4. சதுத்த²ஸங்கா⁴தி³ஸேஸஸிக்கா²பத³ம்

694. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ ப⁴ண்ட³னகாரிகா ஹோதி கலஹகாரிகா விவாத³காரிகா ப⁴ஸ்ஸகாரிகா ஸங்கே⁴ அதி⁴கரணகாரிகா. து²ல்லனந்தா³ பி⁴க்கு²னீ தஸ்ஸா கம்மே கரீயமானே படிக்கோஸதி. தேன கோ² பன ஸமயேன து²ல்லனந்தா³ பி⁴க்கு²னீ கா³மகம் அக³மாஸி கேனசிதே³வ கரணீயேன. அத² கோ² பி⁴க்கு²னிஸங்கோ⁴ – ‘‘து²ல்லனந்தா³ பி⁴க்கு²னீ பக்கந்தா’’தி, சண்ட³காளிம் பி⁴க்கு²னிம் ஆபத்தியா அத³ஸ்ஸனே [அத³ஸ்ஸனேன (க.)] உக்கி²பி. து²ல்லனந்தா³ பி⁴க்கு²னீ கா³மகே தம் கரணீயம் தீரேத்வா புனதே³வ ஸாவத்தி²ம் பச்சாக³ச்சி². சண்ட³காளீ பி⁴க்கு²னீ து²ல்லனந்தா³ய பி⁴க்கு²னியா ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சி². து²ல்லனந்தா³ பி⁴க்கு²னீ சண்ட³காளிம் பி⁴க்கு²னிம் ஏதத³வோச – ‘‘கிஸ்ஸ த்வம், அய்யே, மயி ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சீ²’’தி? ‘‘ஏவஞ்ஹேதம், அய்யே, ஹோதி யதா² தம் அனாதா²யா’’தி. ‘‘கிஸ்ஸ பன த்வம், அய்யே, அனாதா²’’தி? ‘‘இமா மம், அய்யே, பி⁴க்கு²னியோ – ‘‘அயம் அனாதா² அப்பஞ்ஞாதா, நத்தி² இமிஸ்ஸா காசி படிவத்தா’’தி, ஆபத்தியா அத³ஸ்ஸனே [அத³ஸ்ஸனேன (க.)] உக்கி²பிம்ஸூ’’தி.

து²ல்லனந்தா³ பி⁴க்கு²னீ – ‘‘பா³லா ஏதா அப்³யத்தா ஏதா, நேவ ஜானந்தி கம்மம் வா கம்மதோ³ஸம் வா கம்மவிபத்திம் வா கம்மஸம்பத்திம் வா. மயம் கோ² ஜானாம கம்மம்பி கம்மதோ³ஸம்பி கம்மவிபத்திம்பி கம்மஸம்பத்திம்பி. மயம் கோ² அகதம் வா கம்மம் காரேய்யாம கதம் வா கம்மம் கோபேய்யாமா’’தி, லஹும் லஹும் பி⁴க்கு²னிஸங்க⁴ம் ஸன்னிபாதேத்வா சண்ட³காளிம் பி⁴க்கு²னிம் ஓஸாரேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேதீதி [ஓஸாரேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

695. ‘‘யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

696. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸமக்³கோ³ நாம ஸங்கோ⁴ ஸமானஸம்வாஸகோ ஸமானஸீமாயம் டி²தோ.

உக்கி²த்தா நாம ஆபத்தியா அத³ஸ்ஸனே வா அப்படிகம்மே வா அப்படினிஸ்ஸக்³கே³ வா [அத³ஸ்ஸனேன வா அப்படிகம்மேன வா அப்படினிஸ்ஸக்³கே³ன வா (க.), அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா (?)] உக்கி²த்தா.

த⁴ம்மேன வினயேனாதி யேன த⁴ம்மேன யேன வினயேன.

ஸத்து²ஸாஸனேனாதி ஜினஸாஸனேன பு³த்³த⁴ஸாஸனேன.

அனபலோகேத்வா காரகஸங்க⁴ந்தி கம்மகாரகஸங்க⁴ம் அனாபுச்சா².

அனஞ்ஞாய க³ணஸ்ஸ ச²ந்த³ந்தி க³ணஸ்ஸ ச²ந்த³ம் அஜானித்வா.

‘‘ஓஸாரேஸ்ஸாமீ’’தி க³ணம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

அயம்பீதி புரிமாயோ உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

697. த⁴ம்மகம்மே த⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ஓஸாரேதி ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

698. அனாபத்தி கம்மகாரகஸங்க⁴ம் அபலோகேத்வா ஓஸாரேதி, க³ணஸ்ஸ ச²ந்த³ம் ஜானித்வா ஓஸாரேதி, வத்தே வத்தந்திம் ஓஸாரேதி, அஸந்தே கம்மகாரகஸங்கே⁴ ஓஸாரேதி, உம்மத்திகாய, ஆதி³கம்மிகாயாதி.

சதுத்த²ஸங்கா⁴தி³ஸேஸஸிக்கா²பத³ம் நிட்டி²தம்.