2. து³தியஅனியதஸிக்கா²பத³ம்

452. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ – ‘‘ப⁴க³வதா படிக்கி²த்தம் மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேது’’ந்தி தஸ்ஸாயேவ குமாரிகாய ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸி காலயுத்தம் ஸமுல்லபந்தோ காலயுத்தம் த⁴ம்மம் ப⁴ணந்தோ. து³தியம்பி கோ² விஸாகா² மிகா³ரமாதா நிமந்திதா தம் குலம் அக³மாஸி. அத்³த³ஸா கோ² விஸாகா² மிகா³ரமாதா ஆயஸ்மந்தம் உதா³யிம் தஸ்ஸாயேவ குமாரிகாய ஸத்³தி⁴ம் ஏகம் ஏகாய ரஹோ நிஸின்னம். தி³ஸ்வான ஆயஸ்மந்தம் உதா³யிம் ஏதத³வோச – ‘‘இத³ம், ப⁴ந்தே, நச்ச²ன்னம் நப்பதிரூபம் யம் அய்யோ மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேதி. கிஞ்சாபி, ப⁴ந்தே, அய்யோ அனத்தி²கோ தேன த⁴ம்மேன, அபிச து³ஸ்ஸத்³தா⁴பயா அப்பஸன்னா மனுஸ்ஸா’’தி. ஏவம்பி கோ² ஆயஸ்மா உதா³யீ விஸாகா²ய மிகா³ரமாதுயா வுச்சமானோ நாதி³யி. அத² கோ² விஸாகா² மிகா³ரமாதா நிக்க²மித்வா பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும் …பே… ‘‘ஸச்சம் கிர த்வம், உதா³யி, மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

453. ‘‘ந ஹேவ கோ² பன படிச்ச²ன்னம் ஆஸனம் ஹோதி நாலம் கம்மனியம், அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிதும். யோ பன பி⁴க்கு² ததா²ரூபே ஆஸனே மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேய்ய, தமேனம் ஸத்³தே⁴ய்யவசஸா உபாஸிகா தி³ஸ்வா த்³வின்னம் த⁴ம்மானம் அஞ்ஞதரேன வதே³ய்ய – ஸங்கா⁴தி³ஸேஸேன வா பாசித்தியேன வா. நிஸஜ்ஜம் பி⁴க்கு² படிஜானமானோ த்³வின்னம் த⁴ம்மானம் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தே⁴ய்யவசஸா உபாஸிகா வதே³ய்ய தேன ஸோ பி⁴க்கு² காரேதப்³போ³. அயம்பி த⁴ம்மோ அனியதோ’’தி.

454. ந ஹேவ கோ² பன படிச்ச²ன்னம் ஆஸனம் ஹோதீதி அப்படிச்ச²ன்னம் ஹோதி குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா வா யேன கேனசி அப்படிச்ச²ன்னம் ஹோதி.

நாலம் கம்மனியந்தி ந ஸக்கா ஹோதி மேது²னம் த⁴ம்மம் படிஸேவிதும்.

அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிதுந்தி ஸக்கா ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிதும்.

யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ததா²ரூபே ஆஸனேதி ஏவரூபே ஆஸனே.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதம் து³ட்டு²ல்லாது³ட்டு²ல்லம் ஆஜானிதும்.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி மாதுகா³மோ ச.

ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ம் வா நிக²ணீயமானே ப⁴முகம் வா உக்கி²பீயமானே ஸீஸம் வா உக்கி²பீயமானே பஸ்ஸிதும். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதும்.

நிஸஜ்ஜம் கப்பேய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா. உபோ⁴ வா நிஸின்னா ஹோந்தி உபோ⁴ வா நிபன்னா.

ஸத்³தே⁴ய்யவசஸா நாம ஆக³தப²லா அபி⁴ஸமேதாவினீ விஞ்ஞாதஸாஸனா.

உபாஸிகா நாம பு³த்³த⁴ம் ஸரணம் க³தா, த⁴ம்மம் ஸரணம் க³தா, ஸங்க⁴ம் ஸரணம் க³தா.

தி³ஸ்வாதி பஸ்ஸித்வா.

த்³வின்னம் த⁴ம்மானம் அஞ்ஞதரேன வதே³ய்ய ஸங்கா⁴தி³ஸேஸேன வா பாசித்தியேன வா. நிஸஜ்ஜம் பி⁴க்கு² படிஜானமானோ த்³வின்னம் த⁴ம்மானம் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தே⁴ய்யவசஸா உபாஸிகா வதே³ய்ய, தேன ஸோ பி⁴க்கு² காரேதப்³போ³.

455. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’தி, ஸோ ச தம் படிஜானாதி, ஆபத்தியா காரேதப்³போ³. ஸா சே ஏவம் வதே³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’தி, ஸோ சே ஏவம் வதே³ய்ய – ‘‘ஸச்சாஹம் நிஸின்னோ, நோ ச கோ² காயஸம்ஸக்³க³ம் ஸமாபஜ்ஜி’’ந்தி, நிஸஜ்ஜாய காரேதப்³போ³…பே… நாஹம் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே… நாஹம் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவம் வதே³ய்ய – ‘‘அய்யோ மயா தி³ட்டோ² நிபன்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’தி, ஸோ ச தம் படிஜானாதி, ஆபத்தியா காரேதப்³போ³…பே… ஸச்சாஹம் நிபன்னோ, நோ ச கோ² காயஸம்ஸக்³க³ம் ஸமாபஜ்ஜிந்தி, நிபஜ்ஜாய காரேதப்³போ³…பே… நாஹம் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³ …பே… நாஹம் நிபன்னோ, அபிச கோ² டி²தோதி, ந காரேதப்³போ³.

ஸா சே ஏவம் வதே³ய்ய – ‘‘அய்யஸ்ஸ மயா ஸுதம் நிஸின்னஸ்ஸ மாதுகா³மம் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தம் படிஜானாதி, ஆபத்தியா காரேதப்³போ³. ஸா சே ஏவம் வதே³ய்ய – ‘‘அய்யஸ்ஸ மயா ஸுதம் நிஸின்னஸ்ஸ மாதுகா³மம் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ சே ஏவம் வதே³ய்ய – ‘‘ஸச்சாஹம் நிஸின்னோ, நோ ச கோ² து³ட்டு²ல்லாஹி வாசாஹி ஓபா⁴ஸி’’ந்தி, நிஸஜ்ஜாய காரேதப்³போ³…பே… நாஹம் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே… நாஹம் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவம் வதே³ய்ய – ‘‘அய்யஸ்ஸ மயா ஸுதம் நிபன்னஸ்ஸ மாதுகா³மம் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தம் படிஜானாதி, ஆபத்தியா காரேதப்³போ³…பே… ஸச்சாஹம் நிபன்னோ நோ ச கோ² து³ட்டு²ல்லாஹி வாசாஹி ஓபா⁴ஸிந்தி, நிபஜ்ஜாய காரேதப்³போ³…பே… நாஹம் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே… நாஹம் நிபன்னோ, அபிச கோ² டி²தோதி, ந காரேதப்³போ³.

456. ஸா சே ஏவம் வதே³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ம் ஏகோ ஏகாய ரஹோ நிஸின்னோ’’தி, ஸோ ச தம் படிஜானாதி, நிஸஜ்ஜாய காரேதப்³போ³…பே… நாஹம் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே… நாஹம் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவம் வதே³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ம் ஏகோ ஏகாய ரஹோ நிபன்னோ’’தி, ஸோ ச தம் படிஜானாதி, நிபஜ்ஜாய காரேதப்³போ³…பே… நாஹம் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே… நாஹம் நிபன்னோ, அபிச கோ² டி²தோதி, ந காரேதப்³போ³.

அயம்பீதி புரிமம் உபாதா³ய வுச்சதி.

அனியதோதி ந நியதோ, ஸங்கா⁴தி³ஸேஸோ வா பாசித்தியம் வா.

457. க³மனம் படிஜானாதி நிஸஜ்ஜம் படிஜானாதி ஆபத்திம் படிஜானாதி, ஆபத்தியா காரேதப்³போ³. க³மனம் படிஜானாதி நிஸஜ்ஜம் ந படிஜானாதி ஆபத்திம் படிஜானாதி, ஆபத்தியா காரேதப்³போ³. க³மனம் படிஜானாதி நிஸஜ்ஜம் படிஜானாதி ஆபத்திம் ந படிஜானாதி, நிஸஜ்ஜாய காரேதப்³போ³. க³மனம் படிஜானாதி நிஸஜ்ஜம் ந படிஜானாதி ஆபத்திம் ந படிஜானாதி, ந காரேதப்³போ³.

க³மனம் ந படிஜானாதி நிஸஜ்ஜம் படிஜானாதி ஆபத்திம் படிஜானாதி, ஆபத்தியா காரேதப்³போ³. க³மனம் ந படிஜானாதி நிஸஜ்ஜம் ந படிஜானாதி ஆபத்திம் படிஜானாதி, ஆபத்தியா காரேதப்³போ³. க³மனம் ந படிஜானாதி நிஸஜ்ஜம் படிஜானாதி ஆபத்திம் ந படிஜானாதி, நிஸஜ்ஜாய காரேதப்³போ³. க³மனம் ந படிஜானாதி நிஸஜ்ஜம் ந படிஜானாதி ஆபத்திம் ந படிஜானாதி, ந காரேதப்³போ³தி.

து³தியோ அனியதோ நிட்டி²தோ.

458. உத்³தி³ட்டா² கோ² ஆயஸ்மந்தோ த்³வே அனியதா த⁴ம்மா. தத்தா²யஸ்மந்தே புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²யஸ்மந்தோ; தஸ்மா துண்ஹீ, ஏவமேதம் தா⁴ரயாமீதி.

தஸ்ஸுத்³தா³னம் –

அலம் கம்மனியஞ்சேவ, ததே²வ ச நஹேவ கோ²;

அனியதா ஸுபஞ்ஞத்தா, பு³த்³த⁴ஸேட்டே²ன தாதி³னாதி.

அனியதகண்ட³ம் நிட்டி²தம்.