2. ஸங்கா⁴தி³ஸேஸகண்ட³ம் (பி⁴க்கு²னீவிப⁴ங்கோ³)

1. பட²மஸங்கா⁴தி³ஸேஸஸிக்கா²பத³ம்

இமே கோ² பனாய்யாயோ ஸத்தரஸ ஸங்கா⁴தி³ஸேஸா

த⁴ம்மா உத்³தே³ஸம் ஆக³ச்ச²ந்தி.

678. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ உபாஸகோ பி⁴க்கு²னிஸங்க⁴ஸ்ஸ உதோ³ஸிதம் [உத்³தோ³ஸிதம் (ஸீ. ஸ்யா.)] த³த்வா காலங்கதோ ஹோதி. தஸ்ஸ த்³வே புத்தா ஹோந்தி – ஏகோ அஸ்ஸத்³தோ⁴ அப்பஸன்னோ, ஏகோ ஸத்³தோ⁴ பஸன்னோ. தே பேத்திகம் ஸாபதேய்யம் விப⁴ஜிம்ஸு. அத² கோ² ஸோ அஸ்ஸத்³தோ⁴ அப்பஸன்னோ தம் ஸத்³த⁴ம் பஸன்னம் ஏதத³வோச – ‘‘அம்ஹாகம் உதோ³ஸிதோ, தம் பா⁴ஜேமா’’தி. ஏவம் வுத்தே ஸோ ஸத்³தோ⁴ பஸன்னோ தம் அஸ்ஸத்³த⁴ம் அப்பஸன்னம் ஏதத³வோச – ‘‘மாய்யோ, ஏவம் அவச. அம்ஹாகம் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. து³தியம்பி கோ² ஸோ அஸ்ஸத்³தோ⁴ அப்பஸன்னோ தம் ஸத்³த⁴ம் பஸன்னம் ஏதத³வோச – ‘‘அம்ஹாகம் உதோ³ஸிதோ, தம் பா⁴ஜேமா’’தி. அத² கோ² ஸோ ஸத்³தோ⁴ பஸன்னோ தம் அஸ்ஸத்³த⁴ம் அப்பஸன்னம் ஏதத³வோச – ‘‘மாய்யோ, ஏவம் அவச. அம்ஹாகம் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. ததியம்பி கோ² ஸோ அஸ்ஸத்³தோ⁴ அப்பஸன்னோ தம் ஸத்³த⁴ம் பஸன்னம் ஏதத³வோச – ‘‘அம்ஹாகம் உதோ³ஸிதோ, தம் பா⁴ஜேமா’’தி. அத² கோ² ஸோ ஸத்³தோ⁴ பஸன்னோ – ‘‘ஸசே மய்ஹம் ப⁴விஸ்ஸதி, அஹம்பி பி⁴க்கு²னிஸங்க⁴ஸ்ஸ த³ஸ்ஸாமீ’’தி – தம் அஸ்ஸத்³த⁴ம் அப்பஸன்னம் ஏதத³வோச – ‘‘பா⁴ஜேமா’’தி. அத² கோ² ஸோ உதோ³ஸிதோ தேஹி பா⁴ஜீயமானோ தஸ்ஸ அஸ்ஸத்³த⁴ஸ்ஸ அப்பஸன்னஸ்ஸ பாபுணாதி [பாபுணி (ஸ்யா.)]. அத² கோ² ஸோ அஸ்ஸத்³தோ⁴ அப்பஸன்னோ பி⁴க்கு²னியோ உபஸங்கமித்வா ஏதத³வோச – ‘‘நிக்க²மதா²ய்யே, அம்ஹாகம் உதோ³ஸிதோ’’தி.

ஏவம் வுத்தே து²ல்லனந்தா³ பி⁴க்கு²னீ தம் புரிஸம் ஏதத³வோச – ‘‘மாய்யோ, ஏவம் அவச, தும்ஹாகம் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. ‘‘தி³ன்னோ ந தி³ன்னோ’’தி வோஹாரிகே மஹாமத்தே புச்சி²ம்ஸு. மஹாமத்தா ஏவமாஹம்ஸு – ‘‘கோ, அய்யே, ஜானாதி பி⁴க்கு²னிஸங்க⁴ஸ்ஸ தி³ன்னோ’’தி? ஏவம் வுத்தே து²ல்லனந்தா³ பி⁴க்கு²னீ தே மஹாமத்தே ஏதத³வோச – ‘‘அபி நாய்யோ [அபி ந்வய்யா (ஸ்யா.), அபி நாய்யோ (க.)] தும்ஹேஹி தி³ட்ட²ம் வா ஸுதம் வா ஸக்கி²ம் ட²பயித்வா தா³னம் தி³ய்யமான’’ந்தி? அத² கோ² தே மஹாமத்தா – ‘‘ஸச்சம் கோ² அய்யா ஆஹா’’தி தம் உதோ³ஸிதம் பி⁴க்கு²னிஸங்க⁴ஸ்ஸ அகம்ஸு. அத² கோ² ஸோ புரிஸோ பராஜிதோ உஜ்ஜா²யதி கி²ய்யதி விபாசேதி – ‘‘அஸ்ஸமணியோ இமா முண்டா³ ப³ந்த⁴கினியோ. கத²ஞ்ஹி நாம அம்ஹாகம் உதோ³ஸிதம் அச்சி²ந்தா³பேஸ்ஸந்தீ’’தி! து²ல்லனந்தா³ பி⁴க்கு²னீ மஹாமத்தானம் ஏதமத்த²ம் ஆரோசேஸி. மஹாமத்தா தம் புரிஸம் த³ண்டா³பேஸும். அத² கோ² ஸோ புரிஸோ த³ண்டி³தோ பி⁴க்கு²னூபஸ்ஸயஸ்ஸ அவிதூ³ரே ஆஜீவகஸேய்யம் காராபேத்வா ஆஜீவகே உய்யோஜேஸி – ‘‘ஏதா பி⁴க்கு²னியோ அச்சாவத³தா²’’தி.

