1. பாராஜிககண்ட³ம் (பி⁴க்கு²னீவிப⁴ங்கோ³)

1. பட²மபாராஜிகம்

656. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ விஹாரம் கத்துகாமோ ஹோதி. அத² கோ² ஸாள்ஹோ மிகா³ரனத்தா பி⁴க்கு²னியோ உபஸங்கமித்வா ஏதத³வோச – ‘‘இச்சா²மஹம், அய்யே, பி⁴க்கு²னிஸங்க⁴ஸ்ஸ விஹாரம் காதும். தே³த² மே நவகம்மிகம் பி⁴க்கு²னி’’ந்தி. தேன கோ² பன ஸமயேன சதஸ்ஸோ ப⁴கி³னியோ பி⁴க்கு²னீஸு பப்³ப³ஜிதா ஹோந்தி – நந்தா³, நந்த³வதீ, ஸுந்த³ரீனந்தா³, து²ல்லனந்தா³தி. தாஸு ஸுந்த³ரீனந்தா³ பி⁴க்கு²னீ தருணபப்³ப³ஜிதா அபி⁴ரூபா ஹோதி த³ஸ்ஸனீயா பாஸாதி³கா பண்டி³தா ப்³யத்தா மேதா⁴வினீ த³க்கா² அனலஸா, தத்ருபாயாய வீமம்ஸாய ஸமன்னாக³தா, அலம் காதும் அலம் ஸம்விதா⁴தும். அத² கோ² பி⁴க்கு²னிஸங்கோ⁴ ஸுந்த³ரீனந்த³ம் பி⁴க்கு²னிம் ஸம்மன்னித்வா ஸாள்ஹஸ்ஸ மிகா³ரனத்துனோ நவகம்மிகம் அதா³ஸி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ஸாள்ஹஸ்ஸ மிகா³ரனத்துனோ நிவேஸனம் அபி⁴க்க²ணம் க³ச்ச²தி – ‘‘வாஸிம் தே³த², பரஸும் [ப²ரஸும் (ஸ்யா. க.)] தே³த², குடா²ரிம் [குதா⁴ரிம் (க.)] தே³த², குத்³தா³லம் தே³த², நிகா²த³னம் தே³தா²’’தி. ஸாள்ஹோபி மிகா³ரனத்தா பி⁴க்கு²னுபஸ்ஸயம் அபி⁴க்க²ணம் க³ச்ச²தி கதாகதம் ஜானிதும். தே அபி⁴ண்ஹத³ஸ்ஸனேன படிப³த்³த⁴சித்தா அஹேஸும்.

அத² கோ² ஸாள்ஹோ மிகா³ரனத்தா ஸுந்த³ரீனந்த³ம் பி⁴க்கு²னிம் தூ³ஸேதும் ஓகாஸம் அலப⁴மானோ ஏததே³வத்தா²ய பி⁴க்கு²னிஸங்க⁴ஸ்ஸ ப⁴த்தம் அகாஸி. அத² கோ² ஸாள்ஹோ மிகா³ரனத்தா ப⁴த்தக்³கே³ ஆஸனம் பஞ்ஞபேந்தோ – ‘‘ஏத்தகா பி⁴க்கு²னியோ அய்யாய ஸுந்த³ரீனந்தா³ய வுட்³ட⁴தரா’’தி ஏகமந்தம் ஆஸனம் பஞ்ஞபேஸி ‘‘ஏத்தகா நவகதரா’’தி – ஏகமந்தம் ஆஸனம் பஞ்ஞபேஸி. படிச்ச²ன்னே ஓகாஸே நிகூடே ஸுந்த³ரீனந்தா³ய பி⁴க்கு²னியா ஆஸனம் பஞ்ஞபேஸி, யதா² தே²ரா பி⁴க்கு²னியோ ஜானேய்யும் – ‘‘நவகானம் பி⁴க்கு²னீனம் ஸந்திகே நிஸின்னா’’தி; நவகாபி பி⁴க்கு²னியோ ஜானேய்யும் – ‘‘தே²ரானம் பி⁴க்கு²னீனம் ஸந்திகே நிஸின்னா’’தி. அத² கோ² ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ காலம் ஆரோசாபேஸி – ‘‘காலோ, அய்யே, நிட்டி²தம் ப⁴த்த’’ந்தி. ஸுந்த³ரீனந்தா³ பி⁴க்கு²னீ ஸல்லக்கே²த்வா – ‘‘ந ப³ஹுகதோ ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ ப⁴த்தம் அகாஸி; மம் ஸோ தூ³ஸேதுகாமோ. ஸசாஹம் க³மிஸ்ஸாமி விஸ்ஸரோ மே ப⁴விஸ்ஸதீ’’தி, அந்தேவாஸினிம் பி⁴க்கு²னிம் ஆணாபேஸி – ‘‘க³ச்ச² மே பிண்ட³பாதம் நீஹர. யோ சே மம் புச்ச²தி, ‘கி³லானா’தி படிவேதே³ஹீ’’தி. ‘‘ஏவம், அய்யே’’தி கோ² ஸா பி⁴க்கு²னீ ஸுந்த³ரீனந்தா³ய பி⁴க்கு²னியா பச்சஸ்ஸோஸி.

