1. பட²மபாராஜிகம்

656. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ விஹாரம் கத்துகாமோ ஹோதி. அத² கோ² ஸாள்ஹோ மிகா³ரனத்தா பி⁴க்கு²னியோ உபஸங்கமித்வா ஏதத³வோச – ‘‘இச்சா²மஹம், அய்யே, பி⁴க்கு²னிஸங்க⁴ஸ்ஸ விஹாரம் காதும். தே³த² மே நவகம்மிகம் பி⁴க்கு²னி’’ந்தி. தேன கோ² பன ஸமயேன சதஸ்ஸோ ப⁴கி³னியோ பி⁴க்கு²னீஸு பப்³ப³ஜிதா ஹோந்தி – நந்தா³, நந்த³வதீ, ஸுந்த³ரீனந்தா³, து²ல்லனந்தா³தி. தாஸு ஸுந்த³ரீனந்தா³ பி⁴க்கு²னீ தருணபப்³ப³ஜிதா அபி⁴ரூபா ஹோதி த³ஸ்ஸனீயா பாஸாதி³கா பண்டி³தா ப்³யத்தா மேதா⁴வினீ த³க்கா² அனலஸா, தத்ருபாயாய வீமம்ஸாய ஸமன்னாக³தா, அலம் காதும் அலம் ஸம்விதா⁴தும். அத² கோ² பி⁴க்கு²னிஸங்கோ⁴ ஸுந்த³ரீனந்த³ம் பி⁴க்கு²னிம் ஸம்மன்னித்வா ஸாள்ஹஸ்ஸ மிகா³ரனத்துனோ நவகம்மிகம் அதா³ஸி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ஸாள்ஹஸ்ஸ மிகா³ரனத்துனோ நிவேஸனம் அபி⁴க்க²ணம் க³ச்ச²தி – ‘‘வாஸிம் தே³த², பரஸும் [ப²ரஸும் (ஸ்யா. க.)] தே³த², குடா²ரிம் [குதா⁴ரிம் (க.)] தே³த², குத்³தா³லம் தே³த², நிகா²த³னம் தே³தா²’’தி. ஸாள்ஹோபி மிகா³ரனத்தா பி⁴க்கு²னுபஸ்ஸயம் அபி⁴க்க²ணம் க³ச்ச²தி கதாகதம் ஜானிதும். தே அபி⁴ண்ஹத³ஸ்ஸனேன படிப³த்³த⁴சித்தா அஹேஸும்.

அத² கோ² ஸாள்ஹோ மிகா³ரனத்தா ஸுந்த³ரீனந்த³ம் பி⁴க்கு²னிம் தூ³ஸேதும் ஓகாஸம் அலப⁴மானோ ஏததே³வத்தா²ய பி⁴க்கு²னிஸங்க⁴ஸ்ஸ ப⁴த்தம் அகாஸி. அத² கோ² ஸாள்ஹோ மிகா³ரனத்தா ப⁴த்தக்³கே³ ஆஸனம் பஞ்ஞபேந்தோ – ‘‘ஏத்தகா பி⁴க்கு²னியோ அய்யாய ஸுந்த³ரீனந்தா³ய வுட்³ட⁴தரா’’தி ஏகமந்தம் ஆஸனம் பஞ்ஞபேஸி ‘‘ஏத்தகா நவகதரா’’தி – ஏகமந்தம் ஆஸனம் பஞ்ஞபேஸி. படிச்ச²ன்னே ஓகாஸே நிகூடே ஸுந்த³ரீனந்தா³ய பி⁴க்கு²னியா ஆஸனம் பஞ்ஞபேஸி, யதா² தே²ரா பி⁴க்கு²னியோ ஜானேய்யும் – ‘‘நவகானம் பி⁴க்கு²னீனம் ஸந்திகே நிஸின்னா’’தி; நவகாபி பி⁴க்கு²னியோ ஜானேய்யும் – ‘‘தே²ரானம் பி⁴க்கு²னீனம் ஸந்திகே நிஸின்னா’’தி. அத² கோ² ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ காலம் ஆரோசாபேஸி – ‘‘காலோ, அய்யே, நிட்டி²தம் ப⁴த்த’’ந்தி. ஸுந்த³ரீனந்தா³ பி⁴க்கு²னீ ஸல்லக்கே²த்வா – ‘‘ந ப³ஹுகதோ ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ ப⁴த்தம் அகாஸி; மம் ஸோ தூ³ஸேதுகாமோ. ஸசாஹம் க³மிஸ்ஸாமி விஸ்ஸரோ மே ப⁴விஸ்ஸதீ’’தி, அந்தேவாஸினிம் பி⁴க்கு²னிம் ஆணாபேஸி – ‘‘க³ச்ச² மே பிண்ட³பாதம் நீஹர. யோ சே மம் புச்ச²தி, ‘கி³லானா’தி படிவேதே³ஹீ’’தி. ‘‘ஏவம், அய்யே’’தி கோ² ஸா பி⁴க்கு²னீ ஸுந்த³ரீனந்தா³ய பி⁴க்கு²னியா பச்சஸ்ஸோஸி.