து²ல்லனந்தா³ பி⁴க்கு²னீ மஹாமத்தானம் ஏதமத்த²ம் ஆரோசேஸி. மஹாமத்தா தம் புரிஸம் ப³ந்தா⁴பேஸும். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘பட²மம் பி⁴க்கு²னியோ உதோ³ஸிதம் அச்சி²ந்தா³பேஸும், து³தியம் த³ண்டா³பேஸும், ததியம் ப³ந்தா⁴பேஸும். இதா³னி கா⁴தாபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ உஸ்ஸயவாதி³கா விஹரிஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ உஸ்ஸயவாதி³கா விஹரதீதி. ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ உஸ்ஸயவாதி³கா விஹரிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

679. ‘‘யா பன பி⁴க்கு²னீ உஸ்ஸயவாதி³கா விஹரேய்ய க³ஹபதினா வா க³ஹபதிபுத்தேன வா தா³ஸேன வா கம்மகாரேன [கம்மகரேன (ஸீ. ஸ்யா.)] வா அந்தமஸோ ஸமணபரிப்³பா³ஜகேனாபி, அயம் பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

680. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

உஸ்ஸயவாதி³கா நாம அட்³ட³காரிகா வுச்சதி.

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதிபுத்தோ நாம யே கேசி புத்தபா⁴தரோ.

தா³ஸோ நாம அந்தோஜாதோ த⁴னக்கீதோ கரமரானீதோ.

கம்மகாரோ நாம ப⁴டகோ ஆஹதகோ.

ஸமணபரிப்³பா³ஜகோ நாம பி⁴க்கு²ஞ்ச பி⁴க்கு²னிஞ்ச ஸிக்க²மானஞ்ச ஸாமணேரஞ்ச ஸாமணேரிஞ்ச ட²பேத்வா யோ கோசி பரிப்³பா³ஜகஸமாபன்னோ.

அட்³ட³ம் கரிஸ்ஸாமீதி து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஏகஸ்ஸ ஆரோசேதி, ஆபத்தி து³க்கடஸ்ஸ. து³தியஸ்ஸ ஆரோசேதி, ஆபத்தி து²ல்லச்சயஸ்ஸ. அட்³ட³பரியோஸானே ஆபத்தி ஸங்கா⁴தி³ஸேஸஸ்ஸ.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸந்தி ஸங்கோ⁴வ தஸ்ஸா ஆபத்தியா மானத்தம் தே³தி மூலாய படிகஸ்ஸதி அப்³பே⁴தி, ந ஸம்ப³ஹுலா ந ஏகா பி⁴க்கு²னீ. தேன வுச்சதி ‘‘ஸங்கா⁴தி³ஸேஸோ’’தி. தஸ்ஸேவ ஆபத்தினிகாயஸ்ஸ நாமகம்மம் அதி⁴வசனம். தேனபி வுச்சதி ‘‘ஸங்கா⁴தி³ஸேஸோ’’தி.

681. அனாபத்தி மனுஸ்ஸேஹி ஆகட்³டீ⁴யமானா க³ச்ச²தி, ஆரக்க²ம் யாசதி, அனோதி³ஸ்ஸ ஆசிக்க²தி, உம்மத்திகாய…பே… ஆதி³கம்மிகாயாதி.

பட²மஸங்கா⁴தி³ஸேஸஸிக்கா²பத³ம் நிட்டி²தம்.

2. து³தியஸங்கா⁴தி³ஸேஸஸிக்கா²பத³ம்

682. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன வேஸாலியம் அஞ்ஞதரஸ்ஸ லிச்ச²விஸ்ஸ பஜாபதி அதிசாரினீ ஹோதி. அத² கோ² ஸோ லிச்ச²வி தம் இத்தி²ம் ஏதத³வோச – ‘‘ஸாது⁴ விரமாஹி, அனத்த²ம் கோ² தே கரிஸ்ஸாமீ’’தி. ஏவம்பி ஸா வுச்சமானா நாதி³யி. தேன கோ² பன ஸமயேன வேஸாலியம் லிச்ச²விக³ணோ ஸன்னிபதிதோ ஹோதி கேனசிதே³வ கரணீயேன. அத² கோ² ஸோ லிச்ச²வி தே லிச்ச²வயோ ஏதத³வோச – ‘‘ஏகம் மே, அய்யோ, இத்தி²ம் அனுஜானாதா²’’தி. ‘‘கா நாம ஸா’’தி? ‘‘மய்ஹம் பஜாபதி அதிசரதி, தம் கா⁴தேஸ்ஸாமீ’’தி. ‘‘ஜானாஹீ’’தி. அஸ்ஸோஸி கோ² ஸா இத்தீ² – ‘‘ஸாமிகோ கிர மம் கா⁴தேதுகாமோ’’தி. வரப⁴ண்ட³ம் ஆதா³ய ஸாவத்தி²ம் க³ந்த்வா தித்தி²யே உபஸங்கமித்வா பப்³ப³ஜ்ஜம் யாசி. தித்தி²யா ந இச்சி²ம்ஸு பப்³பா³ஜேதும். பி⁴க்கு²னியோ உபஸங்கமித்வா பப்³ப³ஜ்ஜம் யாசி. பி⁴க்கு²னியோபி ந இச்சி²ம்ஸு பப்³பா³ஜேதும். து²ல்லனந்த³ம் பி⁴க்கு²னிம் உபஸங்கமித்வா ப⁴ண்ட³கம் த³ஸ்ஸேத்வா பப்³ப³ஜ்ஜம் யாசி. து²ல்லனந்தா³ பி⁴க்கு²னீ ப⁴ண்ட³கம் க³ஹேத்வா பப்³பா³ஜேஸி.