தேன கோ² பன ஸமயேன ஸாள்ஹோ மிகா³ரனத்தா ப³ஹித்³வாரகோட்ட²கே டி²தோ ஹோதி ஸுந்த³ரீனந்த³ம் பி⁴க்கு²னிம் படிபுச்ச²ந்தோ – ‘‘கஹம், அய்யே, அய்யா ஸுந்த³ரீனந்தா³? கஹம், அய்யே, அய்யா ஸுந்த³ரீனந்தா³’’தி? ஏவம் வுத்தே ஸுந்த³ரீனந்தா³ய பி⁴க்கு²னியா அந்தேவாஸினீ பி⁴க்கு²னீ ஸாள்ஹம் மிகா³ரனத்தாரம் ஏதத³வோச – ‘‘கி³லானாவுஸோ; பிண்ட³பாதம் நீஹரிஸ்ஸாமீ’’தி. அத² கோ² ஸாள்ஹோ மிகா³ரனத்தா – ‘‘யம்பாஹம் அத்தா²ய [யம்பாஹம் (ஸ்யா.)] பி⁴க்கு²னிஸங்க⁴ஸ்ஸ ப⁴த்தம் அகாஸிம் அய்யாய ஸுந்த³ரீனந்தா³ய காரணா’’தி மனுஸ்ஸே ஆணாபேத்வா – ‘‘பி⁴க்கு²னிஸங்க⁴ம் ப⁴த்தேன பரிவிஸதா²’’தி வத்வா யேன பி⁴க்கு²னுபஸ்ஸயோ தேனுபஸங்கமி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ப³ஹாராமகோட்ட²கே டி²தா ஹோதி ஸாள்ஹம் மிகா³ரனத்தாரம் பதிமானேந்தீ. அத்³த³ஸா கோ² ஸுந்த³ரீனந்தா³ பி⁴க்கு²னீ ஸாள்ஹம் மிகா³ரனத்தாரம் தூ³ரதோவ ஆக³ச்ச²ந்தம். தி³ஸ்வான உபஸ்ஸயம் பவிஸித்வா ஸஸீஸம் பாருபித்வா மஞ்சகே நிபஜ்ஜி. அத² கோ² ஸாள்ஹோ மிகா³ரனத்தா யேன ஸுந்த³ரீனந்தா³ பி⁴க்கு²னீ தேனுபஸங்கமி; உபஸங்கமித்வா ஸுந்த³ரீனந்த³ம் பி⁴க்கு²னிம் ஏதத³வோச – ‘‘கிம் தே, அய்யே, அபா²ஸு, கிஸ்ஸ நிபன்னாஸீ’’தி? ‘‘ஏவஞ்ஹேதம், ஆவுஸோ, ஹோதி யா அனிச்ச²ந்தம் இச்ச²தீ’’தி. ‘‘க்யாஹம் தம், அய்யே, ந இச்சி²ஸ்ஸாமி? அபி சாஹம் ஓகாஸம் ந லபா⁴மி தம் தூ³ஸேது’’ந்தி. அவஸ்ஸுதோ அவஸ்ஸுதாய ஸுந்த³ரீனந்தா³ய பி⁴க்கு²னியா காயஸம்ஸக்³க³ம் ஸமாபஜ்ஜி.

தேன கோ² பன ஸமயேன அஞ்ஞதரா பி⁴க்கு²னீ ஜராது³ப்³ப³லா சரணகி³லானா ஸுந்த³ரீனந்தா³ய பி⁴க்கு²னியா அவிதூ³ரே நிபன்னா ஹோதி. அத்³த³ஸா கோ² ஸா பி⁴க்கு²னீ ஸாள்ஹம் மிகா³ரனத்தாரம் அவஸ்ஸுதம் அவஸ்ஸுதாய ஸுந்த³ரீனந்தா³ய பி⁴க்கு²னியா காயஸம்ஸக்³க³ம் ஸமாபஜ்ஜந்தம். தி³ஸ்வான உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி! அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா² ஸந்துட்டா² லஜ்ஜினியோ குக்குச்சிகா ஸிக்கா²காமா தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதீ’’தி!

