9. நவமஸங்கா⁴தி³ஸேஸஸிக்கா²பத³ம்

721. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ய பி⁴க்கு²னியா அந்தேவாஸிகா பி⁴க்கு²னியோ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஸம்ஸட்டா² விஹரிஸ்ஸந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா’’தி…பே… ஸச்சம் கிர, பி⁴க்க²வே, பி⁴க்கு²னியோ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³காதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ ஸம்ஸட்டா² விஹரிஸ்ஸந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

722. ‘‘பி⁴க்கு²னியோ பனேவ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா பி⁴க்கு²னியோ பி⁴க்கு²னீஹி ஏவமஸ்ஸு வசனீயா – ‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனம் ஸங்கோ⁴ வண்ணேதீ’தி. ஏவஞ்ச தா பி⁴க்கு²னியோ பி⁴க்கு²னீஹி வுச்சமானா ததே²வ பக்³க³ண்ஹேய்யும், தா பி⁴க்கு²னியோ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தம் படினிஸ்ஸஜ்ஜேய்யும், இச்சேதம் குஸலம்; நோ சே படினிஸ்ஸஜ்ஜேய்யும், இமாபி பி⁴க்கு²னியோ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

723. பி⁴க்கு²னியோ பனேவாதி உபஸம்பன்னாயோ வுச்சந்தி.

ஸம்ஸட்டா² விஹரந்தீதி ஸம்ஸட்டா² நாம அனனுலோமிகேன காயிகவாசஸிகேன ஸம்ஸட்டா² விஹரந்தி.

பாபாசாராதி பாபகேன ஆசாரேன ஸமன்னாக³தா.

பாபஸத்³தா³தி பாபகேன கித்திஸத்³தே³ன அப்³பு⁴க்³க³தா.

பாபஸிலோகாதி பாபகேன மிச்சா²ஜீவேன ஜீவிதம் கப்பேந்தி.

பி⁴க்கு²னிஸங்க⁴ஸ்ஸ விஹேஸிகாதி அஞ்ஞமஞ்ஞிஸ்ஸா கம்மே கரீயமானே படிக்கோஸந்தி.

அஞ்ஞமஞ்ஞிஸ்ஸா வஜ்ஜப்படிச்சா²தி³காதி அஞ்ஞமஞ்ஞம் வஜ்ஜம் படிச்சா²தே³ந்தி.

தா பி⁴க்கு²னியோதி யா தா ஸம்ஸட்டா² பி⁴க்கு²னியோ.

பி⁴க்கு²னீஹீதி அஞ்ஞாஹி பி⁴க்கு²னீஹி.

யா பஸ்ஸந்தி யா ஸுணந்தி தாஹி வத்தப்³பா³ – ‘‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனம் ஸங்கோ⁴ வண்ணேதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜந்தி, இச்சேதம் குஸலம்; நோ சே படினிஸ்ஸஜ்ஜந்தி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. தா பி⁴க்கு²னியோ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனம் ஸங்கோ⁴ வண்ணேதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜந்தி, இச்சேதம் குஸலம்; நோ சே படினிஸ்ஸஜ்ஜந்தி, ஆபத்தி து³க்கடஸ்ஸ. தா பி⁴க்கு²னியோ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

724. ‘‘ஸுணாது மே, அய்யே, ஸங்கோ⁴. இத்த²ன்னாமா ச இத்த²ன்னாமா ச பி⁴க்கு²னியோ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா தம் வத்து²ம் ந படினிஸ்ஸஜ்ஜந்தி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு²னியோ ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. இத்த²ன்னாமா ச இத்த²ன்னாமா ச பி⁴க்கு²னியோ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா தம் வத்து²ம் ந படினிஸ்ஸஜ்ஜந்தி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு²னியோ ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய ச இத்த²ன்னாமாய ச பி⁴க்கு²னீனம் ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி, ஸா பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டா² ஸங்கே⁴ன, இத்த²ன்னாமா ச இத்த²ன்னாமா ச பி⁴க்கு²னியோ தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தீனம் ஞத்தியா து³க்கடம் த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி. த்³வே திஸ்ஸோ ஏகதோ ஸமனுபா⁴ஸிதப்³பா³. ததுத்தரி ந ஸமனுபா⁴ஸிதப்³பா³.

இமாபி பி⁴க்கு²னியோதி புரிமாயோ உபாதா³ய வுச்சந்தி.

யாவததியகந்தி யாவததியம் ஸமனுபா⁴ஸனாய ஆபஜ்ஜந்தி, ந ஸஹ வத்து²ஜ்ஜா²சாரா.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

725. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

726. அனாபத்தி அஸமனுபா⁴ஸந்தீனம், படினிஸ்ஸஜ்ஜந்தீனம், உம்மத்திகானம், ஆதி³கம்மிகானந்தி.

நவமஸங்கா⁴தி³ஸேஸஸிக்கா²பத³ம் நிட்டி²தம்.