5. ஸஹஸேய்யஸிக்கா²பத³ம்

49. தேன ஸமயேன பு³த்³தோ⁴ ப⁴க³வா ஆளவியம் விஹரதி அக்³கா³ளவே சேதியே. தேன கோ² பன ஸமயேன உபாஸகா ஆராமம் ஆக³ச்ச²ந்தி த⁴ம்மஸ்ஸவனாய. த⁴ம்மே பா⁴ஸிதே தே²ரா பி⁴க்கூ² யதா²விஹாரம் க³ச்ச²ந்தி. நவகா பி⁴க்கூ² தத்தே²வ உபட்டா²னஸாலாயம் உபாஸகேஹி ஸத்³தி⁴ம் முட்ட²ஸ்ஸதீ, அஸம்பஜானா, நக்³கா³, விகூஜமானா, காகச்ச²மானா ஸேய்யம் கப்பேந்தி. உபாஸகா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ப⁴த³ந்தா முட்ட²ஸ்ஸதீ அஸம்பஜானா நக்³கா³ விகூஜமானா காகச்ச²மானா ஸேய்யம் கப்பேஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் உபாஸகானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² அனுபஸம்பன்னேன ஸஹஸேய்யம் கப்பேஸ்ஸந்தீ’’தி! அத² கோ² தே பி⁴க்கூ² தே நவகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, பி⁴க்கூ² அனுபஸம்பன்னேன ஸஹஸேய்யம் கப்பேந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா அனுபஸம்பன்னேன ஸஹஸேய்யம் கப்பேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அனுபஸம்பன்னேன ஸஹஸேய்யம் கப்பேய்ய பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

50. அத² கோ² ப⁴க³வா ஆளவியம் யதா²பி⁴ரந்தம் விஹரித்வா யேன கோஸம்பீ³ தேன சாரிகம் பக்காமி. அனுபுப்³பே³ன சாரிகம் சரமானோ யேன கோஸம்பீ³ தத³வஸரி. தத்ர ஸுத³ம் ப⁴க³வா கோஸம்பி³யம் விஹரதி ப³த³ரிகாராமே. பி⁴க்கூ² ஆயஸ்மந்தம் ராஹுலம் ஏதத³வோசும் – ‘‘ப⁴க³வதா, ஆவுஸோ ராஹுல, ஸிக்கா²பத³ம் பஞ்ஞத்தம் – ‘ந அனுபஸம்பன்னேன ஸஹஸேய்யா கப்பேதப்³பா³’தி. ஸேய்யம், ஆவுஸோ ராஹுல, ஜானாஹீ’’தி. அத² கோ² ஆயஸ்மா ராஹுலோ ஸேய்யம் அலப⁴மானோ வச்சகுடியா ஸேய்யம் கப்பேஸி. அத² கோ² ப⁴க³வா ரத்தியா பச்சூஸஸமயம் பச்சுட்டா²ய யேன வச்சகுடி தேனுபஸங்கமி; உபஸங்கமித்வா உக்காஸி. ஆயஸ்மாபி ராஹுலோ உக்காஸி. ‘‘கோ ஏத்தா²’’தி? ‘‘அஹம், ப⁴க³வா, ராஹுலோ’’தி. ‘‘கிஸ்ஸ த்வம், ராஹுல, இத⁴ நிஸின்னோஸீ’’தி? அத² கோ² ஆயஸ்மா ராஹுலோ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அனுபஸம்பன்னேன தி³ரத்ததிரத்தம் ஸஹஸேய்யம் கப்பேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

51. ‘‘யோ பன பி⁴க்கு² அனுபஸம்பன்னேன உத்தரிதி³ரத்ததிரத்தம் ஸஹஸேய்யம் கப்பேய்ய, பாசித்திய’’ந்தி.

52. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அனுபஸம்பன்னோ நாம பி⁴க்கு²ம் ட²பேத்வா அவஸேஸோ அனுபஸம்பன்னோ நாம.

உத்தரிதி³ரத்ததிரத்தந்தி அதிரேகதி³ரத்ததிரத்தம்.

ஸஹாதி ஏகதோ.

ஸேய்யா நாம ஸப்³ப³ச்ச²ன்னா, ஸப்³ப³பரிச்ச²ன்னா, யேபு⁴ய்யேனச்ச²ன்னா, யேபு⁴ய்யேன பரிச்ச²ன்னா.

ஸேய்யம் கப்பேய்யாதி சதுத்தே² தி³வஸே அத்த²ங்க³தே ஸூரியே, அனுபஸம்பன்னே நிபன்னே, பி⁴க்கு² நிபஜ்ஜதி, ஆபத்தி பாசித்தியஸ்ஸ. பி⁴க்கு² நிபன்னே, அனுபஸம்பன்னோ நிபஜ்ஜதி, ஆபத்தி பாசித்தியஸ்ஸ. உபோ⁴ வா நிபஜ்ஜந்தி, ஆபத்தி பாசித்தியஸ்ஸ. உட்ட²ஹித்வா புனப்புனம் நிபஜ்ஜந்தி, ஆபத்தி பாசித்தியஸ்ஸ.

53. அனுபஸம்பன்னே அனுபஸம்பன்னஸஞ்ஞீ உத்தரிதி³ரத்ததிரத்தம் ஸஹஸேய்யம் கப்பேதி, ஆபத்தி பாசித்தியஸ்ஸ. அனுபஸம்பன்னே வேமதிகோ உத்தரிதி³ரத்ததிரத்தம் ஸஹஸேய்யம் கப்பேதி, ஆபத்தி பாசித்தியஸ்ஸ. அனுபஸம்பன்னே உபஸம்பன்னஸஞ்ஞீ உத்தரிதி³ரத்ததிரத்தம் ஸஹஸேய்யம் கப்பேதி, ஆபத்தி பாசித்தியஸ்ஸ.

உபட்³ட⁴ச்ச²ன்னே உபட்³ட⁴பரிச்ச²ன்னே, ஆபத்தி து³க்கடஸ்ஸ. உபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ. உபஸம்பன்னே வேமதிகோ, ஆபத்தி து³க்கடஸ்ஸ. உபஸம்பன்னே உபஸம்பன்னஸஞ்ஞீ, அனாபத்தி.

54. அனாபத்தி த்³வேதிஸ்ஸோ ரத்தியோ வஸதி, ஊனகத்³வேதிஸ்ஸோ ரத்தியோ வஸதி, த்³வே ரத்தியோ வஸித்வா ததியாய ரத்தியா புராருணா நிக்க²மித்வா புன வஸதி, ஸப்³ப³ச்ச²ன்னே, ஸப்³ப³அபரிச்ச²ன்னே, ஸப்³ப³பரிச்ச²ன்னே ஸப்³ப³அச்ச²ன்னே [வஸதி, ஸப்³ப³அச்ச²ன்னே ஸப்³ப³அபரிச்ச²ன்னே, (ஸீ.)], யேபு⁴ய்யேன அச்ச²ன்னே, யேபு⁴ய்யேன அபரிச்ச²ன்னே, அனுபஸம்பன்னே நிபன்னே பி⁴க்கு² நிஸீத³தி, பி⁴க்கு² நிபன்னே அனுபஸம்பன்னோ நிஸீத³தி, உபோ⁴ வா நிஸீத³ந்தி, உம்மத்தகஸ்ஸ, ஆதி³கம்மிகஸ்ஸாதி.

ஸஹஸேய்யஸிக்கா²பத³ம் நிட்டி²தம் பஞ்சமம்.