³…பே… நாஹம் நிஸின்னோ அபிச கோ² நிபன்னோதி, நிபஜ்ஜாய காரேதப்³போ³…பே… நாஹம் நிஸின்னோ அபிச கோ² டி²தோதி, ந காரேதப்³போ³.

ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’தி, ஸோ ச தம் படிஜானாதி, ஆபத்தியா காரேதப்³போ³…பே… ஸச்சாஹம் நிபன்னோ, நோ ச கோ² காயஸம்ஸக்³க³ம் ஸமாபஜ்ஜிந்தி, நிபஜ்ஜாய காரேதப்³போ³…பே… நாஹம் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே… நாஹம் நிபன்னோ, அபிச கோ² டி²தோதி, ந காரேதப்³போ³.

449. ஸா சே ஏவம் வதே³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸின்னோ’’தி, ஸோ ச தம் படிஜானாதி, நிஸஜ்ஜாய காரேதப்³போ³…பே… நாஹம் நிஸின்னோ அபிச கோ² நிபன்னோதி, நிபஜ்ஜாய காரேதப்³போ³…பே… நாஹம் நிஸின்னோ, அபிச கோ² டி²தோதி, ந காரேதப்³போ³.

450. ஸா சே ஏவம் வதே³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிபன்னோ’’தி, ஸோ ச தம் படிஜானாதி, நிபஜ்ஜாய காரேதப்³போ³…பே… நாஹம் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே… நாஹம் நிபன்னோ, அபிச கோ² டி²தோதி, ந காரேதப்³போ³.

அனியதோதி ந நியதோ, பாராஜிகம் வா ஸங்கா⁴தி³ஸேஸோ வா பாசித்தியம் வா.

451. க³மனம் படிஜானாதி, நிஸஜ்ஜம் படிஜானாதி, ஆபத்திம் படிஜானாதி, ஆபத்தியா காரேதப்³போ³. க³மனம் படிஜானாதி, நிஸஜ்ஜம் ந படிஜானாதி, ஆபத்திம் படிஜானாதி, ஆபத்தியா காரேதப்³போ³. க³மனம் படிஜானாதி, நிஸஜ்ஜம் படிஜானாதி, ஆபத்திம் ந படிஜானாதி, நிஸஜ்ஜாய காரேதப்³போ³. க³மனம் படிஜானாதி, நிஸஜ்ஜம் ந படிஜானாதி, ஆபத்திம் ந படிஜானாதி, ந காரேதப்³போ³.

க³மனம் ந படிஜானாதி, நிஸஜ்ஜம் படிஜானாதி, ஆபத்திம் படிஜானாதி, ஆபத்தியா

காரேதப்³போ³. க³மனம் ந படிஜானாதி, நிஸஜ்ஜம் ந படிஜானாதி, ஆபத்திம் படிஜானாதி, ஆபத்தியா காரேதப்³போ³. க³மனம் ந படிஜானாதி, நிஸஜ்ஜம் படிஜானாதி, ஆபத்திம் ந படிஜானாதி, நிஸஜ்ஜாய காரேதப்³போ³. க³மனம் ந படிஜானாதி, நிஸஜ்ஜம் ந படிஜானாதி, ஆபத்திம் ந படிஜானாதி, ந காரேதப்³போ³தி.

பட²மோ அனியதோ நிட்டி²தோ.