5. ஊனவீஸதிவஸ்ஸஸிக்கா²பத³ம்

402. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. [இத³ம் வத்து² மஹாவ. 99] தேன கோ² பன ஸமயேன ராஜக³ஹே ஸத்தரஸவக்³கி³யா தா³ரகா ஸஹாயகா ஹோந்தி. உபாலிதா³ரகோ தேஸம் பாமோக்கோ² ஹோதி. அத² கோ² உபாலிஸ்ஸ மாதாபிதூனம் ஏதத³ஹோஸி – ‘‘கேன நு கோ² உபாயேன உபாலி அம்ஹாகம் அச்சயேன ஸுக²ஞ்ச ஜீவேய்ய ந ச கிலமேய்யா’’தி? அத² கோ² உபாலிஸ்ஸ மாதாபிதூனம் ஏதத³ஹோஸி – ‘‘ஸசே கோ² உபாலி லேக²ம் ஸிக்கே²ய்ய, ஏவம் கோ² உபாலி அம்ஹாகம் அச்சயேன ஸுக²ஞ்ச ஜீவேய்ய, ந ச கிலமேய்யா’’தி. அத² கோ² உபாலிஸ்ஸ மாதாபிதூனம் ஏதத³ஹோஸி – ‘‘ஸசே கோ² உபாலி லேக²ம் ஸிக்கி²ஸ்ஸதி, அங்கு³லியோ து³க்கா² ப⁴விஸ்ஸந்தி. ஸசே கோ² உபாலி க³ணனம் ஸிக்கே²ய்ய, ஏவம் கோ² உபாலி அம்ஹாகம் அச்சயேன ஸுக²ஞ்ச ஜீவேய்ய ந ச கிலமேய்யா’’தி. அத² கோ² உபாலிஸ்ஸ மாதாபிதூனம் ஏதத³ஹோஸி – ‘‘ஸசே கோ² உபாலி க³ணனம் ஸிக்கி²ஸ்ஸதி, உரஸ்ஸ து³க்கோ² ப⁴விஸ்ஸதி. ஸசே கோ² உபாலி ரூபம் ஸிக்கே²ய்ய, ஏவம் கோ² உபாலி அம்ஹாகம் அச்சயேன ஸுக²ஞ்ச ஜீவேய்ய ந ச கிலமேய்யா’’தி. அத² கோ² உபாலிஸ்ஸ மாதாபிதூனம் ஏதத³ஹோஸி – ‘‘ஸசே கோ² உபாலி ரூபம் ஸிக்கி²ஸ்ஸதி, அக்கீ²னி து³க்கா² ப⁴விஸ்ஸந்தி. இமே கோ² ஸமணா ஸக்யபுத்தியா ஸுக²ஸீலா ஸுக²ஸமாசாரா ஸுபோ⁴ஜனானி பு⁴ஞ்ஜித்வா நிவாதேஸு ஸயனேஸு ஸயந்தி. ஸசே கோ² உபாலி ஸமணேஸு ஸக்யபுத்தியேஸு பப்³ப³ஜேய்ய, ஏவம் கோ² உபாலி அம்ஹாகம் அச்சயேன ஸுக²ஞ்ச ஜீவேய்ய, ந ச கிலமேய்யா’’தி.

அஸ்ஸோஸி கோ² உபாலிதா³ரகோ மாதாபிதூனம் இமம் கதா²ஸல்லாபம். அத² கோ² உபாலிதா³ரகோ யேன தே தா³ரகா தேனுபஸங்கமி; உபஸங்கமித்வா தே தா³ரகே ஏதத³வோச – ‘‘ஏத² மயம், அய்யா, ஸமணேஸு ஸக்யபுத்தியேஸு பப்³ப³ஜிஸ்ஸாமா’’தி. ‘‘ஸசே கோ² த்வம், அய்ய, பப்³ப³ஜிஸ்ஸஸி, ஏவம் மயம்பி பப்³ப³ஜிஸ்ஸாமா’’தி. அத² கோ² தே தா³ரகா ஏகமேகஸ்ஸ மாதாபிதரோ உபஸங்கமித்வா ஏதத³வோசும் – ‘‘அனுஜானாத² மம் அகா³ரஸ்மா அனகா³ரியம் பப்³ப³ஜ்ஜாயா’’தி. அத² கோ² தேஸம் தா³ரகானம் மாதாபிதரோ – ‘‘ஸப்³பே³பிமே தா³ரகா ஸமானச்ச²ந்தா³ கல்யாணாதி⁴ப்பாயா’’தி அனுஜானிம்ஸு. தே பி⁴க்கூ² உபஸங்கமித்வா பப்³ப³ஜ்ஜம் யாசிம்ஸு. தே பி⁴க்கூ² பப்³பா³ஜேஸும் உபஸம்பாதே³ஸும். தே ரத்தியா பச்சூஸஸமயம் பச்சுட்டா²ய ரோத³ந்தி – ‘‘யாகு³ம் தே³த², ப⁴த்தம் தே³த², கா²த³னீயம் தே³தா²’’தி. பி⁴க்கூ² ஏவமாஹம்ஸு – ‘‘ஆக³மேத², ஆவுஸோ, யாவ ரத்தி விபா⁴யதி. ஸசே யாகு³ ப⁴விஸ்ஸதி, பிவிஸ்ஸத². ஸசே ப⁴த்தம் ப⁴விஸ்ஸதி, பு⁴ஞ்ஜிஸ்ஸத². ஸசே கா²த³னீயம் ப⁴விஸ்ஸதி, கா²தி³ஸ்ஸத². நோ சே ப⁴விஸ்ஸதி யாகு³ வா ப⁴த்தம் வா கா²த³னீயம் வா, பிண்டா³ய சரித்வா பு⁴ஞ்ஜிஸ்ஸதா²’’தி. ஏவம்பி கோ² தே பி⁴க்கூ² பி⁴க்கூ²ஹி வுச்சமானா ரோத³ந்தியேவ – ‘‘யாகு³ம் தே³த², ப⁴த்தம் தே³த², கா²த³னீயம் தே³தா²’’தி. ஸேனாஸனம் ஊஹத³ந்திபி உம்மிஹந்திபி.

