2. அத்த²ங்க³தஸிக்கா²பத³ம்

153. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன தே²ரா பி⁴க்கூ² பி⁴க்கு²னியோ ஓவத³ந்தி பரியாயேன. தேன கோ² பன ஸமயேன ஆயஸ்மதோ சூளபந்த²கஸ்ஸ பரியாயோ ஹோதி பி⁴க்கு²னியோ ஓவதி³தும். பி⁴க்கு²னியோ ஏவமாஹம்ஸு – ‘‘ந தா³னி அஜ்ஜ ஓவாதோ³ இத்³தோ⁴ ப⁴விஸ்ஸதி, தஞ்ஞேவ தா³னி உதா³னம் அய்யோ சூளபந்த²கோ புனப்புனம் ப⁴ணிஸ்ஸதீ’’தி. அத² கோ² தா பி⁴க்கு²னியோ யேனாயஸ்மா சூளபந்த²கோ தேனுபஸங்கமிம்ஸு; உபஸங்கமித்வா ஆயஸ்மந்தம் சூளபந்த²கம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தா பி⁴க்கு²னியோ ஆயஸ்மா சூளபந்த²கோ ஏதத³வோச – ‘‘ஸமக்³கா³த்த², ப⁴கி³னியோ’’தி? ‘‘ஸமக்³கா³ம்ஹாய்யா’’தி. ‘‘வத்தந்தி, ப⁴கி³னியோ, அட்ட² க³ருத⁴ம்மா’’தி? ‘‘வத்தந்தாய்யா’’தி. ‘‘ஏஸோ, ப⁴கி³னியோ, ஓவாதோ³’’தி நிய்யாதே³த்வா இமம் உதா³னம் புனப்புனம் அபா⁴ஸி –

[உதா³. 37] ‘‘அதி⁴சேதஸோ அப்பமஜ்ஜதோ, முனினோ மோனபதே²ஸு ஸிக்க²தோ;

ஸோகா ந ப⁴வந்தி தாதி³னோ, உபஸந்தஸ்ஸ ஸதா³ ஸதீமதோ’’தி.

பி⁴க்கு²னியோ ஏவமாஹம்ஸு – ‘‘நனு அவோசும்ஹா – ந தா³னி அஜ்ஜ ஓவாதோ³ இத்³தோ⁴ ப⁴விஸ்ஸதி, தஞ்ஞேவ தா³னி உதா³னம் அய்யோ சூளபந்த²கோ புனப்புனம் ப⁴ணிஸ்ஸதீ’’தி! அஸ்ஸோஸி கோ² ஆயஸ்மா சூளபந்த²கோ தாஸம் பி⁴க்கு²னீனம் இமம் கதா²ஸல்லாபம். அத² கோ² ஆயஸ்மா சூளபந்த²கோ வேஹாஸம் அப்³பு⁴க்³க³ந்த்வா ஆகாஸே அந்தலிக்கே² சங்கமதிபி திட்ட²திபி நிஸீத³திபி ஸேய்யம்பி கப்பேதி தூ⁴மாயதிபி பஜ்ஜலதிபி அந்தரதா⁴யதிபி, தஞ்சேவ [தஞ்ஞேவ (இதிபி)] உதா³னம் ப⁴ணதி அஞ்ஞஞ்ச ப³ஹும் பு³த்³த⁴வசனம். பி⁴க்கு²னியோ ஏவமாஹம்ஸு – ‘‘அச்ச²ரியம் வத போ⁴, அப்³பு⁴தம் வத போ⁴, ந வத நோ இதோ புப்³பே³ ஓவாதோ³ ஏவம் இத்³தோ⁴ பூ⁴தபுப்³போ³ யதா² அய்யஸ்ஸ சூளபந்த²கஸ்ஸா’’தி. அத² கோ² ஆயஸ்மா சூளபந்த²கோ தா பி⁴க்கு²னியோ யாவ ஸமந்த⁴காரா ஓவதி³த்வா உய்யோஜேஸி – க³ச்ச²த² ப⁴கி³னியோதி.

அத² கோ² தா பி⁴க்கு²னியோ நக³ரத்³வாரே த²கிதே ப³ஹினக³ரே வஸித்வா காலஸ்ஸேவ நக³ரம் பவிஸந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘அப்³ரஹ்மசாரினியோ இமா பி⁴க்கு²னியோ; ஆராமே பி⁴க்கூ²ஹி ஸத்³தி⁴ம் வஸித்வா இதா³னி நக³ரம் பவிஸந்தீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா சூளபந்த²கோ அத்த²ங்க³தே ஸூரியே பி⁴க்கு²னியோ ஓவதி³ஸ்ஸதீ’’தி…பே… ‘‘ஸச்சம் கிர த்வம், சூளபந்த²க, அத்த²ங்க³தே ஸூரியே பி⁴க்கு²னியோ ஓவத³ஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், சூளபந்த²க, அத்த²ங்க³தே ஸூரியே பி⁴க்கு²னியோ ஓவதி³ஸ்ஸஸி! நேதம், சூளபந்த²க, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

154. ‘‘ஸம்மதோபி சே பி⁴க்கு² அத்த²ங்க³தே ஸூரியே பி⁴க்கு²னியோ ஓவதே³ய்ய, பாசித்திய’’ந்தி.

155. ஸம்மதோ நாம ஞத்திசதுத்தே²ன கம்மேன ஸம்மதோ.

அத்த²ங்க³தே ஸூரியேதி ஓக்³க³தே ஸூரியே.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஓவதே³ய்யாதி அட்ட²ஹி வா க³ருத⁴ம்மேஹி அஞ்ஞேன வா த⁴ம்மேன ஓவத³தி, ஆபத்தி பாசித்தியஸ்ஸ.

156. அத்த²ங்க³தே அத்த²ங்க³தஸஞ்ஞீ ஓவத³தி, ஆபத்தி பாசித்தியஸ்ஸ. அத்த²ங்க³தே வேமதிகோ ஓவத³தி, ஆபத்தி பாசித்தியஸ்ஸ. அத்த²ங்க³தே அனத்த²ங்க³தஸஞ்ஞீ ஓவத³தி, ஆபத்தி பாசித்தியஸ்ஸ.

ஏகதோஉபஸம்பன்னாய ஓவத³தி, ஆபத்தி து³க்கடஸ்ஸ. அனத்த²ங்க³தே அத்த²ங்க³தஸஞ்ஞீ, ஆபத்தி து³க்கடஸ்ஸ. அனத்த²ங்க³தே வேமதிகோ, ஆபத்தி து³க்கடஸ்ஸ. அனத்த²ங்க³தே அனத்த²ங்க³தஸஞ்ஞீ, அனாபத்தி.

157. அனாபத்தி உத்³தே³ஸம் தே³ந்தோ, பரிபுச்ச²ம் தே³ந்தோ, ‘‘ஓஸாரேஹி அய்யா’’தி வுச்சமானோ, ஓஸாரேதி, பஞ்ஹம் புச்ச²தி, பஞ்ஹம் புட்டோ² கதே²தி, அஞ்ஞஸ்ஸத்தா²ய ப⁴ணந்தம் பி⁴க்கு²னியோ ஸுணந்தி, ஸிக்க²மானாய ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

அத்த²ங்க³தஸிக்கா²பத³ம் நிட்டி²தம் து³தியம்.