அத² கோ² தே பி⁴க்கூ² ஸுந்த³ரீனந்த³ம் பி⁴க்கு²னிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யதீ’’தி [ஸாதி³யீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, ஸுந்த³ரீனந்தா³ய பி⁴க்கு²னியா அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய. அத² க்²வேதம், பி⁴க்க²வே, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானம் அஞ்ஞத²த்தாயா’’தி. அத² கோ² ப⁴க³வா ஸுந்த³ரீனந்த³ம் பி⁴க்கு²னிம் அனேகபரியாயேன விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய [அஸந்துட்ட²தாய (ஸ்யா.), அஸந்துட்டி²யா (க.)] ஸங்க³ணிகாய கோஸஜ்ஜஸ்ஸ அவண்ணம் பா⁴ஸித்வா, அனேகபரியாயேன ஸுப⁴ரதாய ஸுபோஸதாய அப்பிச்ச²ஸ்ஸ ஸந்துட்ட²ஸ்ஸ [ஸந்துட்டி²யா (க.)] ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணம் பா⁴ஸித்வா, பி⁴க்கூ²னம் தத³னுச்ச²விகம் தத³னுலோமிகம் த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனம் பி⁴க்கு²னீனம் நிக்³க³ஹாய, பேஸலானம் பி⁴க்கு²னீனம் பா²ஸுவிஹாராய, தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாய, அப்பஸன்னானம் பஸாதா³ய, பஸன்னானம் பி⁴ய்யோபா⁴வாய, ஸத்³த⁴ம்மட்டி²தியா வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

657. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கம் உப்³ப⁴ஜாணுமண்ட³லம் ஆமஸனம் வா பராமஸனம் வா க³ஹணம் வா சு²பனம் வா படிபீளனம் வா ஸாதி³யேய்ய, அயம்பி பாராஜிகா ஹோதி அஸம்வாஸா உப்³ப⁴ஜாணுமண்ட³லிகா’’தி.

658. யா பனாதி யா யாதி³ஸா யதா²யுத்தா யதா²ஜச்சா யதா²னாமா யதா²கோ³த்தா யதா²ஸீலா யதா²விஹாரினீ யதா²கோ³சரா தே²ரா வா நவா வா மஜ்ஜி²மா வா, ஏஸா வுச்சதி யா பனாதி.

பி⁴க்கு²னீதி பி⁴க்கி²காதி பி⁴க்கு²னீ; பி⁴க்கா²சரியம் அஜ்ஜு²பக³தாதி பி⁴க்கு²னீ; பி⁴ன்னபடத⁴ராதி பி⁴க்கு²னீ; ஸமஞ்ஞாய பி⁴க்கு²னீ; படிஞ்ஞாய பி⁴க்கு²னீ; ஏஹி பி⁴க்கு²னீதி பி⁴க்கு²னீ; தீஹி ஸரணக³மனேஹி உபஸம்பன்னாதி பி⁴க்கு²னீ; ப⁴த்³ரா பி⁴க்கு²னீ; ஸாரா பி⁴க்கு²னீ; ஸேகா² பி⁴க்கு²னீ; அஸேகா² பி⁴க்கு²னீ; ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னாதி பி⁴க்கு²னீ. தத்ர யாயம் பி⁴க்கு²னீ ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னா, அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அவஸ்ஸுதா நாம ஸாரத்தா அபேக்க²வதீ படிப³த்³த⁴சித்தா.

அவஸ்ஸுதோ நாம ஸாரத்தோ அபேக்க²வா படிப³த்³த⁴சித்தோ.

புரிஸபுக்³க³லோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ காயஸம்ஸக்³க³ம் ஸமாபஜ்ஜிதும்.

அத⁴க்க²கந்தி ஹேட்ட²க்க²கம்.

உப்³ப⁴ஜாணுமண்ட³லந்தி உபரிஜாணுமண்ட³லம்.

ஆமஸனம் நாம ஆமட்ட²மத்தம்.

பராமஸனம் நாம இதோசிதோ ச ஸஞ்சோபனம்.

க³ஹணம் நாம க³ஹிதமத்தம்.

சு²பனம் நாம பு²ட்ட²மத்தம்.

படிபீளனம் வா ஸாதி³யேய்யாதி அங்க³ம் க³ஹேத்வா நிப்பீளனம் ஸாதி³யதி.

