227. குஸசீராதி³படிக்கே²பகதா²

371. தேன கோ² பன ஸமயேன அஞ்ஞதரோ பி⁴க்கு² குஸசீரம் நிவாஸேத்வா…பே… வாகசீரம் நிவாஸேத்வா…பே… ப²லகசீரம் நிவாஸேத்வா…பே… கேஸகம்ப³லம் நிவாஸேத்வா…பே… வாளகம்ப³லம் நிவாஸேத்வா…பே… உலூகபக்க²ம் நிவாஸேத்வா…பே… அஜினக்கி²பம் நிவாஸேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணவாதீ³. இத³ம், ப⁴ந்தே, அஜினக்கி²பம் அனேகபரியாயேன அப்பிச்ச²தாய ஸந்துட்டி²தாய ஸல்லேகா²ய து⁴ததாய பாஸாதி³கதாய அபசயாய வீரியாரம்பா⁴ய ஸம்வத்ததி. ஸாது⁴, ப⁴ந்தே, ப⁴க³வா பி⁴க்கூ²னம் அஜினக்கி²பம் அனுஜானாதூ’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, அஜினக்கி²பம் தித்தி²யத⁴ஜம் தா⁴ரேஸ்ஸஸி. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அஜினக்கி²பம் தித்தி²யத⁴ஜம் தா⁴ரேதப்³ப³ம். யோ தா⁴ரேய்ய, ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அக்கனாளம் நிவாஸேத்வா…பே… போத்த²கம் நிவாஸேத்வா யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் ஏதத³வோச – ‘‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ, வண்ணவாதீ³. அயம், ப⁴ந்தே, போத்த²கோ அனேகபரியாயேன அப்பிச்ச²தாய ஸந்துட்டி²தாய ஸல்லேகா²ய து⁴ததாய பாஸாதி³கதாய அபசயாய வீரியாரம்பா⁴ய ஸம்வத்ததி. ஸாது⁴, ப⁴ந்தே, ப⁴க³வா பி⁴க்கூ²னம் போத்த²கம் அனுஜானாதூ’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, போத்த²கம் நிவாஸேஸ்ஸஸி. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, போத்த²கோ நிவாஸேதப்³போ³. யோ நிவாஸேய்ய, ஆபத்தி து³க்கடஸ்ஸா’’தி.

குஸசீராதி³படிக்கே²பகதா² நிட்டி²தா.