7. ஸத்தமஸங்கா⁴தி³ஸேஸஸிக்கா²பத³ம்

709. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ பி⁴க்கு²னீஹி ஸத்³தி⁴ம் ப⁴ண்டி³த்வா குபிதா அனத்தமனா ஏவம் வதே³தி – ‘‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ [சண்ட³காளீ பி⁴க்கு²னீ (க.)] குபிதா அனத்தமனா ஏவம் வக்க²தி – பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி…பே… ஸச்சம் கிர, பி⁴க்க²வே, சண்ட³காளீ பி⁴க்கு²னீ குபிதா அனத்தமனா ஏவம் வதே³தி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ குபிதா அனத்தமனா ஏவம் வக்க²தி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

710. ‘‘யா பன பி⁴க்கு²னீ குபிதா அனத்தமனா ஏவம் வதே³ய்ய – ‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘மாய்யே, குபிதா அனத்தமனா ஏவம் அவச – பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீதி, அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தம் படினிஸ்ஸஜ்ஜேய்ய இச்சேதம் குஸலம்; நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

711. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

குபிதா அனத்தமனாதி அனபி⁴ரத்³தா⁴ ஆஹதசித்தா கி²லஜாதா.

ஏவம் வதே³ய்யாதி – ‘‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி.

ஸா பி⁴க்கு²னீதி யா ஸா ஏவம்வாதி³னீ பி⁴க்கு²னீ. பி⁴க்கு²னீஹீதி அஞ்ஞாஹி பி⁴க்கு²னீஹி.

யா பஸ்ஸந்தி யா ஸுணந்தி தாஹி வத்தப்³பா³ – ‘‘மாய்யே, குபிதா அனத்தமனா ஏவம் அவச – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி இச்சேதம் குஸலம், நோ சே படினிஸ்ஸஜ்ஜதி ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸா பி⁴க்கு²னீ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘மாய்யே, குபிதா அனத்தமனா ஏவம் அவச – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. அபி⁴ரமாய்யே, ஸ்வாக்கா²தோ த⁴ம்மோ; சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி இச்சேதம் குஸலம், நோ சே படினிஸ்ஸஜ்ஜதி ஆபத்தி து³க்கடஸ்ஸ. ஸா பி⁴க்கு²னீ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

712. ‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ குபிதா அனத்தமனா ஏவம் வதே³தி – ‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. ஸா தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ குபிதா அனத்தமனா ஏவம் வதே³தி – ‘பு³த்³த⁴ம் பச்சாசிக்கா²மி…பே… ஸிக்க²ம் பச்சாசிக்கா²மி. கின்னுமாவ ஸமணியோ யா ஸமணியோ ஸக்யதீ⁴தரோ! ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி. ஸா தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய பி⁴க்கு²னியா ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி ஸா, பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டா² ஸங்கே⁴ன இத்த²ன்னாமா பி⁴க்கு²னீ தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஞத்தியா து³க்கடம். த்³வீஹி கம்மவாசாஹி து²ல்லச்சயா. கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தியா ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.

அயம்பீதி புரிமாயோ உபாதா³ய வுச்சதி.

யாவததியகந்தி யாவததியம் ஸமனுபா⁴ஸனாய ஆபஜ்ஜதி, ந ஸஹ வத்து²ஜ்ஜா²சாரா.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

713. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

714. அனாபத்தி அஸமனுபா⁴ஸந்தியா, படினிஸ்ஸஜ்ஜந்தியா, உம்மத்திகாய, ஆதி³கம்மிகாயாதி.

ஸத்தமஸங்கா⁴தி³ஸேஸஸிக்கா²பத³ம் நிட்டி²தம்.