அயம்பீதி புரிமாயோ உபாதா³ய வுச்சதி.

பாராஜிகா ஹோதீதி ஸேய்யதா²பி நாம புரிஸோ ஸீஸச்சி²ன்னோ அப⁴ப்³போ³ தேன ஸரீரப³ந்த⁴னேன ஜீவிதும், ஏவமேவ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கம் உப்³ப⁴ஜாணுமண்ட³லம் ஆமஸனம் வா பராமஸனம் வா க³ஹணம் வா சு²பனம் வா படிபீளனம் வா ஸாதி³யந்தீ அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

அஸம்வாஸாதி ஸம்வாஸோ நாம ஏககம்மம் ஏகுத்³தே³ஸோ ஸமஸிக்க²தா, ஏஸோ ஸம்வாஸோ நாம. ஸோ தாய ஸத்³தி⁴ம் நத்தி², தேன வுச்சதி அஸம்வாஸாதி.

659. உப⁴தோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி பாராஜிகஸ்ஸ. காயேன காயபடிப³த்³த⁴ம் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயம் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

நிஸ்ஸக்³கி³யேன காயம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி து³க்கடஸ்ஸ.

உப்³ப⁴க்க²கம் அதோ⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

660. ஏகதோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

உப்³ப⁴க்க²கம் அதோ⁴ஜாணுமண்ட³லம் காயேன காயம் ஆமஸதி, ஆபத்தி து³க்கடஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

661. உப⁴தோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

662. ஏகதோஅவஸ்ஸுதே அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து³க்கடஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

663. அனாபத்தி அஸஞ்சிச்ச, அஸ்ஸதியா, அஜானந்தியா, அஸாதி³யந்தியா, உம்மத்திகாய, கி²த்தசித்தாய, வேத³னாட்டாய, ஆதி³கம்மிகாயாதி.

பட²மபாராஜிகம் ஸமத்தம் [பி⁴க்கு²னிவிப⁴ங்கே³ ஸிக்கா²பத³க³ணனா பி⁴க்கூ²ஹி§அஸாதா⁴ரணவஸேன பகாஸிதாதி வேதி³தப்³பா³].

2. து³தியபாராஜிகம்

664. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ ஸாள்ஹேன மிகா³ரனத்துனா க³ப்³பி⁴னீ ஹோதி. யாவ க³ப்³போ⁴ தருணோ அஹோஸி தாவ சா²தே³ஸி. பரிபக்கே க³ப்³பே⁴ விப்³ப⁴மித்வா விஜாயி. பி⁴க்கு²னியோ து²ல்லனந்த³ம் பி⁴க்கு²னிம் ஏதத³வோசும் – ‘‘ஸுந்த³ரீனந்தா³ கோ², அய்யே, அசிரவிப்³ப⁴ந்தா விஜாதா. கச்சி நோ ஸா பி⁴க்கு²னீயேவ ஸமானா க³ப்³பி⁴னீ’’தி? ‘‘ஏவம், அய்யே’’தி. ‘‘கிஸ்ஸ பன த்வம், அய்யே, ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ஸி ந க³ணஸ்ஸ ஆரோசேஸீ’’தி? ‘‘யோ ஏதிஸ்ஸா அவண்ணோ மய்ஹேஸோ அவண்ணோ, யா ஏதிஸ்ஸா அகித்தி மய்ஹேஸா அகித்தி, யோ ஏதிஸ்ஸா அயஸோ மய்ஹேஸோ அயஸோ, யோ ஏதிஸ்ஸா அலாபோ⁴ மய்ஹேஸோ அலாபோ⁴. க்யாஹம், அய்யே, அத்தனோ அவண்ணம் அத்தனோ அகித்திம் அத்தனோ அயஸம் அத்தனோ அலாப⁴ம் பரேஸம் ஆரோசேஸ்ஸாமீ’’தி? யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ஸ்ஸதி ந க³ணஸ்ஸ ஆரோசேஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² [யே தே பி⁴க்கூ²…பே… (?)] ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³தி [படிசோதே³ஸி… ஆரோசேஸீதி (க.)] ந க³ணஸ்ஸ ஆரோசேதீ’’தி [படிசோதே³ஸி… ஆரோசேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ஸ்ஸதி ந க³ணஸ்ஸ ஆரோசேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

665. ‘‘யா பன பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ய்ய ந க³ணஸ்ஸ ஆரோசேய்ய, யதா³ ச ஸா டி²தா வா அஸ்ஸ சுதா வா நாஸிதா வா அவஸ்ஸடா வா, ஸா பச்சா² ஏவம் வதே³ய்ய – ‘புப்³பே³வாஹம், அய்யே, அஞ்ஞாஸிம் ஏதம் பி⁴க்கு²னிம் ஏவரூபா ச ஏவரூபா ச ஸா ப⁴கி³னீதி, நோ ச கோ² அத்தனா படிசோதே³ஸ்ஸம் ந க³ணஸ்ஸ ஆரோசேஸ்ஸ’ந்தி, அயம்பி பாராஜிகா ஹோதி அஸம்வாஸா வஜ்ஜப்படிச்சா²தி³கா’’தி.

666. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஜானாதி நாம ஸாமம் வா ஜானாதி, அஞ்ஞே வா தஸ்ஸா ஆரோசேந்தி, ஸா வா ஆரோசேதி.

பாராஜிகம் த⁴ம்மம் அஜ்ஜா²பன்னந்தி அட்ட²ன்னம் பாராஜிகானம் அஞ்ஞதரம் பாராஜிகம் அஜ்ஜா²பன்னம்.

நேவத்தனா படிசோதே³ய்யாதி ந ஸயம் சோதே³ய்ய.

ந க³ணஸ்ஸ ஆரோசேய்யாதி ந அஞ்ஞாஸம் பி⁴க்கு²னீனம் ஆரோசேய்ய.

யதா³ ச ஸா டி²தா வா அஸ்ஸ சுதா வாதி டி²தா நாம ஸலிங்கே³ டி²தா வுச்சதி. சுதா நாம காலங்கதா வுச்சதி. நாஸிதா நாம ஸயம் வா விப்³ப⁴ந்தா ஹோதி அஞ்ஞேஹி வா நாஸிதா. அவஸ்ஸடா நாம தித்தா²யதனம் ஸங்கந்தா வுச்சதி. ஸா பச்சா² ஏவம் வதே³ய்ய – ‘‘புப்³பே³வாஹம், அய்யே, அஞ்ஞாஸிம் ஏதம் பி⁴க்கு²னிம் ஏவரூபா ச ஏவரூபா ச ஸா ப⁴கி³னீ’’தி.

நோ ச கோ² அத்தனா படிசோதே³ஸ்ஸந்தி ஸயம் வா ந சோதே³ஸ்ஸம்.

ந க³ணஸ்ஸ ஆரோசேஸ்ஸந்தி ந அஞ்ஞாஸம் பி⁴க்கு²னீனம் ஆரோசேஸ்ஸம்.

அயம்பீதி புரிமாயோ உபாதா³ய வுச்சதி.

பாராஜிகா ஹோதீதி ஸேய்யதா²பி நாம பண்டு³பலாஸோ ப³ந்த⁴னா பமுத்தோ அப⁴ப்³போ³ ஹரிதத்தா²ய, ஏவமேவ பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ஸ்ஸாமி ந க³ணஸ்ஸ ஆரோசேஸ்ஸாமீதி து⁴ரம் நிக்கி²த்தமத்தே அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

அஸம்வாஸாதி ஸம்வாஸோ நாம ஏககம்மம் ஏகுத்³தே³ஸோ ஸமஸிக்க²தா. ஏஸோ ஸம்வாஸோ நாம. ஸோ தாய ஸத்³தி⁴ம் நத்தி². தேன வுச்சதி அஸம்வாஸாதி.

667. அனாபத்தி ‘‘ஸங்க⁴ஸ்ஸ ப⁴ண்ட³னம் வா கலஹோ வா விக்³க³ஹோ வா விவாதோ³ வா ப⁴விஸ்ஸதீ’’தி நாரோசேதி, ‘‘ஸங்க⁴பே⁴தோ³ வா ஸங்க⁴ராஜி வா ப⁴விஸ்ஸதீ’’தி நாரோசேதி, ‘‘அயம் கக்க²ளா ப²ருஸா ஜீவிதந்தராயம் வா ப்³ரஹ்மசரியந்தராயம் வா கரிஸ்ஸதீ’’தி நாரோசேதி, அஞ்ஞா பதிரூபா பி⁴க்கு²னியோ அபஸ்ஸந்தீ நாரோசேதி, நச்சா²தே³துகாமா நாரோசேதி, பஞ்ஞாயிஸ்ஸதி ஸகேன கம்மேனாதி நாரோசேதி, உம்மத்திகாய…பே… ஆதி³கம்மிகாயாதி.

து³தியபாராஜிகம் ஸமத்தம்.