தேன கோ² பன ஸமயேன ஸாள்ஹோ மிகா³ரனத்தா ப³ஹித்³வாரகோட்ட²கே டி²தோ ஹோதி ஸுந்த³ரீனந்த³ம் பி⁴க்கு²னிம் படிபுச்ச²ந்தோ – ‘‘கஹம், அய்யே, அய்யா ஸுந்த³ரீனந்தா³? கஹம், அய்யே, அய்யா ஸுந்த³ரீனந்தா³’’தி? ஏவம் வுத்தே ஸுந்த³ரீனந்தா³ய பி⁴க்கு²னியா அந்தேவாஸினீ பி⁴க்கு²னீ ஸாள்ஹம் மிகா³ரனத்தாரம் ஏதத³வோச – ‘‘கி³லானாவுஸோ; பிண்ட³பாதம் நீஹரிஸ்ஸாமீ’’தி. அத² கோ² ஸாள்ஹோ மிகா³ரனத்தா – ‘‘யம்பாஹம் அத்தா²ய [யம்பாஹம் (ஸ்யா.)] பி⁴க்கு²னிஸங்க⁴ஸ்ஸ ப⁴த்தம் அகாஸிம் அய்யாய ஸுந்த³ரீனந்தா³ய காரணா’’தி மனுஸ்ஸே ஆணாபேத்வா – ‘‘பி⁴க்கு²னிஸங்க⁴ம் ப⁴த்தேன பரிவிஸதா²’’தி வத்வா யேன பி⁴க்கு²னுபஸ்ஸயோ தேனுபஸங்கமி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ப³ஹாராமகோட்ட²கே டி²தா ஹோதி ஸாள்ஹம் மிகா³ரனத்தாரம் பதிமானேந்தீ. அத்³த³ஸா கோ² ஸுந்த³ரீனந்தா³ பி⁴க்கு²னீ ஸாள்ஹம் மிகா³ரனத்தாரம் தூ³ரதோவ ஆக³ச்ச²ந்தம். தி³ஸ்வான உபஸ்ஸயம் பவிஸித்வா ஸஸீஸம் பாருபித்வா மஞ்சகே நிபஜ்ஜி. அத² கோ² ஸாள்ஹோ மிகா³ரனத்தா யேன ஸுந்த³ரீனந்தா³ பி⁴க்கு²னீ தேனுபஸங்கமி; உபஸங்கமித்வா ஸுந்த³ரீனந்த³ம் பி⁴க்கு²னிம் ஏதத³வோச – ‘‘கிம் தே, அய்யே, அபா²ஸு, கிஸ்ஸ நிபன்னாஸீ’’தி? ‘‘ஏவஞ்ஹேதம், ஆவுஸோ, ஹோதி யா அனிச்ச²ந்தம் இச்ச²தீ’’தி. ‘‘க்யாஹம் தம், அய்யே, ந இச்சி²ஸ்ஸாமி? அபி சாஹம் ஓகாஸம் ந லபா⁴மி தம் தூ³ஸேது’’ந்தி. அவஸ்ஸுதோ அவஸ்ஸுதாய ஸுந்த³ரீனந்தா³ய பி⁴க்கு²னியா காயஸம்ஸக்³க³ம் ஸமாபஜ்ஜி.

