4. சதுத்த²ஸிக்கா²பத³ம்

850. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபி நிகண்ணிகம்பி ஜப்பேதி து³தியிகம்பி பி⁴க்கு²னிம் உய்யோஜேதி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி நிகண்ணிகம்பி ஜப்பிஸ்ஸதி து³தியிகம்பி பி⁴க்கு²னிம் உய்யோஜேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபி நிகண்ணிகம்பி ஜப்பேதி து³தியிகம்பி பி⁴க்கு²னிம் உய்யோஜேதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி நிகண்ணிகம்பி ஜப்பிஸ்ஸதி து³தியிகம்பி பி⁴க்கு²னிம் உய்யோஜேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

851. ‘‘யா பன பி⁴க்கு²னீ ரதி²காய வா ப்³யூஹே வா ஸிங்கா⁴டகே வா புரிஸேன ஸத்³தி⁴ம் ஏகேனேகா ஸந்திட்டே²ய்ய வா ஸல்லபேய்ய வா நிகண்ணிகம் வா ஜப்பேய்ய து³தியிகம் வா பி⁴க்கு²னிம் உய்யோஜேய்ய, பாசித்திய’’ந்தி.

852. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ரதி²கா நாம ரச்சா² வுச்சதி. ப்³யூஹம் நாம யேனேவ பவிஸந்தி தேனேவ நிக்க²மந்தி. ஸிங்கா⁴டகோ நாம சச்சரம் வுச்சதி.

புரிஸோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ ஸந்திட்டி²தும் ஸல்லபிதும்.

ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

ஸந்திட்டே²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.

ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.

நிகண்ணிகம் வா ஜப்பேய்யாதி புரிஸஸ்ஸ உபகண்ணகே ஆரோசேதி, ஆபத்தி பாசித்தியஸ்ஸ.

து³தியிகம் வா பி⁴க்கு²னிம் உய்யோஜேய்யாதி அனாசாரம் ஆசரிதுகாமா து³தியிகம்பி பி⁴க்கு²னிம் உய்யோஜேதி, ஆபத்தி து³க்கடஸ்ஸ. த³ஸ்ஸனூபசாரம் வா ஸவனூபசாரம் வா விஜஹந்தியா ஆபத்தி து³க்கடஸ்ஸ. விஜஹிதே ஆபத்தி பாசித்தியஸ்ஸ.

ஹத்த²பாஸம் விஜஹித்வா ஸந்திட்ட²தி வா ஸல்லபதி வா ஆபத்தி து³க்கடஸ்ஸ. யக்கே²ன வா பேதேன வா பண்ட³கேன வா திரச்சா²னக³தமனுஸ்ஸவிக்³க³ஹேன வா ஸத்³தி⁴ம் ஸந்திட்ட²தி வா ஸல்லபதி வா, ஆபத்தி து³க்கடஸ்ஸ.

853. அனாபத்தி யோ கோசி விஞ்ஞூ து³தியோ ஹோதி, அரஹோபேக்கா², அஞ்ஞவிஹிதா ஸந்திட்ட²தி வா ஸல்லபதி வா, ந அனாசாரம் ஆசரிதுகாமா, ஸதி கரணீயே து³தியிகம் பி⁴க்கு²னிம் உய்யோஜேதி, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.