3. ததியபாராஜிகம்

668. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் அனுவத்ததி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் அனுவத்திஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் அனுவத்ததீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் அனுவத்திஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

669. ‘‘யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²ம் த⁴ம்மேன வினயேன ஸத்து²ஸாஸனேன அனாத³ரம் அப்படிகாரம் அகதஸஹாயம் தமனுவத்தேய்ய, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘ஏஸோ கோ², அய்யே, பி⁴க்கு² ஸமக்³கே³ன ஸங்கே⁴ன உக்கி²த்தோ த⁴ம்மேன வினயேன ஸத்து²ஸாஸனேன அனாத³ரோ அப்படிகாரோ அகதஸஹாயோ, மாய்யே, ஏதம் பி⁴க்கு²ம் அனுவத்தீ’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியம் சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம். நோ சே படினிஸ்ஸஜ்ஜேய்ய, அயம்பி பாராஜிகா ஹோதி அஸம்வாஸா உக்கி²த்தானுவத்திகா’’தி.

670. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸமக்³கோ³ நாம ஸங்கோ⁴ ஸமானஸம்வாஸகோ ஸமானஸீமாயம் டி²தோ.

உக்கி²த்தோ நாம ஆபத்தியா அத³ஸ்ஸனே வா அப்படிகம்மே வா அப்படினிஸ்ஸக்³கே³ வா [அத³ஸ்ஸனேன வா அப்படிகம்மேன வா அப்படினிஸ்ஸக்³கே³ன வா (க.), அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா (?)] உக்கி²த்தோ.

த⁴ம்மேன வினயேனாதி யேன த⁴ம்மேன யேன வினயேன.

ஸத்து²ஸாஸனேனாதி ஜினஸாஸனேன பு³த்³த⁴ஸாஸனேன.

அனாத³ரோ நாம ஸங்க⁴ம் வா க³ணம் வா புக்³க³லம் வா கம்மம் வா நாதி³யதி.

அப்படிகாரோ நாம உக்கி²த்தோ அனோஸாரிதோ.

அகதஸஹாயோ நாம ஸமானஸம்வாஸகா பி⁴க்கூ² வுச்சந்தி ஸஹாயா. ஸோ தேஹி ஸத்³தி⁴ம் நத்தி², தேன வுச்சதி அகதஸஹாயோதி.

தமனுவத்தேய்யாதி யம்தி³ட்டி²கோ ஸோ ஹோதி யம்க²ந்திகோ யம்ருசிகோ, ஸாபி தம்தி³ட்டி²கா ஹோதி தம்க²ந்திகா தம்ருசிகா.

ஸா பி⁴க்கு²னீதி யா ஸா உக்கி²த்தானுவத்திகா பி⁴க்கு²னீ.

பி⁴க்கு²னீஹீதி அஞ்ஞாஹி பி⁴க்கு²னீஹி. யா பஸ்ஸந்தி யா ஸுணந்தி தாஹி வத்தப்³பா³ – ‘‘ஏஸோ கோ², அய்யே, பி⁴க்கு² ஸமக்³கே³ன ஸங்கே⁴ன உக்கி²த்தோ த⁴ம்மேன வினயேன ஸத்து²ஸாஸனேன அனாத³ரோ அப்படிகாரோ அகதஸஹாயோ. மாய்யே, ஏதம் பி⁴க்கு²ம் அனுவத்தீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸா பி⁴க்கு²னீ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘ஏஸோ கோ², அய்யே, பி⁴க்கு² ஸமக்³கே³ன ஸங்கே⁴ன உக்கி²த்தோ த⁴ம்மேன வினயேன ஸத்து²ஸாஸனேன அனாத³ரோ அப்படிகாரோ அகதஸஹாயோ. மாய்யே, ஏதம் பி⁴க்கு²ம் அனுவத்தீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதம் குஸலம். நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸா பி⁴க்கு²னீ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

671. ‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²ம் த⁴ம்மேன வினயேன ஸத்து²ஸாஸனேன அனாத³ரம் அப்படிகாரம் அகதஸஹாயம் தமனுவத்ததி, ஸா தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. அயம் இத்த²ன்னாமா பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²ம் த⁴ம்மேன வினயேன ஸத்து²ஸாஸனேன அனாத³ரம் அப்படிகாரம் அகதஸஹாயம் தமனுவத்ததி. ஸா தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²னிம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய பி⁴க்கு²னியா ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி, ஸா பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டா² ஸங்கே⁴ன இத்த²ன்னாமா பி⁴க்கு²னீ தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசா பரியோஸானே ஆபத்தி பாராஜிகஸ்ஸ.

