4. பத³ஸோத⁴ம்மஸிக்கா²பத³ம்

44. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² உபாஸகே பத³ஸோ த⁴ம்மம் வாசேந்தி. உபாஸகா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² உபாஸகே பத³ஸோ த⁴ம்மம் வாசேஸ்ஸந்தி! உபாஸகா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரந்தீ’’தி. அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, உபாஸகே பத³ஸோ த⁴ம்மம் வாசேத²; உபாஸகா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, உபாஸகே பத³ஸோ த⁴ம்மம் வாசேஸ்ஸத²! உபாஸகா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா விஹரந்தி! நேதம், மோக⁴புரிஸா, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

45. ‘‘யோ பன பி⁴க்கு² அனுபஸம்பன்னம் பத³ஸோ த⁴ம்மம் வாசேய்ய பாசித்திய’’ந்தி.

46. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அனுபஸம்பன்னோ நாம பி⁴க்கு²ஞ்ச பி⁴க்கு²னிஞ்ச ட²பேத்வா அவஸேஸோ அனுபஸம்பன்னோ நாம.

பத³ஸோ நாம பத³ம், அனுபத³ம், அன்வக்க²ரம், அனுப்³யஞ்ஜனம்.

பத³ம் நாம ஏகதோ பட்ட²பேத்வா ஏகதோ ஓஸாபேந்தி. அனுபத³ம் நாம பாடேக்கம் பட்ட²பேத்வா ஏகதோ ஓஸாபேந்தி. அன்வக்க²ரம் நாம ‘‘ரூபம் அனிச்ச’’ந்தி வுச்சமானோ, ‘‘ரு’’ந்தி ஓபாதேதி. அனுப்³யஞ்ஜனம் நாம ‘‘ரூபம் அனிச்ச’’ந்தி வுச்சமானோ, ‘‘வேத³னா அனிச்சா’’தி ஸத்³த³ம் நிச்சா²ரேதி.

யஞ்ச பத³ம், யஞ்ச அனுபத³ம், யஞ்ச அன்வக்க²ரம், யஞ்ச அனுப்³யஞ்ஜனம் – ஸப்³ப³மேதம் பத³ஸோ [பத³ஸோ த⁴ம்மோ (இதிபி)] நாம.

த⁴ம்மோ நாம பு³த்³த⁴பா⁴ஸிதோ, ஸாவகபா⁴ஸிதோ, இஸிபா⁴ஸிதோ, தே³வதாபா⁴ஸிதோ, அத்தூ²பஸஞ்ஹிதோ, த⁴ம்மூபஸஞ்ஹிதோ.

வாசேய்யாதி பதே³ன வாசேதி, பதே³ பதே³ ஆபத்தி பாசித்தியஸ்ஸ. அக்க²ராய வாசேதி, அக்க²ரக்க²ராய ஆபத்தி பாசித்தியஸ்ஸ.

47. அனுபஸம்பன்னே அனுபஸம்பன்னஸஞ்ஞீ பத³ஸோ த⁴ம்மம் வாசேதி, ஆபத்தி பாசித்தியஸ்ஸ. அனுபஸம்பன்னே வேமதிகோ பத³ஸோ த⁴ம்மம் வாசேதி, ஆபத்தி பாசித்தியஸ்ஸ. அனுபஸம்பன்னே உபஸம்பன்னஸஞ்ஞீ பத³ஸோ த⁴ம்மம் வாசேதி, ஆபத்தி பாசித்தியஸ்ஸ.

உபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ. உபஸம்பன்னே வேமதிகோ, ஆபத்தி து³க்கடஸ்ஸ. உபஸம்பன்னே உபஸம்பன்னஸஞ்ஞீ, அனாபத்தி.

48. அனாபத்தி ஏகதோ உத்³தி³ஸாபேந்தோ, ஏகதோ ஸஜ்ஜா²யம் கரோந்தோ, யேபு⁴ய்யேன பகு³ணம் க³ந்த²ம் ப⁴ணந்தம் ஓபாதேதி, ஓஸாரேந்தம் ஓபாதேதி, உம்மத்தகஸ்ஸ, ஆதி³கம்மிகஸ்ஸாதி.

பத³ஸோத⁴ம்மஸிக்கா²பத³ம் நிட்டி²தம் சதுத்த²ம்.