தேன கோ² பன ஸமயேன அஞ்ஞதரா பி⁴க்கு²னீ ஜராது³ப்³ப³லா சரணகி³லானா ஸுந்த³ரீனந்தா³ய பி⁴க்கு²னியா அவிதூ³ரே நிபன்னா ஹோதி. அத்³த³ஸா கோ² ஸா பி⁴க்கு²னீ ஸாள்ஹம் மிகா³ரனத்தாரம் அவஸ்ஸுதம் அவஸ்ஸுதாய ஸுந்த³ரீனந்தா³ய பி⁴க்கு²னியா காயஸம்ஸக்³க³ம் ஸமாபஜ்ஜந்தம். தி³ஸ்வான உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி! அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா² ஸந்துட்டா² லஜ்ஜினியோ குக்குச்சிகா ஸிக்கா²காமா தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி!

அத² கோ² தே பி⁴க்கூ² ஸுந்த³ரீனந்த³ம் பி⁴க்கு²னிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யதீ’’தி [ஸாதி³யீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, ஸுந்த³ரீனந்தா³ய பி⁴க்கு²னியா அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய. அத² க்²வேதம், பி⁴க்க²வே, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானம் அஞ்ஞத²த்தாயா’’தி. அத² கோ² ப⁴க³வா ஸுந்த³ரீனந்த³ம் பி⁴க்கு²னிம் அனேகபரியாயேன விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய [அஸந்துட்ட²தாய (ஸ்யா.), அஸந்துட்டி²யா (க.)] ஸங்க³ணிகாய கோஸஜ்ஜஸ்ஸ அவண்ணம் பா⁴ஸித்வா, அனேகபரியாயேன ஸுப⁴ரதாய ஸுபோஸதாய அப்பிச்ச²ஸ்ஸ ஸந்துட்ட²ஸ்ஸ [ஸந்துட்டி²யா (க.)] ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணம் பா⁴ஸித்வா, பி⁴க்கூ²னம் தத³னுச்ச²விகம் தத³னுலோமிகம் த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனம் பி⁴க்கு²னீனம் நிக்³க³ஹாய, பேஸலானம் பி⁴க்கு²னீனம் பா²ஸுவிஹாராய, தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாய, அப்பஸன்னானம் பஸாதா³ய, பஸன்னானம் பி⁴ய்யோபா⁴வாய, ஸத்³த⁴ம்மட்டி²தியா வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

657. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கம் உப்³ப⁴ஜாணுமண்ட³லம் ஆமஸனம் வா பராமஸனம் வா க³ஹணம் வா சு²பனம் வா படிபீளனம் வா ஸாதி³யேய்ய, அயம்பி பாராஜிகா ஹோதி அஸம்வாஸா உப்³ப⁴ஜாணுமண்ட³லிகா’’தி.

658. யா பனாதி யா யாதி³ஸா யதா²யுத்தா யதா²ஜச்சா யதா²னாமா யதா²கோ³த்தா யதா²ஸீலா யதா²விஹாரினீ யதா²கோ³சரா தே²ரா வா நவா வா மஜ்ஜி²மா வா, ஏஸா வுச்சதி யா பனாதி.