அயம்பீதி புரிமாயோ உபாதா³ய வுச்சதி.

பாராஜிகா ஹோதீதி ஸேய்யதா²பி நாம புது²ஸிலா த்³வேதா⁴ பி⁴ன்னா அப்படிஸந்தி⁴கா ஹோதி, ஏவமேவ பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

672. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி பாராஜிகஸ்ஸ. த⁴ம்மகம்மே வேமதிகா ந படினிஸ்ஸஜ்ஜதி, ஆபத்தி பாராஜிகஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி பாராஜிகஸ்ஸ.

அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.

673. அனாபத்தி அஸமனுபா⁴ஸந்தியா, படினிஸ்ஸஜ்ஜந்தியா, உம்மத்திகாய…பே… ஆதி³கம்மிகாயாதி.

ததியபாராஜிகம் ஸமத்தம்.

4. சதுத்த²பாராஜிகம்

674. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம்பி ஸாதி³யந்தி, ஸங்கா⁴டிகண்ணக்³க³ஹணம்பி ஸாதி³யந்தி, ஸந்திட்ட²ந்திபி, ஸல்லபந்திபி, ஸங்கேதம்பி க³ச்ச²ந்தி, புரிஸஸ்ஸபி அப்³பா⁴க³மனம் ஸாதி³யந்தி, ச²ன்னம்பி அனுபவிஸந்தி, காயம்பி தத³த்தா²ய உபஸம்ஹரந்தி ஏதஸ்ஸ அஸத்³த⁴ம்மஸ்ஸ படிஸேவனத்தா²ய. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம்பி ஸாதி³யிஸ்ஸந்தி, ஸங்கா⁴டிகண்ணக்³க³ஹணம்பி ஸாதி³யிஸ்ஸந்தி, ஸந்திட்டி²ஸ்ஸந்திபி, ஸல்லபிஸ்ஸந்திபி, ஸங்கேதம்பி க³ச்சி²ஸ்ஸந்தி, புரிஸஸ்ஸபி அப்³பா⁴க³மனம் ஸாதி³யிஸ்ஸந்தி, ச²ன்னம்பி அனுபவிஸிஸ்ஸந்தி, காயம்பி தத³த்தா²ய உபஸம்ஹரிஸ்ஸந்தி ஏதஸ்ஸ அஸத்³த⁴ம்மஸ்ஸ படிஸேவனத்தா²யா’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம்பி ஸாதி³யந்தி, ஸங்கா⁴டிகண்ணக்³க³ஹணம்பி ஸாதி³யந்தி, ஸந்திட்ட²ந்திபி, ஸல்லபந்திபி, ஸங்கேதம்பி க³ச்ச²ந்தி, புரிஸஸ்ஸபி அப்³பா⁴க³மனம் ஸாதி³யந்தி, ச²ன்னம்பி அனுபவிஸந்தி, காயம்பி தத³த்தா²ய உபஸம்ஹரந்தி ஏதஸ்ஸ அஸத்³த⁴ம்மஸ்ஸ படிஸேவனத்தா²யாதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம்பி ஸாதி³யிஸ்ஸந்தி, ஸங்கா⁴டிகண்ணக்³க³ஹணம்பி ஸாதி³யிஸ்ஸந்தி, ஸந்திட்டி²ஸ்ஸந்திபி, ஸல்லபிஸ்ஸந்திபி, ஸங்கேதம்பி க³ச்சி²ஸ்ஸந்தி, புரிஸஸ்ஸபி அப்³பா⁴க³மனம் ஸாதி³யிஸ்ஸந்தி, ச²ன்னம்பி அனுபவிஸிஸ்ஸந்தி, காயம்பி தத³த்தா²ய உபஸம்ஹரிஸ்ஸந்தி ஏதஸ்ஸ அஸத்³த⁴ம்மஸ்ஸ படிஸேவனத்தா²ய! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

675. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம் வா ஸாதி³யேய்ய, ஸங்கா⁴டிகண்ணக்³க³ஹணம் வா ஸாதி³யேய்ய, ஸந்திட்டே²ய்ய வா, ஸல்லபேய்ய வா, ஸங்கேதம் வா க³ச்சே²ய்ய, புரிஸஸ்ஸ வா அப்³பா⁴க³மனம் ஸாதி³யேய்ய, ச²ன்னம் வா அனுபவிஸேய்ய, காயம் வா தத³த்தா²ய உபஸம்ஹரேய்ய ஏதஸ்ஸ அஸத்³த⁴ம்மஸ்ஸ படிஸேவனத்தா²ய, அயம்பி பாராஜிகா ஹோதி அஸம்வாஸா அட்ட²வத்து²கா’’தி.

676. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அவஸ்ஸுதா நாம ஸாரத்தா அபேக்க²வதீ படிப³த்³த⁴சித்தா.

அவஸ்ஸுதோ நாம ஸாரத்தோ அபேக்க²வா படிப³த்³த⁴சித்தோ.

புரிஸபுக்³க³லோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ விஞ்ஞூ படிப³லோ காயஸம்ஸக்³க³ம் ஸமாபஜ்ஜிதும்.

ஹத்த²க்³க³ஹணம் வா ஸாதி³யேய்யாதி ஹத்தோ² நாம கப்பரம் உபாதா³ய யாவ அக்³க³னகா². ஏதஸ்ஸ அஸத்³த⁴ம்மஸ்ஸ படிஸேவனத்தா²ய உப்³ப⁴க்க²கம் அதோ⁴ஜாணுமண்ட³லம் க³ஹணம் ஸாதி³யதி, ஆபத்தி து²ல்லச்சயஸ்ஸ.

ஸங்கா⁴டிகண்ணக்³க³ஹணம் வா ஸாதி³யேய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய நிவத்த²ம் வா பாருதம் வா க³ஹணம் ஸாதி³யதி, ஆபத்தி து²ல்லச்சயஸ்ஸ.

ஸந்திட்டே²ய்ய வாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே திட்ட²தி, ஆபத்தி து²ல்லச்சயஸ்ஸ.

ஸல்லபேய்ய வாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே டி²தா ஸல்லபதி, ஆபத்தி து²ல்லச்சயஸ்ஸ.

ஸங்கேதம் வா க³ச்சே²ய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸேன – ‘‘இத்த²ன்னாமம் ஓகாஸம் [இத³ம் பத³ம் அட்ட²கதா²யம் ந தி³ஸ்ஸதி] ஆக³ச்சா²’’தி – வுத்தா க³ச்ச²தி. பதே³ பதே³ ஆபத்தி து³க்கடஸ்ஸ. புரிஸஸ்ஸ ஹத்த²பாஸம் ஓக்கந்தமத்தே ஆபத்தி து²ல்லச்சயஸ்ஸ.

புரிஸஸ்ஸ வா அப்³பா⁴க³மனம் ஸாதி³யேய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ அப்³பா⁴க³மனம் ஸாதி³யதி, ஆபத்தி து³க்கடஸ்ஸ. ஹத்த²பாஸம் ஓக்கந்தமத்தே ஆபத்தி து²ல்லச்சயஸ்ஸ.

ச²ன்னம் வா அனுபவிஸேய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய யேன கேனசி படிச்ச²ன்னம் ஓகாஸம் பவிட்ட²மத்தே ஆபத்தி து²ல்லச்சயஸ்ஸ.

காயம் வா தத³த்தா²ய உபஸம்ஹரேய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே டி²தா காயம் உபஸம்ஹரதி, ஆபத்தி து²ல்லச்சயஸ்ஸ.

அயம்பீதி புரிமாயோ உபாதா³ய வுச்சதி.

பாராஜிகா ஹோதீதி ஸேய்யதா²பி நாம தாலோ மத்த²கச்சி²ன்னோ அப⁴ப்³போ³ புன விருள்ஹியா ஏவமேவ பி⁴க்கு²னீ அட்ட²மம் வத்து²ம் பரிபூரேந்தீ அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

677. அனாபத்தி அஸஞ்சிச்ச, அஸ்ஸதியா, அஜானந்தியா, அஸாதி³யந்தியா, உம்மத்திகாய, கி²த்தசித்தாய, வேத³னாட்டாய, ஆதி³கம்மிகாயாதி.

சதுத்த²பாராஜிகம் ஸமத்தம்.

உத்³தி³ட்டா² கோ², அய்யாயோ, அட்ட² பாராஜிகா த⁴ம்மா. யேஸம் பி⁴க்கு²னீ அஞ்ஞதரம் வா அஞ்ஞதரம் வா ஆபஜ்ஜித்வா ந லப⁴தி பி⁴க்கு²னீஹி ஸத்³தி⁴ம் ஸம்வாஸம், யதா² புரே ததா² பச்சா², பாராஜிகா ஹோதி அஸம்வாஸா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

பி⁴க்கு²னிவிப⁴ங்கே³ பாராஜிககண்ட³ம் நிட்டி²தம்.