அத² கோ² ஸோ லிச்ச²வி தம் இத்தி²ம் க³வேஸந்தோ ஸாவத்தி²ம் க³ந்த்வா பி⁴க்கு²னீஸு பப்³ப³ஜிதம் தி³ஸ்வான யேன ராஜா பஸேனதி³ கோஸலோ தேனுபஸங்கமி; உபஸங்கமித்வா ராஜானம் பஸேனதி³ம் கோஸலம் ஏதத³வோச – ‘‘பஜாபதி மே, தே³வ, வரப⁴ண்ட³ம் ஆதா³ய ஸாவத்தி²ம் அனுப்பத்தா. தம் தே³வோ அனுஜானாதூ’’தி. ‘‘தேன ஹி, ப⁴ணே, விசினித்வா ஆசிக்கா²’’தி. ‘‘தி³ட்டா², தே³வ, பி⁴க்கு²னீஸு பப்³ப³ஜிதா’’தி. ‘‘ஸசே, ப⁴ணே, பி⁴க்கு²னீஸு பப்³ப³ஜிதா, ந ஸா லப்³பா⁴ கிஞ்சி காதும். ஸ்வாக்கா²தோ ப⁴க³வதா த⁴ம்மோ, சரது ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. அத² கோ² ஸோ லிச்ச²வி உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ சோரிம் பப்³பா³ஜேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தஸ்ஸ லிச்ச²விஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ சோரிம் பப்³பா³ஜேஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ சோரிம் பப்³பா³ஜேதீதி [பப்³பா³ஜேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ சோரிம் பப்³பா³ஜேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

683. ‘‘யா பன பி⁴க்கு²னீ ஜானம் சோரிம் வஜ்ஜ²ம் விதி³தம் அனபலோகேத்வா ராஜானம் வா ஸங்க⁴ம் வா க³ணம் வா பூக³ம் வா ஸேணிம் வா அஞ்ஞத்ர கப்பா வுட்டா²பேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

684. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஜானாதி நாம ஸாமம் வா ஜானாதி அஞ்ஞே வா தஸ்ஸா ஆரோசேந்தி, ஸா வா ஆரோசேதி.

சோரீ நாம யா பஞ்சமாஸகம் வா அதிரேகபஞ்சமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி, ஏஸா சோரீ நாம.

வஜ்ஜா² நாம யம் கத்வா வஜ்ஜ²ப்பத்தா ஹோதி.

விதி³தா நாம அஞ்ஞேஹி மனுஸ்ஸேஹி ஞாதா ஹோதி ‘‘வஜ்ஜா² ஏஸா’’தி.

அனபலோகேத்வாதி அனாபுச்சா².

ராஜா நாம யத்த² ராஜா அனுஸாஸதி, ராஜா அபலோகேதப்³போ³.

ஸங்கோ⁴ நாம பி⁴க்கு²னிஸங்கோ⁴ வுச்சதி, பி⁴க்கு²னிஸங்கோ⁴ அபலோகேதப்³போ³.

க³ணோ நாம யத்த² க³ணோ அனுஸாஸதி, க³ணோ அபலோகேதப்³போ³.

பூகோ³ நாம யத்த² பூகோ³ அனுஸாஸதி, பூகோ³ அபலோகேதப்³போ³.

ஸேணி நாம யத்த² ஸேணி அனுஸாஸதி, ஸேணி அபலோகேதப்³போ³.

அஞ்ஞத்ர கப்பாதி ட²பேத்வா கப்பம். கப்பம் நாம த்³வே கப்பானி – தித்தி²யேஸு வா பப்³ப³ஜிதா ஹோதி அஞ்ஞாஸு வா பி⁴க்கு²னீஸு பப்³ப³ஜிதா. அஞ்ஞத்ர கப்பா ‘‘வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து²ல்லச்சயா. கம்மவாசாபரியோஸானே உபஜ்ஜா²யாய ஆபத்தி ஸங்கா⁴தி³ஸேஸஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

அயம்பீதி புரிமம் உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸந்தி…பே… தேனபி வுச்சதி ஸங்கா⁴தி³ஸேஸோதி.

685. சோரியா சோரிஸஞ்ஞா அஞ்ஞத்ர கப்பா வுட்டா²பேதி, ஆபத்தி ஸங்கா⁴தி³ஸேஸஸ்ஸ. சோரியா வேமதிகா அஞ்ஞத்ர கப்பா வுட்டா²பேதி, ஆபத்தி து³க்கடஸ்ஸ. சோரியா அசோரிஸஞ்ஞா அஞ்ஞத்ர கப்பா வுட்டா²பேதி, அனாபத்தி. அசோரியா சோரிஸஞ்ஞா, ஆபத்தி து³க்கடஸ்ஸ. அசோரியா வேமதிகா, ஆபத்தி து³க்கடஸ்ஸ. அசோரியா அசோரிஸஞ்ஞா, அனாபத்தி.

686. அனாபத்தி அஜானந்தீ வுட்டா²பேதி, அபலோகேத்வா வுட்டா²பேதி, கப்பகதம் வுட்டா²பேதி, உம்மத்திகாய, ஆதி³கம்மிகாயாதி.

து³தியஸங்கா⁴தி³ஸேஸஸிக்கா²பத³ம் நிட்டி²தம்.