அஸ்ஸோஸி கோ² ப⁴க³வா ரத்தியா பச்சூஸஸமயம் பச்சுட்டா²ய தா³ரகஸத்³த³ம். ஸுத்வான ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ² ஸோ, ஆனந்த³, தா³ரகஸத்³தோ³’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, பி⁴க்கூ² ஜானம் ஊனவீஸதிவஸ்ஸம் புக்³க³லம் உபஸம்பாதே³ந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ஜானம் ஊனவீஸதிவஸ்ஸம் புக்³க³லம் உபஸம்பாதே³ஸ்ஸந்தி! ஊனகவீஸதிவஸ்ஸோ, பி⁴க்க²வே, புக்³க³லோ அக்க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம் உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகோ ஹோதி. வீஸதிவஸ்ஸோவ கோ², பி⁴க்க²வே, புக்³க³லோ க²மோ ஹோதி ஸீதஸ்ஸ உண்ஹஸ்ஸ…பே… பாணஹரானம் அதி⁴வாஸகஜாதிகோ ஹோதி. நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

403. ‘‘யோ பன பி⁴க்கு² ஜானம் ஊனவீஸதிவஸ்ஸம் புக்³க³லம் உபஸம்பாதே³ய்ய, ஸோ ச புக்³க³லோ அனுபஸம்பன்னோ, தே ச பி⁴க்கூ² கா³ரய்ஹா, இத³ம் தஸ்மிம் பாசித்திய’’ந்தி.

404. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஜானாதி நாம ஸாமம் வா ஜானாதி, அஞ்ஞே வா தஸ்ஸ ஆரோசேந்தி, ஸோ வா ஆரோசேதி.

ஊனவீஸதிவஸ்ஸோ நாம அப்பத்தவீஸதிவஸ்ஸோ.

‘‘உபஸம்பாதே³ஸ்ஸாமீ’’தி க³ணம் வா ஆசரியம் வா பத்தம் வா சீவரம் வா பரியேஸதி, ஸீமம் வா ஸம்மன்னதி [ஸம்மனதி (க.)], ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யஸ்ஸ ஆபத்தி பாசித்தியஸ்ஸ. க³ணஸ்ஸ ச ஆசரியஸ்ஸ ச ஆபத்தி து³க்கடஸ்ஸ.

405. ஊனவீஸதிவஸ்ஸே ஊனவீஸதிவஸ்ஸஸஞ்ஞீ உபஸம்பாதே³தி, ஆபத்தி பாசித்தியஸ்ஸ. ஊனவீஸதிவஸ்ஸே வேமதிகோ உபஸம்பாதே³தி, ஆபத்தி து³க்கடஸ்ஸ. ஊனவீஸதிவஸ்ஸே பரிபுண்ணவீஸதிவஸ்ஸஸஞ்ஞீ உபஸம்பாதே³தி, அனாபத்தி. பரிபுண்ணவீஸதிவஸ்ஸே ஊனவீஸதிவஸ்ஸஸஞ்ஞீ, ஆபத்தி து³க்கடஸ்ஸ. பரிபுண்ணவீஸதிவஸ்ஸே வேமதிகோ, ஆபத்தி து³க்கடஸ்ஸ. பரிபுண்ணவீஸதிவஸ்ஸே பரிபுண்ணவீஸதிவஸ்ஸஸஞ்ஞீ, அனாபத்தி.

406. அனாபத்தி ஊனவீஸதிவஸ்ஸம் பரிபுண்ணவீஸதிவஸ்ஸஸஞ்ஞீ உபஸம்பாதே³தி, பரிபுண்ணவீஸதிவஸ்ஸம் பரிபுண்ணவீஸதிவஸ்ஸஸஞ்ஞீ உபஸம்பாதே³தி, உம்மத்தகஸ்ஸ, ஆதி³கம்மிகஸ்ஸாதி.

ஊனவீஸதிவஸ்ஸஸிக்கா²பத³ம் நிட்டி²தம் பஞ்சமம்.