6. ச²ட்ட²ஸிக்கா²பத³ம்

955. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ ஸம்ஸட்டா² விஹரதி க³ஹபதினாபி க³ஹபதிபுத்தேனபி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ ஸம்ஸட்டா² விஹரிஸ்ஸதி க³ஹபதினாபி க³ஹபதிபுத்தேனபீ’’தி…பே… ஸச்சம் கிர, பி⁴க்க²வே, சண்ட³காளீ பி⁴க்கு²னீ ஸம்ஸட்டா² விஹரதி க³ஹபதினாபி க³ஹபதிபுத்தேனபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ ஸம்ஸட்டா² விஹரிஸ்ஸதி க³ஹபதினாபி க³ஹபதிபுத்தேனபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

956. ‘‘யா பன பி⁴க்கு²னீ ஸம்ஸட்டா² விஹரேய்ய க³ஹபதினா வா க³ஹபதிபுத்தேன வா ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘மாய்யே, ஸம்ஸட்டா² விஹரி க³ஹபதினாபி க³ஹபதிபுத்தேனபி. விவிச்சாய்யே; விவேகஞ்ஞேவ ப⁴கி³னியா ஸங்கோ⁴ வண்ணேதீ’தி. ஏவஞ்ச [ஏவஞ்ச பன (க.)] ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தம் படினிஸ்ஸஜ்ஜேய்ய, இச்சேதம் குஸலம்; நோ சே படினிஸ்ஸஜ்ஜேய்ய, பாசித்திய’’ந்தி.

957. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸம்ஸட்டா² நாம அனனுலோமிகேன காயிகவாசஸிகேன ஸம்ஸட்டா².

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதிபுத்தோ நாம யே கேசி [யோ கோசி (க.)] புத்தபா⁴தரோ.

ஸா பி⁴க்கு²னீதி யா ஸா ஸம்ஸட்டா² பி⁴க்கு²னீ.

பி⁴க்கு²னீஹீதி அஞ்ஞாஹி பி⁴க்கு²னீஹி. யா பஸ்ஸந்தி யா ஸுணந்தி தாஹி வத்தப்³பா³ – ‘‘மாய்யே, ஸம்ஸட்டா² விஹரி க³ஹபதினாபி க³ஹபதிபுத்தேனபி. விவிச்சாய்யே; விவேகஞ்ஞேவ ப⁴கி³னியா ஸங்கோ⁴ வண்ணேதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸா பி⁴க்கு²னீ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘மாய்யே, ஸம்ஸட்டா² விஹரி க³ஹபதினாபி க³ஹபதிபுத்தேனபி. விவிச்சாய்யே; விவேகஞ்ஞேவப⁴கி³னியா ஸங்கோ⁴ வண்ணேதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸா பி⁴க்கு²னீ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

958. ‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ ஸம்ஸட்டா² விஹரதி க³ஹபதினாபி க³ஹபதிபுத்தேனபி. ஸா தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ ஸம்ஸட்டா² விஹரதி க³ஹபதினாபி க³ஹபதிபுத்தேனபி. ஸா தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய பி⁴க்கு²னியா ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி, ஸா பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டா² ஸங்கே⁴ன இத்த²ன்னாமா பி⁴க்கு²னீ தஸ்ஸ வத்து²ஸ்ஸ படினிஸ்ஸக்³கா³ய; க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே ஆபத்தி பாசித்தியஸ்ஸ.

959. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி பாசித்தியஸ்ஸ. த⁴ம்மகம்மே வேமதிகா ந படினிஸ்ஸஜ்ஜதி, ஆபத்தி பாசித்தியஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி பாசித்தியஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

960. அனாபத்தி அஸமனுபா⁴ஸந்தியா, படினிஸ்ஸஜ்ஜந்தியா, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.