3. ததியஸங்கா⁴தி³ஸேஸஸிக்கா²பத³ம்

687. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினீ பி⁴க்கு²னீ பி⁴க்கு²னீஹி ஸத்³தி⁴ம் ப⁴ண்டி³த்வா கா³மகம் [கா³மகே (ஸ்யா.)] ஞாதிகுலம் அக³மாஸி. ப⁴த்³தா³ காபிலானீ தம் பி⁴க்கு²னிம் அபஸ்ஸந்தீ பி⁴க்கு²னியோ புச்சி² – ‘‘கஹம் இத்த²ன்னாமா, ந தி³ஸ்ஸதீ’’தி! ‘‘பி⁴க்கு²னீஹி ஸத்³தி⁴ம், அய்யே, ப⁴ண்டி³த்வா ந தி³ஸ்ஸதீ’’தி. ‘‘அம்மா, அமுகஸ்மிம் கா³மகே ஏதிஸ்ஸா ஞாதிகுலம். தத்த² க³ந்த்வா விசினதா²’’தி. பி⁴க்கு²னியோ தத்த² க³ந்த்வா தம் பி⁴க்கு²னிம் பஸ்ஸித்வா ஏதத³வோசும் – ‘‘கிஸ்ஸ த்வம், அய்யே, ஏகிகா ஆக³தா, கச்சிஸி அப்பத⁴ம்ஸிதா’’தி? ‘‘அப்பத⁴ம்ஸிதாம்ஹி, அய்யே’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஏகா கா³மந்தரம் க³ச்சி²ஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ ஏகா கா³மந்தரம் க³ச்ச²தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஏகா கா³மந்தரம் க³ச்சி²ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ ஏகா கா³மந்தரம் க³ச்சே²ய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

688. தேன கோ² பன ஸமயேன த்³வே பி⁴க்கு²னியோ ஸாகேதா ஸாவத்தி²ம் அத்³தா⁴னமக்³க³ப்படிபன்னா ஹோந்தி. அந்தராமக்³கே³ நதீ³ தரிதப்³பா³ ஹோதி. அத² கோ² தா பி⁴க்கு²னியோ நாவிகே உபஸங்கமித்வா ஏதத³வோசும் – ‘‘ஸாது⁴ நோ, ஆவுஸோ, தாரேதா²’’தி. ‘‘நாய்யே, ஸக்கா உபோ⁴ ஸகிம் தாரேது’’ந்தி. ஏகோ ஏகம் உத்தாரேஸி. உத்திண்ணோ உத்திண்ணம் தூ³ஸேஸி. அனுத்திண்ணோ அனுத்திண்ணம் தூ³ஸேஸி. தா பச்சா² ஸமாக³ந்த்வா புச்சி²ம்ஸு – ‘‘கச்சிஸி, அய்யே, அப்பத⁴ம்ஸிதா’’தி? ‘‘பத⁴ம்ஸிதாம்ஹி, அய்யே! த்வம் பன, அய்யே, அப்பத⁴ம்ஸிதா’’தி? ‘‘பத⁴ம்ஸிதாம்ஹி, அய்யே’’தி. அத² கோ² தா பி⁴க்கு²னியோ ஸாவத்தி²ம் க³ந்த்வா பி⁴க்கு²னீனம் ஏதமத்த²ம் ஆரோசேஸும். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஏகா நதீ³பாரம் க³ச்சி²ஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, பி⁴க்கு²னீ ஏகா நதீ³பாரம் க³ச்ச²தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஏகா நதீ³பாரம் க³ச்சி²ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ ஏகா வா கா³மந்தரம் க³ச்சே²ய்ய, ஏகா வா நதீ³பாரம் க³ச்சே²ய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

689. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ம் க³ச்ச²ந்தா [க³ந்த்வா (க.)] ஸாயம் அஞ்ஞதரம் கா³மம் உபக³ச்சி²ம்ஸு. தத்த² அஞ்ஞதரா பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. அஞ்ஞதரோ புரிஸோ தஸ்ஸா பி⁴க்கு²னியா ஸஹ த³ஸ்ஸனேன படிப³த்³த⁴சித்தோ ஹோதி. அத² கோ² ஸோ புரிஸோ தாஸம் பி⁴க்கு²னீனம் ஸேய்யம் பஞ்ஞபேந்தோ தஸ்ஸா பி⁴க்கு²னியா ஸேய்யம் ஏகமந்தம் பஞ்ஞாபேஸி. அத² கோ² ஸா பி⁴க்கு²னீ ஸல்லக்கே²த்வா – ‘‘பரியுட்டி²தோ அயம் புரிஸோ; ஸசே ரத்திம் ஆக³ச்சி²ஸ்ஸதி, விஸ்ஸரோ மே ப⁴விஸ்ஸதீ’’தி, பி⁴க்கு²னியோ அனாபுச்சா² அஞ்ஞதரம் குலம் க³ந்த்வா ஸேய்யம் கப்பேஸி. அத² கோ² ஸோ புரிஸோ ரத்திம் ஆக³ந்த்வா தம் பி⁴க்கு²னிம் க³வேஸந்தோ பி⁴க்கு²னியோ க⁴ட்டேஸி. பி⁴க்கு²னியோ தம் பி⁴க்கு²னிம் அபஸ்ஸந்தியோ ஏவமாஹம்ஸு – ‘‘நிஸ்ஸம்ஸயம் கோ² ஸா பி⁴க்கு²னீ புரிஸேன ஸத்³தி⁴ம் நிக்க²ந்தா’’தி.

