6. ஜோதிகஸிக்கா²பத³ம்

350. தேன ஸமயேன பு³த்³தோ⁴ ப⁴க³வா ப⁴க்³கே³ஸு விஹரதி ஸும்ஸுமாரகி³ரே [ஸும்ஸுமாரகி³ரே (ஸீ. ஸ்யா.) ஸம்ஸுமாரகி³ரே (க.)] பே⁴ஸகளாவனே மிக³தா³யே. தேன கோ² பன ஸமயேன பி⁴க்கூ² ஹேமந்திகே காலே அஞ்ஞதரம் மஹந்தம் ஸுஸிரகட்ட²ம் ஜோதிம் ஸமாத³ஹித்வா விஸிப்³பே³ஸும். தஸ்மிஞ்ச ஸுஸிரே கண்ஹஸப்போ அக்³கி³னா ஸந்தத்தோ நிக்க²மித்வா பி⁴க்கூ² பரிபாதேஸி. பி⁴க்கூ² தஹம் தஹம் உபதா⁴விம்ஸு. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² ஜோதிம் ஸமாத³ஹித்வா விஸிப்³பே³ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கூ² ஜோதிம் ஸமாத³ஹித்வா விஸிப்³பே³ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ஜோதிம் ஸமாத³ஹித்வா விஸிப்³பே³ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

351. தேன கோ² பன ஸமயேன பி⁴க்கூ² கி³லானா ஹோந்தி. கி³லானபுச்ச²கா பி⁴க்கூ² கி³லானே பி⁴க்கூ² ஏதத³வோசும் – ‘‘கச்சாவுஸோ, க²மனீயம், கச்சி யாபனீய’’ந்தி? ‘‘புப்³பே³ மயம், ஆவுஸோ, ஜோதிம் ஸமாத³ஹித்வா விஸிப்³பே³ம; தேன நோ பா²ஸு ஹோதி. இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஸிப்³பே³ம, தேன நோ ந பா²ஸு ஹோதீ’’தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானேன பி⁴க்கு²னா ஜோதிம் ஸமாத³ஹித்வா வா ஸமாத³ஹாபேத்வா வா விஸிப்³பே³தும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அகி³லானோ விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

352. தேன கோ² பன ஸமயேன பி⁴க்கூ² பதீ³பேபி ஜோதிகேபி ஜந்தாக⁴ரேபி குக்குச்சாயந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, ததா²ரூபப்பச்சயா ஜோதிம் ஸமாத³ஹிதும் ஸமாத³ஹாபேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

353. ‘‘யோ பன பி⁴க்கு² அகி³லானோ விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, அஞ்ஞத்ர ததா²ரூபப்பச்சயா, பாசித்திய’’ந்தி.

354. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அகி³லானோ நாம யஸ்ஸ வினா அக்³கி³னா பா²ஸு ஹோதி.

கி³லானோ நாம யஸ்ஸ வினா அக்³கி³னா ந பா²ஸு ஹோதி.

விஸிப்³ப³னாபேக்கோ²தி தப்பிதுகாமோ.

ஜோதி நாம அக்³கி³ வுச்சதி.

ஸமாத³ஹேய்யாதி ஸயம் ஸமாத³ஹதி, ஆபத்தி பாசித்தியஸ்ஸ.

ஸமாத³ஹாபேய்யாதி அஞ்ஞம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி ஸமாத³ஹதி, ஆபத்தி பாசித்தியஸ்ஸ.

அஞ்ஞத்ர ததா² ரூபப்பச்சயாதி ட²பேத்வா ததா²ரூபப்பச்சயம்.

355. அகி³லானோ அகி³லானஸஞ்ஞீ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. அகி³லானோ வேமதிகோ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. அகி³லானோ கி³லானஸஞ்ஞீ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ.

படிலாதம் உக்கி²பதி, ஆபத்தி து³க்கடஸ்ஸ. கி³லானோ அகி³லானஸஞ்ஞீ, ஆபத்தி து³க்கடஸ்ஸ. கி³லானோ வேமதிகோ, ஆபத்தி து³க்கடஸ்ஸ. கி³லானோ கி³லானஸஞ்ஞீ, அனாபத்தி.

356. அனாபத்தி கி³லானஸ்ஸ, அஞ்ஞேன கதம் விஸிப்³பே³தி, வீதச்சிதங்கா³ரம் விஸிப்³பே³தி, பதீ³பே ஜோதிகே ஜந்தாக⁴ரே ததா²ரூபப்பச்சயா, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஜோதிகஸிக்கா²பத³ம் நிட்டி²தம் ச²ட்ட²ம்.