2. து³தியஸிக்கா²பத³ம்

738. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கா³மகாவாஸே வஸ்ஸம்வுட்டா² [வஸ்ஸம்வுத்தா² (ஸீ. ஸ்யா.)] ஸாவத்தி²ம் அக³மம்ஸு வத்தஸம்பன்னா இரியாபத²ஸம்பன்னா து³ச்சோளா லூக²சீவரா. உபாஸகா தா பி⁴க்கு²னியோ பஸ்ஸித்வா – ‘‘இமா பி⁴க்கு²னியோ வத்தஸம்பன்னா இரியாபத²ஸம்பன்னா து³ச்சோளா லூக²சீவரா, இமா பி⁴க்கு²னியோ அச்சி²ன்னா ப⁴விஸ்ஸந்தீ’’தி பி⁴க்கு²னிஸங்க⁴ஸ்ஸ அகாலசீவரம் அத³ம்ஸு. து²ல்லனந்தா³ பி⁴க்கு²னீ – ‘‘அம்ஹாகம் கதி²னம் அத்த²தம் காலசீவர’’ந்தி அதி⁴ட்ட²ஹித்வா பா⁴ஜாபேஸி. உபாஸகா தா பி⁴க்கு²னியோ பஸ்ஸித்வா ஏதத³வோசும் – ‘‘அபய்யாஹி சீவரம் லத்³த⁴’’ந்தி? ‘‘ந மயம், ஆவுஸோ, சீவரம் லபா⁴ம. அய்யா து²ல்லனந்தா³ – ‘அம்ஹாகம் கதி²னம் அத்த²தம் காலசீவர’ந்தி அதி⁴ட்ட²ஹித்வா பா⁴ஜாபேஸீ’’தி. உபாஸகா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேஸ்ஸதீ’’தி! அஸ்ஸோஸும் கோ² பி⁴க்கு²னியோ தேஸம் உபாஸகானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும் …பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேதீதி [பா⁴ஜாபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

739. ‘‘யா பன பி⁴க்கு²னீ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேய்ய, நிஸ்ஸக்³கி³யம் பாசித்திய’’ந்தி.

740. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்னம், காலேபி ஆதி³ஸ்ஸ தி³ன்னம், ஏதம் அகாலசீவரம் நாம.

அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, அய்யே, அகாலசீவரம் ‘‘காலசீவர’ந்தி அதி⁴ட்ட²ஹித்வா பா⁴ஜாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

741. அகாலசீவரே அகாலசீவரஸஞ்ஞா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, நிஸ்ஸக்³கி³யம் பாசித்தியம். அகாலசீவரே வேமதிகா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, ஆபத்தி து³க்கடஸ்ஸ. அகாலசீவரே காலசீவரஸஞ்ஞா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, அனாபத்தி. காலசீவரே அகாலசீவரஸஞ்ஞா, ஆபத்தி து³க்கடஸ்ஸ. காலசீவரே வேமதிகா, ஆபத்தி து³க்கடஸ்ஸ. காலசீவரே காலசீவரஸஞ்ஞா, அனாபத்தி.

742. அனாபத்தி அகாலசீவரம் காலசீவரஸஞ்ஞா பா⁴ஜாபேதி, காலசீவரம் காலசீவரஸஞ்ஞா பா⁴ஜாபேதி, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.