2. து³தியஸிக்கா²பத³ம்

842. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினியா பி⁴க்கு²னியா ஞாதகோ புரிஸோ கா³மகா ஸாவத்தி²ம் அக³மாஸி கேனசிதே³வ கரணீயேன. அத² கோ² ஸா பி⁴க்கு²னீ – ‘‘ப⁴க³வதா படிக்கி²த்தம் ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்டி²தும் ஸல்லபிது’’ந்தி தேனேவ புரிஸேன ஸத்³தி⁴ம் படிச்ச²ன்னே ஓகாஸே ஏகேனேகா ஸந்திட்ட²திபி ஸல்லபதிபி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபீ’’தி…பே… ஸச்சம் கிர, பி⁴க்க²வே, பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

843. ‘‘யா பன பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டே²ய்ய வா ஸல்லபேய்ய வா, பாசித்திய’’ந்தி.

844. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

படிச்ச²ன்னோ நாம ஓகாஸோ குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா வா யேன கேனசி படிச்ச²ன்னோ ஹோதி.

புரிஸோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ ஸந்திட்டி²தும் ஸல்லபிதும்.

ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

ஸந்திட்டே²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.

ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.

ஹத்த²பாஸம் விஜஹித்வா ஸந்திட்ட²தி வா ஸல்லபதி வா, ஆபத்தி து³க்கடஸ்ஸ. யக்கே²ன வா பேதேன வா பண்ட³கேன வா திரச்சா²னக³தமனுஸ்ஸவிக்³க³ஹேன வா ஸத்³தி⁴ம் ஸந்திட்ட²தி வா ஸல்லபதி வா, ஆபத்தி து³க்கடஸ்ஸ.

845. அனாபத்தி யோ கோசி விஞ்ஞூ து³தியோ ஹோதி, அரஹோபேக்கா², அஞ்ஞவிஹிதா ஸந்திட்ட²தி வா ஸல்லபதி வா, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.