3. ததியஸிக்கா²பத³ம்

802. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன த்³வே பி⁴க்கு²னியோ அனபி⁴ரதியா பீளிதா ஓவரகம் பவிஸித்வா தலகா⁴தகம் கரோந்தி. பி⁴க்கு²னியோ தேன ஸத்³தே³ன உபதா⁴வித்வா தா பி⁴க்கு²னியோ ஏதத³வோசும் – ‘‘கிஸ்ஸ தும்ஹே, அய்யே, புரிஸேன ஸத்³தி⁴ம் ஸம்பது³ஸ்ஸதா²’’தி? ‘‘ந மயம், அய்யே, புரிஸேன ஸத்³தி⁴ம் ஸம்பது³ஸ்ஸாமா’’தி. பி⁴க்கு²னீனம் ஏதமத்த²ம் ஆரோசேஸும். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ தலகா⁴தகம் கரிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ தலகா⁴தகம் கரோந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ தலகா⁴தகம் கரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

803. ‘‘தலகா⁴தகே பாசித்திய’’ந்தி.

804. தலகா⁴தகம் நாம ஸம்ப²ஸ்ஸம் ஸாதி³யந்தீ அந்தமஸோ உப்பலபத்தேனபி முத்தகரணே பஹாரம் தே³தி, ஆபத்தி பாசித்தியஸ்ஸ.

805. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.