2. து³தியஸங்கா⁴தி³ஸேஸஸிக்கா²பத³ம்

682. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன வேஸாலியம் அஞ்ஞதரஸ்ஸ லிச்ச²விஸ்ஸ பஜாபதி அதிசாரினீ ஹோதி. அத² கோ² ஸோ லிச்ச²வி தம் இத்தி²ம் ஏதத³வோச – ‘‘ஸாது⁴ விரமாஹி, அனத்த²ம் கோ² தே கரிஸ்ஸாமீ’’தி. ஏவம்பி ஸா வுச்சமானா நாதி³யி. தேன கோ² பன ஸமயேன வேஸாலியம் லிச்ச²விக³ணோ ஸன்னிபதிதோ ஹோதி கேனசிதே³வ கரணீயேன. அத² கோ² ஸோ லிச்ச²வி தே லிச்ச²வயோ ஏதத³வோச – ‘‘ஏகம் மே, அய்யோ, இத்தி²ம் அனுஜானாதா²’’தி. ‘‘கா நாம ஸா’’தி? ‘‘மய்ஹம் பஜாபதி அதிசரதி, தம் கா⁴தேஸ்ஸாமீ’’தி. ‘‘ஜானாஹீ’’தி. அஸ்ஸோஸி கோ² ஸா இத்தீ² – ‘‘ஸாமிகோ கிர மம் கா⁴தேதுகாமோ’’தி. வரப⁴ண்ட³ம் ஆதா³ய ஸாவத்தி²ம் க³ந்த்வா தித்தி²யே உபஸங்கமித்வா பப்³ப³ஜ்ஜம் யாசி. தித்தி²யா ந இச்சி²ம்ஸு பப்³பா³ஜேதும். பி⁴க்கு²னியோ உபஸங்கமித்வா பப்³ப³ஜ்ஜம் யாசி. பி⁴க்கு²னியோபி ந இச்சி²ம்ஸு பப்³பா³ஜேதும். து²ல்லனந்த³ம் பி⁴க்கு²னிம் உபஸங்கமித்வா ப⁴ண்ட³கம் த³ஸ்ஸேத்வா பப்³ப³ஜ்ஜம் யாசி. து²ல்லனந்தா³ பி⁴க்கு²னீ ப⁴ண்ட³கம் க³ஹேத்வா பப்³பா³ஜேஸி.

அத² கோ² ஸோ லிச்ச²வி தம் இத்தி²ம் க³வேஸந்தோ ஸாவத்தி²ம் க³ந்த்வா பி⁴க்கு²னீஸு பப்³ப³ஜிதம் தி³ஸ்வான யேன ராஜா பஸேனதி³ கோஸலோ தேனுபஸங்கமி; உபஸங்கமித்வா ராஜானம் பஸேனதி³ம் கோஸலம் ஏதத³வோச – ‘‘பஜாபதி மே, தே³வ, வரப⁴ண்ட³ம் ஆதா³ய ஸாவத்தி²ம் அனுப்பத்தா. தம் தே³வோ அனுஜானாதூ’’தி. ‘‘தேன ஹி, ப⁴ணே, விசினித்வா ஆசிக்கா²’’தி. ‘‘தி³ட்டா², தே³வ, பி⁴க்கு²னீஸு பப்³ப³ஜிதா’’தி. ‘‘ஸசே, ப⁴ணே, பி⁴க்கு²னீஸு பப்³ப³ஜிதா, ந ஸா லப்³பா⁴ கிஞ்சி காதும். ஸ்வாக்கா²தோ ப⁴க³வதா த⁴ம்மோ, சரது ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. அத² கோ² ஸோ லிச்ச²வி உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ சோரிம் பப்³பா³ஜேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தஸ்ஸ லிச்ச²விஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ சோரிம் பப்³பா³ஜேஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ சோரிம் பப்³பா³ஜேதீதி [பப்³பா³ஜேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ சோரிம் பப்³பா³ஜேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

683. ‘‘யா பன பி⁴க்கு²னீ ஜானம் சோரிம் வஜ்ஜ²ம் விதி³தம் அனபலோகேத்வா ராஜானம் வா ஸங்க⁴ம் வா க³ணம் வா பூக³ம் வா ஸேணிம் வா அஞ்ஞத்ர கப்பா வுட்டா²பேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி.

684. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஜானாதி நாம ஸாமம் வா ஜானாதி அஞ்ஞே வா தஸ்ஸா ஆரோசேந்தி, ஸா வா ஆரோசேதி.

சோரீ நாம யா பஞ்சமாஸகம் வா அதிரேகபஞ்சமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி, ஏஸா சோரீ நாம.

வஜ்ஜா² நாம யம் கத்வா வஜ்ஜ²ப்பத்தா ஹோதி.

விதி³தா நாம அஞ்ஞேஹி மனுஸ்ஸேஹி ஞாதா ஹோதி ‘‘வஜ்ஜா² ஏஸா’’தி.

அனபலோகேத்வாதி அனாபுச்சா².

ராஜா நாம யத்த² ராஜா அனுஸாஸதி, ராஜா அபலோகேதப்³போ³.

ஸங்கோ⁴ நாம பி⁴க்கு²னிஸங்கோ⁴ வுச்சதி, பி⁴க்கு²னிஸங்கோ⁴ அபலோகேதப்³போ³.

க³ணோ நாம யத்த² க³ணோ அனுஸாஸதி, க³ணோ அபலோகேதப்³போ³.

பூகோ³ நாம யத்த² பூகோ³ அனுஸாஸதி, பூகோ³ அபலோகேதப்³போ³.

ஸேணி நாம யத்த² ஸேணி அனுஸாஸதி, ஸேணி அபலோகேதப்³போ³.

அஞ்ஞத்ர கப்பாதி ட²பேத்வா கப்பம். கப்பம் நாம த்³வே கப்பானி – தித்தி²யேஸு வா பப்³ப³ஜிதா ஹோதி அஞ்ஞாஸு வா பி⁴க்கு²னீஸு பப்³ப³ஜிதா. அஞ்ஞத்ர கப்பா ‘‘வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து²ல்லச்சயா. கம்மவாசாபரியோஸானே உபஜ்ஜா²யாய ஆபத்தி ஸங்கா⁴தி³ஸேஸஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

அயம்பீதி புரிமம் உபாதா³ய வுச்சதி.

பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.

நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.

ஸங்கா⁴தி³ஸேஸந்தி…பே… தேனபி வுச்சதி ஸங்கா⁴தி³ஸேஸோதி.

685. சோரியா சோரிஸஞ்ஞா அஞ்ஞத்ர கப்பா வுட்டா²பேதி, ஆபத்தி ஸங்கா⁴தி³ஸேஸஸ்ஸ. சோரியா வேமதிகா அஞ்ஞத்ர கப்பா வுட்டா²பேதி, ஆபத்தி து³க்கடஸ்ஸ. சோரியா அசோரிஸஞ்ஞா அஞ்ஞத்ர கப்பா வுட்டா²பேதி, அனாபத்தி. அசோரியா சோரிஸஞ்ஞா, ஆபத்தி து³க்கடஸ்ஸ. அசோரியா வேமதிகா, ஆபத்தி து³க்கடஸ்ஸ. அசோரியா அசோரிஸஞ்ஞா, அனாபத்தி.

686. அனாபத்தி அஜானந்தீ வுட்டா²பேதி, அபலோகேத்வா வுட்டா²பேதி, கப்பகதம் வுட்டா²பேதி, உம்மத்திகாய, ஆதி³கம்மிகாயாதி.

து³தியஸங்கா⁴தி³ஸேஸஸிக்கா²பத³ம் நிட்டி²தம்.