அத² கோ² ஸா பி⁴க்கு²னீ தஸ்ஸா ரத்தியா அச்சயேன யேன தா பி⁴க்கு²னியோ தேனுபஸங்கமி. பி⁴க்கு²னியோ தம் பி⁴க்கு²னிம் ஏதத³வோசும் – ‘‘கிஸ்ஸ த்வம், அய்யே, புரிஸேன ஸத்³தி⁴ம் நிக்க²ந்தா’’தி? ‘‘நாஹம், அய்யே, புரிஸேன ஸத்³தி⁴ம் நிக்க²ந்தா’’தி. பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஏகா ரத்திம் விப்பவஸிஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ ஏகா ரத்திம் விப்பவஸீதி [விப்பவஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஏகா ரத்திம் விப்பவஸிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ ஏகா வா கா³மந்தரம் க³ச்சே²ய்ய, ஏகா வா நதீ³பாரம் க³ச்சே²ய்ய, ஏகா வா ரத்திம் விப்பவஸேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

690. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ம் அத்³தா⁴னமக்³க³ப்படிபன்னா ஹோந்தி. தத்த² அஞ்ஞதரா பி⁴க்கு²னீ வச்சேன பீளிதா ஏகிகா ஓஹீயித்வா [ஓஹியித்வா (க.)] பச்சா² அக³மாஸி. மனுஸ்ஸா தம் பி⁴க்கு²னிம் பஸ்ஸித்வா தூ³ஸேஸும். அத² கோ² ஸா பி⁴க்கு²னீ யேன தா பி⁴க்கு²னியோ தேனுபஸங்கமி. பி⁴க்கு²னியோ தம் பி⁴க்கு²னிம் ஏதத³வோசும் – ‘‘கிஸ்ஸ த்வம், அய்யே, ஏகிகா ஓஹீனா, கச்சிஸி அப்பத⁴ம்ஸிதா’’தி? ‘‘பத⁴ம்ஸிதாம்ஹி, அய்யே’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம பி⁴க்கு²னீ ஏகா க³ணம்ஹா ஓஹீயிஸ்ஸதீதி…பே… ஸச்சம் கிர, பி⁴க்க²வே, பி⁴க்கு²னீ ஏகா க³ணம்ஹா ஓஹீயதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஏகா க³ணம்ஹா ஓஹீயிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

691. ‘‘யா பன பி⁴க்கு²னீ ஏகா வா கா³மந்தரம் க³ச்சே²ய்ய, ஏகா வா நதீ³பாரம் க³ச்சே²ய்ய, ஏகா வா ரத்திம் விப்பவஸேய்ய, ஏகா வா க³ணம்ஹா ஓஹீயேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

692. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஏகா வா கா³மந்தரம் க³ச்சே²ய்யாதி பரிக்கி²த்தஸ்ஸ கா³மஸ்ஸ பரிக்கே²பம் பட²மம் பாத³ம் அதிக்காமேந்தியா ஆபத்தி து²ல்லச்சயஸ்ஸ, து³தியம் பாத³ம் அதிக்காமேந்தியா ஆபத்தி ஸங்கா⁴தி³ஸேஸஸ்ஸ.

அபரிக்கி²த்தஸ்ஸ கா³மஸ்ஸ உபசாரம் பட²மம் பாத³ம் அதிக்காமேந்தியா ஆபத்தி து²ல்லச்சயஸ்ஸ. து³தியம் பாத³ம் அதிக்காமேந்தியா ஆபத்தி ஸங்கா⁴தி³ஸேஸஸ்ஸ.

ஏகா வா நதீ³பாரம் க³ச்சே²ய்யாதி நதீ³ நாம திமண்ட³லம் படிச்சா²தே³த்வா யத்த² கத்த²சி உத்தரந்தியா பி⁴க்கு²னியா அந்தரவாஸகோ தேமியதி. பட²மம் பாத³ம் உத்தரந்தியா ஆபத்தி து²ல்லச்சயஸ்ஸ. து³தியம் பாத³ம் உத்தரந்தியா ஆபத்தி ஸங்கா⁴தி³ஸேஸஸ்ஸ.

ஏகா வா ரத்திம் விப்பவஸேய்யாதி ஸஹ அருணுக்³க³மனா து³தியிகாய பி⁴க்கு²னியா ஹத்த²பாஸம் விஜஹந்தியா ஆபத்தி து²ல்லச்சயஸ்ஸ. விஜஹிதே ஆபத்தி ஸங்கா⁴தி³ஸேஸஸ்ஸ.

ஏகா வா க³ணம்ஹா ஓஹீயேய்யாதி அகா³மகே அரஞ்ஞே து³தியிகாய பி⁴க்கு²னியா த³ஸ்ஸனூபசாரம் வா ஸவனூபசாரம் வா விஜஹந்தியா ஆபத்தி து²ல்லச்சயஸ்ஸ. விஜஹிதே ஆபத்தி ஸங்கா⁴தி³ஸேஸஸ்ஸ.

அயம்பீதி புரிமாயோ உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

693. அனாபத்தி து³தியிகா பி⁴க்கு²னீ பக்கந்தா வா ஹோதி விப்³ப⁴ந்தா வா காலங்கதா வா பக்க²ஸங்கந்தா வா, ஆபதா³ஸு, உம்மத்திகாய, ஆதி³கம்மிகாயாதி.

ததியஸங்கா⁴தி³ஸேஸஸிக்கா²பத³ம் நிட்டி²தம்.

