6. அமூலகஸிக்கா²பத³ம்

459. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

460. ‘‘யோ பன பி⁴க்கு² பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேய்ய, பாசித்திய’’ந்தி.

461. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ந்தி அஞ்ஞம் பி⁴க்கு²ம்.

அமூலகம் நாம அதி³ட்ட²ம் அஸ்ஸுதம் அபரிஸங்கிதம்.

ஸங்கா⁴தி³ஸேஸேனாதி தேரஸன்னம் அஞ்ஞதரேன.

அனுத்³த⁴ம்ஸேய்யாதி சோதே³தி வா சோதா³பேதி வா, ஆபத்தி பாசித்தியஸ்ஸ.

462. உபஸம்பன்னே உபஸம்பன்னஸஞ்ஞீ அமூலகேன ஸங்கா⁴தி³ஸேஸேன அனுத்³த⁴ம்ஸேதி, ஆபத்தி பாசித்தியஸ்ஸ. உபஸம்பன்னே வேமதிகோ அமூலகேன ஸங்கா⁴தி³ஸேஸேன அனுத்³த⁴ம்ஸேதி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞீ அமூலகேன ஸங்கா⁴தி³ஸேஸேன அனுத்³த⁴ம்ஸேதி, ஆபத்தி பாசித்தியஸ்ஸ.

ஆசாரவிபத்தியா வா தி³ட்டி²விபத்தியா வா அனுத்³த⁴ம்ஸேதி, ஆபத்தி து³க்கடஸ்ஸ. அனுபஸம்பன்னம் அனுத்³த⁴ம்ஸேதி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

463. அனாபத்தி ததா²ஸஞ்ஞீ சோதே³தி, வா சோதா³பேதி வா, உம்மத்தகஸ்ஸ, ஆதி³கம்மிகஸ்ஸாதி.

அமூலகஸிக்கா²பத³ம் நிட்டி²தம் ச²ட்ட²ம்.