10. பத²வீக²ணனஸிக்கா²பத³ம்

84. தேன ஸமயேன பு³த்³தோ⁴ ப⁴க³வா ஆளவியம் விஹரதி அக்³கா³ளவே சேதியே. தேன கோ² பன ஸமயேன ஆளவகா [ஆளவிகா (ஸ்யா.)] பி⁴க்கூ² நவகம்மம் கரோந்தா பத²விம் க²ணந்திபி க²ணாபேந்திபி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா பத²விம் க²ணிஸ்ஸந்திபி க²ணாபேஸ்ஸந்திபி! ஏகிந்த்³ரியம் ஸமணா ஸக்யபுத்தியா ஜீவம் விஹேடே²ந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆளவகா பி⁴க்கூ² பத²விம் க²ணிஸ்ஸந்திபி க²ணாபேஸ்ஸந்திபீ’’தி…பே… ‘‘ஸச்சம் கிர தும்ஹே, பி⁴க்க²வே, பத²விம் க²ணத²பி க²ணாபேத²பீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பத²விம் க²ணிஸ்ஸத²பி க²ணாபேஸ்ஸத²பி! ஜீவஸஞ்ஞினோ ஹி, மோக⁴புரிஸா, மனுஸ்ஸா பத²வியா. நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

85. ‘‘யோ பன பி⁴க்கு² பத²விம் க²ணேய்ய வா க²ணாபேய்ய வா, பாசித்திய’’ந்தி.

86. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பத²வீ நாம த்³வே பத²வியோ – ஜாதா ச பத²வீ அஜாதா ச பத²வீ.

ஜாதா நாம பத²வீ – ஸுத்³த⁴பம்ஸு ஸுத்³த⁴மத்திகா அப்பபாஸாணா அப்பஸக்க²ரா அப்பகட²லா அப்பமரும்பா³ அப்பவாலிகா, யேபு⁴ய்யேனபம்ஸுகா, யேபு⁴ய்யேனமத்திகா. அத³ட்³டா⁴பி வுச்சதி ஜாதா பத²வீ. யோபி பம்ஸுபுஞ்ஜோ வா மத்திகாபுஞ்ஜோ வா அதிரேகசாதுமாஸம் ஓவட்டோ², அயம்பி வுச்சதி ஜாதா பத²வீ.

அஜாதா நாம பத²வீ – ஸுத்³த⁴பாஸாணா ஸுத்³த⁴ஸக்க²ரா ஸுத்³த⁴கட²லா ஸுத்³த⁴மரும்பா³ ஸுத்³த⁴வாலிகா அப்பபம்ஸுகா அப்பமத்திகா, யேபு⁴ய்யேனபாஸாணா, யேபு⁴ய்யேனஸக்க²ரா, யேபு⁴ய்யேனகட²லா, யேபு⁴ய்யேனமரும்பா³, யேபு⁴ய்யேனவாலிகா. த³ட்³டா⁴பி வுச்சதி அஜாதா பத²வீ. யோபி பம்ஸுபுஞ்ஜோ வா மத்திகாபுஞ்ஜோ வா ஓமகசாதுமாஸம் ஓவட்டோ², அயம்பி வுச்சதி அஜாதா பத²வீ.

க²ணேய்யாதி ஸயம் க²ணதி, ஆபத்தி பாசித்தியஸ்ஸ.

க²ணாபேய்யாதி அஞ்ஞம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி க²ணதி, ஆபத்தி பாசித்தியஸ்ஸ.

87. பத²வியா பத²விஸஞ்ஞீ க²ணதி வா க²ணாபேதி வா, பி⁴ந்த³தி வா பே⁴தா³பேதி வா, த³ஹதி வா த³ஹாபேதி வா, ஆபத்தி பாசித்தியஸ்ஸ.

பத²வியா வேமதிகோ க²ணதி வா க²ணாபேதி வா, பி⁴ந்த³தி வா பே⁴தா³பேதி வா, த³ஹதி வா த³ஹாபேதி வா, ஆபத்தி து³க்கடஸ்ஸ.

பத²வியா அபத²விஸஞ்ஞீ க²ணதி வா க²ணாபேதி வா, பி⁴ந்த³தி வா பே⁴தா³பேதி வா, த³ஹதி வா த³ஹாபேதி வா, அனாபத்தி.

அபத²வியா பத²விஸஞ்ஞீ, ஆபத்தி து³க்கடஸ்ஸ. அபத²வியா வேமதிகோ, ஆபத்தி து³க்கடஸ்ஸ. அபத²வியா அபத²விஸஞ்ஞீ, அனாபத்தி.

88. அனாபத்தி – ‘‘இமம் ஜான, இமம் தே³ஹி, இமம் ஆஹர, இமினா அத்தோ², இமம் கப்பியம் கரோஹீ’’தி ப⁴ணதி, அஸஞ்சிச்ச, அஸதியா, அஜானந்தஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

பத²வீக²ணனஸிக்கா²பத³ம் நிட்டி²தம் த³ஸமம்.

முஸாவாத³வக்³கோ³ பட²மோ.

தஸ்ஸுத்³தா³னம் –

முஸா ஓமஸபேஸுஞ்ஞம், பத³ஸேய்யாய வே து³வே;

அஞ்ஞத்ர விஞ்ஞுனா பூ⁴தா, து³ட்டு²ல்லாபத்தி க²ணனாதி.