4. சதுத்த²ஸங்கா⁴தி³ஸேஸஸிக்கா²பத³ம்

694. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ ப⁴ண்ட³னகாரிகா ஹோதி கலஹகாரிகா விவாத³காரிகா ப⁴ஸ்ஸகாரிகா ஸங்கே⁴ அதி⁴கரணகாரிகா. து²ல்லனந்தா³ பி⁴க்கு²னீ தஸ்ஸா கம்மே கரீயமானே படிக்கோஸதி. தேன கோ² பன ஸமயேன து²ல்லனந்தா³ பி⁴க்கு²னீ கா³மகம் அக³மாஸி கேனசிதே³வ கரணீயேன. அத² கோ² பி⁴க்கு²னிஸங்கோ⁴ – ‘‘து²ல்லனந்தா³ பி⁴க்கு²னீ பக்கந்தா’’தி, சண்ட³காளிம் பி⁴க்கு²னிம் ஆபத்தியா அத³ஸ்ஸனே [அத³ஸ்ஸனேன (க.)] உக்கி²பி. து²ல்லனந்தா³ பி⁴க்கு²னீ கா³மகே தம் கரணீயம் தீரேத்வா புனதே³வ ஸாவத்தி²ம் பச்சாக³ச்சி². சண்ட³காளீ பி⁴க்கு²னீ து²ல்லனந்தா³ய பி⁴க்கு²னியா ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சி². து²ல்லனந்தா³ பி⁴க்கு²னீ சண்ட³காளிம் பி⁴க்கு²னிம் ஏதத³வோச – ‘‘கிஸ்ஸ த்வம், அய்யே, மயி ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சீ²’’தி? ‘‘ஏவஞ்ஹேதம், அய்யே, ஹோதி யதா² தம் அனாதா²யா’’தி. ‘‘கிஸ்ஸ பன த்வம், அய்யே, அனாதா²’’தி? ‘‘இமா மம், அய்யே, பி⁴க்கு²னியோ – ‘‘அயம் அனாதா² அப்பஞ்ஞாதா, நத்தி² இமிஸ்ஸா காசி படிவத்தா’’தி, ஆபத்தியா அத³ஸ்ஸனே [அத³ஸ்ஸனேன (க.)] உக்கி²பிம்ஸூ’’தி.

து²ல்லனந்தா³ பி⁴க்கு²னீ – ‘‘பா³லா ஏதா அப்³யத்தா ஏதா, நேவ ஜானந்தி கம்மம் வா கம்மதோ³ஸம் வா கம்மவிபத்திம் வா கம்மஸம்பத்திம் வா. மயம் கோ² ஜானாம கம்மம்பி கம்மதோ³ஸம்பி கம்மவிபத்திம்பி கம்மஸம்பத்திம்பி. மயம் கோ² அகதம் வா கம்மம் காரேய்யாம கதம் வா கம்மம் கோபேய்யாமா’’தி, லஹும் லஹும் பி⁴க்கு²னிஸங்க⁴ம் ஸன்னிபாதேத்வா சண்ட³காளிம் பி⁴க்கு²னிம் ஓஸாரேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேதீதி [ஓஸாரேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

695. ‘‘யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

696. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸமக்³கோ³ நாம ஸங்கோ⁴ ஸமானஸம்வாஸகோ ஸமானஸீமாயம் டி²தோ.

உக்கி²த்தா நாம ஆபத்தியா அத³ஸ்ஸனே வா அப்படிகம்மே வா அப்படினிஸ்ஸக்³கே³ வா [அத³ஸ்ஸனேன வா அப்படிகம்மேன வா அப்படினிஸ்ஸக்³கே³ன வா (க.), அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா (?)] உக்கி²த்தா.

த⁴ம்மேன வினயேனாதி யேன த⁴ம்மேன யேன வினயேன.

ஸத்து²ஸாஸனேனாதி ஜினஸாஸனேன பு³த்³த⁴ஸாஸனேன.

அனபலோகேத்வா காரகஸங்க⁴ந்தி கம்மகாரகஸங்க⁴ம் அனாபுச்சா².

அனஞ்ஞாய க³ணஸ்ஸ ச²ந்த³ந்தி க³ணஸ்ஸ ச²ந்த³ம் அஜானித்வா.

‘‘ஓஸாரேஸ்ஸாமீ’’தி க³ணம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

அயம்பீதி புரிமாயோ உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

697. த⁴ம்மகம்மே த⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ஓஸாரேதி ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

698. அனாபத்தி கம்மகாரகஸங்க⁴ம் அபலோகேத்வா ஓஸாரேதி, க³ணஸ்ஸ ச²ந்த³ம் ஜானித்வா ஓஸாரேதி, வத்தே வத்தந்திம் ஓஸாரேதி, அஸந்தே கம்மகாரகஸங்கே⁴ ஓஸாரேதி, உம்மத்திகாய, ஆதி³கம்மிகாயாதி.

சதுத்த²ஸங்கா⁴தி³ஸேஸஸிக்கா²பத³ம் நிட்டி²தம்.

5. பஞ்சமஸங்கா⁴தி³ஸேஸஸிக்கா²பத³ம்

699. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. மனுஸ்ஸா ப⁴த்தக்³கே³ ஸுந்த³ரீனந்த³ம் பி⁴க்கு²னிம் பஸ்ஸித்வா அவஸ்ஸுதா அவஸ்ஸுதாய ஸுந்த³ரீனந்தா³ய பி⁴க்கு²னியா அக்³க³மக்³கா³னி போ⁴ஜனானி தே³ந்தி. ஸுந்த³ரீனந்தா³ பி⁴க்கு²னீ யாவத³த்த²ம் பு⁴ஞ்ஜதி; அஞ்ஞா பி⁴க்கு²னியோ ந சித்தரூபம் லப⁴ந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²தி³ஸ்ஸதி பு⁴ஞ்ஜிஸ்ஸதீ’’தி…பே… ஸச்சம் கிர, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²த³தி பு⁴ஞ்ஜதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²தி³ஸ்ஸதி பு⁴ஞ்ஜிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

700. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²தே³ய்ய வா பு⁴ஞ்ஜேய்ய வா, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

701. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அவஸ்ஸுதா நாம ஸாரத்தா அபேக்க²வதீ படிப³த்³த⁴சித்தா.