பி⁴க்கு²னீதி பி⁴க்கி²காதி பி⁴க்கு²னீ; பி⁴க்கா²சரியம் அஜ்ஜு²பக³தாதி பி⁴க்கு²னீ; பி⁴ன்னபடத⁴ராதி பி⁴க்கு²னீ; ஸமஞ்ஞாய பி⁴க்கு²னீ; படிஞ்ஞாய பி⁴க்கு²னீ; ஏஹி பி⁴க்கு²னீதி பி⁴க்கு²னீ; தீஹி ஸரணக³மனேஹி உபஸம்பன்னாதி பி⁴க்கு²னீ; ப⁴த்³ரா பி⁴க்கு²னீ; ஸாரா பி⁴க்கு²னீ; ஸேகா² பி⁴க்கு²னீ; அஸேகா² பி⁴க்கு²னீ; ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னாதி பி⁴க்கு²னீ. தத்ர யாயம் பி⁴க்கு²னீ ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னா, அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அவஸ்ஸுதா நாம ஸாரத்தா அபேக்க²வதீ படிப³த்³த⁴சித்தா.

அவஸ்ஸுதோ நாம ஸாரத்தோ அபேக்க²வா படிப³த்³த⁴சித்தோ.

புரிஸபுக்³க³லோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ காயஸம்ஸக்³க³ம் ஸமாபஜ்ஜிதும்.

அத⁴க்க²கந்தி ஹேட்ட²க்க²கம்.

உப்³ப⁴ஜாணுமண்ட³லந்தி உபரிஜாணுமண்ட³லம்.

ஆமஸனம் நாம ஆமட்ட²மத்தம்.

பராமஸனம் நாம இதோசிதோ ச ஸஞ்சோபனம்.

க³ஹணம் நாம க³ஹிதமத்தம்.

சு²பனம் நாம பு²ட்ட²மத்தம்.

படிபீளனம் வா ஸாதி³யேய்யாதி அங்க³ம் க³ஹேத்வா நிப்பீளனம் ஸாதி³யதி.

அயம்பீதி புரிமாயோ உபாதா³ய வுச்சதி.

பாராஜிகா ஹோதீதி ஸேய்யதா²பி நாம புரிஸோ ஸீஸச்சி²ன்னோ அப⁴ப்³போ³ தேன ஸரீரப³ந்த⁴னேன ஜீவிதும், ஏவமேவ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கம் உப்³ப⁴ஜாணுமண்ட³லம் ஆமஸனம் வா பராமஸனம் வா க³ஹணம் வா சு²பனம் வா படிபீளனம் வா ஸாதி³யந்தீ அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

அஸம்வாஸாதி ஸம்வாஸோ நாம ஏககம்மம் ஏகுத்³தே³ஸோ ஸமஸிக்க²தா, ஏஸோ ஸம்வாஸோ நாம. ஸோ தாய ஸத்³தி⁴ம் நத்தி², தேன வுச்சதி அஸம்வாஸாதி.

659. உப⁴தோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி பாராஜிகஸ்ஸ. காயேன காயபடிப³த்³த⁴ம் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயம் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

நிஸ்ஸக்³கி³யேன காயம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி து³க்கடஸ்ஸ.

உப்³ப⁴க்க²கம் அதோ⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

660. ஏகதோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

உப்³ப⁴க்க²கம் அதோ⁴ஜாணுமண்ட³லம் காயேன காயம் ஆமஸதி, ஆபத்தி து³க்கடஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

661. உப⁴தோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

662. ஏகதோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து³க்கடஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

663. அனாபத்தி அஸஞ்சிச்ச, அஸ்ஸதியா, அஜானந்தியா, அஸாதி³யந்தியா, உம்மத்திகாய, கி²த்தசித்தாய, வேத³னாட்டாய, ஆதி³கம்மிகாயாதி.

பட²மபாராஜிகம் ஸமத்தம் [பி⁴க்கு²னிவிப⁴ங்கே³ ஸிக்கா²பத³க³ணனா பி⁴க்கூ²ஹி§அஸாதா⁴ரணவஸேன பகாஸிதாதி வேதி³தப்³பா³].