4. பஹாரஸிக்கா²பத³ம்

449. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² குபிதா அனத்தமனா ஸத்தரஸவக்³கி³யானம் பி⁴க்கூ²னம் பஹாரம் தே³ந்தி. தே ரோத³ந்தி. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² குபிதா அனத்தமனா அம்ஹாகம் பஹாரம் தே³ந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² குபிதா அனத்தமனா பி⁴க்கூ²னம் பஹாரம் த³ஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, குபிதா அனத்தமனா பி⁴க்கூ²னம் பஹாரம் தே³தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, குபிதா அனத்தமனா பி⁴க்கூ²னம் பஹாரம் த³ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

450. ‘‘யோ பன பி⁴க்கு² பி⁴க்கு²ஸ்ஸ குபிதோ அனத்தமனோ பஹாரம் த³தே³ய்ய, பாசித்திய’’ந்தி.

451. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ஸ்ஸாதி அஞ்ஞஸ்ஸ பி⁴க்கு²ஸ்ஸ.

குபிதோ அனத்தமனோதி அனபி⁴ரத்³தோ⁴ ஆஹதசித்தோ கி²லஜாதோ.

பஹாரம் த³தே³ய்யாதி காயேன வா காயபடிப³த்³தே⁴ன வா நிஸ்ஸக்³கி³யேன வா அந்தமஸோ உப்பலபத்தேனபி பஹாரம் தே³தி, ஆபத்தி பாசித்தியஸ்ஸ.

452. உபஸம்பன்னே உபஸம்பன்னஸஞ்ஞீ குபிதோ அனத்தமனோ பஹாரம் தே³தி, ஆபத்தி பாசித்தியஸ்ஸ. உபஸம்பன்னே வேமதிகோ குபிதோ அனத்தமனோ பஹாரம் தே³தி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞீ குபிதோ அனத்தமனோ பஹாரம் தே³தி, ஆபத்தி பாசித்தியஸ்ஸ.

அனுபஸம்பன்னஸ்ஸ குபிதோ அனத்தமனோ பஹாரம் தே³தி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

453. அனாபத்தி கேனசி விஹேடீ²யமானோ மோக்கா²தி⁴ப்பாயோ பஹாரம் தே³தி, உம்மத்தகஸ்ஸ, ஆதி³கம்மிகஸ்ஸாதி.

பஹாரஸிக்கா²பத³ம் நிட்டி²தம் சதுத்த²ம்.