அவஸ்ஸுதோ நாம ஸாரத்தோ அபேக்க²வா படிப³த்³த⁴சித்தோ.

புரிஸபுக்³க³லோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ, விஞ்ஞூ படிப³லோ ஸாரஜ்ஜிதும்.

கா²த³னீயம் நாம பஞ்ச போ⁴ஜனானி – உத³கத³ந்தபோனம் ட²பேத்வா அவஸேஸம் கா²த³னீயம் நாம.

போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.

‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து²ல்லச்சயஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி ஸங்கா⁴தி³ஸேஸஸ்ஸ.

அயம்பீதி புரிமாயோ உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

உத³கத³ந்தபோனம் படிக்³க³ண்ஹாதி, ஆபத்தி து³க்கடஸ்ஸ. ஏகதோஅவஸ்ஸுதே ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.

702. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. உத³கத³ந்தபோனம் படிக்³க³ண்ஹாதி, ஆபத்தி து³க்கடஸ்ஸ. உப⁴தோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா ஹத்த²தோ ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. உத³கத³ந்தபோனம் படிக்³க³ண்ஹாதி, ஆபத்தி து³க்கடஸ்ஸ. ஏகதோஅவஸ்ஸுதே ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. உத³கத³ந்தபோனம் படிக்³க³ண்ஹாதி, ஆபத்தி து³க்கடஸ்ஸ.

703. அனாபத்தி உப⁴தோஅனவஸ்ஸுதா ஹோந்தி, ‘‘அனவஸ்ஸுதோ’’தி ஜானந்தீ படிக்³க³ண்ஹாதி, உம்மத்திகாய, ஆதி³கம்மிகாயாதி.

பஞ்சமஸங்கா⁴தி³ஸேஸஸிக்கா²பத³ம் நிட்டி²தம்.

6. ச²ட்ட²ஸங்கா⁴தி³ஸேஸஸிக்கா²பத³ம்

704. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. மனுஸ்ஸா ப⁴த்தக்³கே³ ஸுந்த³ரீனந்த³ம் பி⁴க்கு²னிம் பஸ்ஸித்வா அவஸ்ஸுதா ஸுந்த³ரீனந்தா³ய பி⁴க்கு²னியா அக்³க³மக்³கா³னி போ⁴ஜனானி தே³ந்தி. ஸுந்த³ரீனந்தா³ பி⁴க்கு²னீ குக்குச்சாயந்தீ ந படிக்³க³ண்ஹாதி. அனந்தரிகா பி⁴க்கு²னீ ஸுந்த³ரீனந்த³ம் பி⁴க்கு²னிம் ஏதத³வோச – ‘‘கிஸ்ஸ த்வம், அய்யே, ந படிக்³க³ண்ஹாஸீ’’தி? ‘‘அவஸ்ஸுதா, அய்யே’’தி. ‘‘த்வம் பன, அய்யே, அவஸ்ஸுதா’’தி? ‘‘நாஹம், அய்யே, அவஸ்ஸுதா’’தி. ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா. இங்க⁴ம், அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா, பு⁴ஞ்ஜ வா’’தி.

யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஏவம் வக்க²தி – ‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா. இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’தி…பே… ஸச்சம் கிர, பி⁴க்க²வே, பி⁴க்கு²னீ ஏவம் வதே³தி – ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா யதோ த்வம் அனவஸ்ஸுதா! இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஏவம் வக்க²தி – ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா யதோ த்வம் அனவஸ்ஸுதா; இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’. நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

705. ‘‘யா பன பி⁴க்கு²னீ ஏவம் வதே³ய்ய – ‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா. இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’தி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

706. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஏவம் வதே³ய்யாதி – ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா. இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. போ⁴ஜனபரியோஸானே ஆபத்தி ஸங்கா⁴தி³ஸேஸஸ்ஸ.

அயம்பீதி புரிமாயோ உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

உத³கத³ந்தபோனம் ‘‘படிக்³க³ண்ஹா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.

707. ஏகதோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா ஹத்த²தோ கா²த³னீயம் வா போ⁴ஜனீயம் வா ‘‘கா²த³ வா பு⁴ஞ்ஜ வா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. போ⁴ஜனபரியோஸானே ஆபத்தி து²ல்லச்சயஸ்ஸ. உத³கத³ந்தபோனம் படிக்³க³ண்ஹாதி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.

708. அனாபத்தி ‘‘அனவஸ்ஸுதோ’’தி ஜானந்தீ உய்யோஜேதி, ‘‘குபிதா ந படிக்³க³ண்ஹாதீ’’தி உய்யோஜேதி, ‘‘குலானுத்³த³யதாய ந படிக்³க³ண்ஹாதீ’’தி உய்யோஜேதி, உம்மத்திகாய, ஆதி³கம்மிகாயாதி.

ச²ட்ட²ஸங்கா⁴தி³ஸேஸஸிக்கா²பத³ம் நிட்டி²தம்.

7. ஸத்தமஸங்கா⁴தி³ஸேஸஸிக்கா²பத³ம்

709. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ பி⁴க்கு²னீஹி ஸத்³தி⁴ம் ப⁴ண்டி³த்வா குபிதா அனத்தமனா ஏவம் வதே³தி – ‘‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ [சண்ட³காளீ பி⁴க்கு²னீ (க.)] குபிதா அனத்தமனா ஏவம் வக்க²தி – பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி…பே… ஸச்சம் கிர, பி⁴க்க²வே, சண்ட³காளீ பி⁴க்கு²னீ குபிதா அனத்தமனா ஏவம் வதே³தி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ குபிதா அனத்தமனா ஏவம் வக்க²தி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

710. ‘‘யா பன பி⁴க்கு²னீ குபிதா அனத்தமனா ஏவம் வதே³ய்ய – ‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘மாய்யே, குபிதா அனத்தமனா ஏவம் அவச – பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீதி, அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தம் படினிஸ்ஸஜ்ஜேய்ய இச்சேதம் குஸலம்; நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

711. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

குபிதா அனத்தமனாதி அனபி⁴ரத்³தா⁴ ஆஹதசித்தா கி²லஜாதா.

