9. ஸேனாவாஸஸிக்கா²பத³ம்

317. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² ஸதி கரணீயே ஸேனம் க³ந்த்வா அதிரேகதிரத்தம் ஸேனாய வஸந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஸேனாய வஸிஸ்ஸந்தி! அம்ஹாகம்பி அலாபா⁴, அம்ஹாகம்பி து³ல்லத்³த⁴ம், யே மயம் ஆஜீவஸ்ஸ ஹேது புத்ததா³ரஸ்ஸ காரணா ஸேனாய படிவஸாமா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகதிரத்தம் ஸேனாய வஸிஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, அதிரேகதிரத்தம் ஸேனாய வஸதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அதிரேகதிரத்தம் ஸேனாய வஸிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

318. ‘‘ஸியா ச தஸ்ஸ பி⁴க்கு²னோ கோசிதே³வ பச்சயோ ஸேனம் க³மனாய, தி³ரத்ததிரத்தம் தேன பி⁴க்கு²னா ஸேனாய வஸிதப்³ப³ம். ததோ சே உத்தரிம் வஸேய்ய, பாசித்திய’’ந்தி.

319. ஸியா ச தஸ்ஸ பி⁴க்கு²னோ கோசிதே³வ பச்சயோ ஸேனம் க³மனாயாதி ஸியா பச்சயோ ஸியா கரணீயம்.

தி³ரத்ததிரத்தம் தேன பி⁴க்கு²னா ஸேனாய வஸிதப்³ப³ந்தி த்³வேதிஸ்ஸோ ரத்தியோ வஸிதப்³ப³ம்.

ததோ சே உத்தரி வஸேய்யாதி சதுத்தே² தி³வஸே அத்த²ங்க³தே ஸூரியே ஸேனாய வஸதி, ஆபத்தி பாசித்தியஸ்ஸ.

320. அதிரேகதிரத்தே அதிரேகஸஞ்ஞீ ஸேனாய வஸதி, ஆபத்தி பாசித்தியஸ்ஸ. அதிரேகதிரத்தே வேமதிகோ ஸேனாய வஸதி, ஆபத்தி பாசித்தியஸ்ஸ. அதிரேகதிரத்தே ஊனகஸஞ்ஞீ ஸேனாய வஸதி, ஆபத்தி பாசித்தியஸ்ஸ.

ஊனகதிரத்தே அதிரேகஸஞ்ஞீ, ஆபத்தி து³க்கடஸ்ஸ. ஊனகதிரத்தே வேமதிகோ, ஆபத்தி து³க்கடஸ்ஸ. ஊனகதிரத்தே ஊனகஸஞ்ஞீ, அனாபத்தி.

321. அனாபத்தி த்³வேதிஸ்ஸோ ரத்தியோ வஸதி, ஊனகத்³வேதிஸ்ஸோ ரத்தியோ வஸதி, த்³வே ரத்தியோ வஸித்வா ததியாய ரத்தியா புராருணா நிக்க²மித்வா புன வஸதி, கி³லானோ வஸதி, கி³லானஸ்ஸ கரணீயேன வஸதி, ஸேனா வா படிஸேனாய ருத்³தா⁴ ஹோதி, கேனசி பலிபு³த்³தோ⁴ ஹோதி, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஸேனாவாஸஸிக்கா²பத³ம் நிட்டி²தம் நவமம்.