ஏவம் வதே³ய்யாதி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி.

ஸா பி⁴க்கு²னீதி யா ஸா ஏவம்வாதி³னீ பி⁴க்கு²னீ. பி⁴க்கு²னீஹீதி அஞ்ஞாஹி பி⁴க்கு²னீஹி.

யா பஸ்ஸந்தி யா ஸுணந்தி தாஹி வத்தப்³பா³ – ‘‘மாய்யே, குபிதா அனத்தமனா ஏவம் அவச – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி இச்சேதம் குஸலம், நோ சே படினிஸ்ஸஜ்ஜதி ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸா பி⁴க்கு²னீ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘மாய்யே, குபிதா அனத்தமனா ஏவம் அவச – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி இச்சேதம் குஸலம், நோ சே படினிஸ்ஸஜ்ஜதி ஆபத்தி து³க்கடஸ்ஸ. ஸா பி⁴க்கு²னீ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

712. ‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ குபிதா அனத்தமனா ஏவம் வதே³தி – ‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. ஸா தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ குபிதா அனத்தமனா ஏவம் வதே³தி – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. ஸா தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய பி⁴க்கு²னியா ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி ஸா, பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டா² ஸங்கே⁴ன இத்த²ன்னாமா பி⁴க்கு²னீ தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஞத்தியா து³க்கடம். த்³வீஹி கம்மவாசாஹி து²ல்லச்சயா. கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தியா ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.

அயம்பீதி புரிமாயோ உபாதா³ய வுச்சதி.

யாவததியகந்தி யாவததியம் ஸமனுபா⁴ஸனாய ஆபஜ்ஜதி, ந ஸஹ வத்து²ஜ்ஜா²சாரா.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

713. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

714. அனாபத்தி அஸமனுபா⁴ஸந்தியா, படினிஸ்ஸஜ்ஜந்தியா, உம்மத்திகாய, ஆதி³கம்மிகாயாதி.

ஸத்தமஸங்கா⁴தி³ஸேஸஸிக்கா²பத³ம் நிட்டி²தம்.

8. அட்ட²மஸங்கா⁴தி³ஸேஸஸிக்கா²பத³ம்

715. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வதே³தி – ‘‘ச²ந்த³கா³மினியோ ச பி⁴க்கு²னியோ, தோ³ஸகா³மினியோ ச பி⁴க்கு²னியோ, மோஹகா³மினியோ ச பி⁴க்கு²னியோ, ப⁴யகா³மினியோ ச பி⁴க்கு²னியோ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வக்க²தி – ச²ந்த³கா³மினியோ ச பி⁴க்கு²னியோ…பே… ப⁴யகா³மினியோ ச பி⁴க்கு²னியோ’’தி…பே… ஸச்சம் கிர, பி⁴க்க²வே, சண்ட³காளீ பி⁴க்கு²னீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வதே³தி – ‘‘ச²ந்த³கா³மினியோ ச பி⁴க்கு²னியோ…பே… ப⁴யகா³மினியோ ச பி⁴க்கு²னியோ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வக்க²தி – ‘‘ச²ந்த³கா³மினியோ ச பி⁴க்கு²னியோ…பே… ப⁴யகா³மினியோ ச பி⁴க்கு²னியோ’’தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

716. ‘‘யா பன பி⁴க்கு²னீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வதே³ய்ய – ‘ச²ந்த³கா³மினியோ ச பி⁴க்கு²னியோ, தோ³ஸகா³மினியோ ச பி⁴க்கு²னியோ, மோஹகா³மினியோ ச பி⁴க்கு²னியோ, ப⁴யகா³மினியோ ச பி⁴க்கு²னியோ’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘மாய்யே, கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் அவச – ச²ந்த³கா³மினியோ ச பி⁴க்கு²னியோ தோ³ஸகா³மினியோ ச பி⁴க்கு²னியோ மோஹகா³மினியோ ச பி⁴க்கு²னியோ ப⁴யகா³மினியோ ச பி⁴க்கு²னியோதி. அய்யா கோ² ச²ந்தா³பி க³ச்சே²ய்ய, தோ³ஸாபி க³ச்சே²ய்ய, மோஹாபி க³ச்சே²ய்ய, ப⁴யாபி க³ச்சே²ய்யா’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தம் படினிஸ்ஸஜ்ஜேய்ய, இச்சேதம் குஸலம்; நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

717. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

கிஸ்மிஞ்சிதே³வ அதி⁴கரணேதி அதி⁴கரணம் நாம சத்தாரி அதி⁴கரணானி – விவாதா³தி⁴கரணம், அனுவாதா³தி⁴கரணம், ஆபத்தாதி⁴கரணம், கிச்சாதி⁴கரணம்.

பச்சாகதா நாம பராஜிதா வுச்சதி.

குபிதா அனத்தமனாதி அனபி⁴ரத்³தா⁴ ஆஹதசித்தா கி²லஜாதா.

ஏவம் வதே³ய்யாதி – ‘‘ச²ந்த³கா³மினியோ ச பி⁴க்கு²னியோ…பே… ப⁴யகா³மினியோ ச பி⁴க்கு²னியோ’’தி.