222. ஸங்கி⁴கசீவருப்பாத³கதா²

363. தேன கோ² பன ஸமயேன அஞ்ஞதரோ பி⁴க்கு² ஏகோ வஸ்ஸம் வஸி. தத்த² மனுஸ்ஸா ஸங்க⁴ஸ்ஸ தே³மாதி சீவரானி அத³ம்ஸு. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘சதுவக்³கோ³ பச்சி²மோ ஸங்கோ⁴’தி. அஹஞ்சம்ஹி ஏககோ. இமே ச மனுஸ்ஸா ஸங்க⁴ஸ்ஸ தே³மாதி சீவரானி அத³ம்ஸு. யம்னூனாஹம் இமானி ஸங்கி⁴கானி சீவரானி ஸாவத்தி²ம் ஹரேய்ய’’ந்தி. அத² கோ² ஸோ பி⁴க்கு² தானி சீவரானி ஆதா³ய ஸாவத்தி²ம் க³ந்த்வா ப⁴க³வதோ ஏதமத்த²ம் ஆரோசேஸி. ‘‘துய்ஹேவ, பி⁴க்கு², தானி சீவரானி யாவ கதி²னஸ்ஸ உப்³பா⁴ராயா’’தி. இத⁴ பன, பி⁴க்க²வே, பி⁴க்கு² ஏகோ வஸ்ஸம் வஸதி. தத்த² மனுஸ்ஸா ஸங்க⁴ஸ்ஸ தே³மாதி சீவரானி தே³ந்தி. அனுஜானாமி, பி⁴க்க²வே, தஸ்ஸேவ தானி சீவரானி யாவ கதி²னஸ்ஸ உப்³பா⁴ராயாதி.

தேன கோ² பன ஸமயேன அஞ்ஞதரோ பி⁴க்கு² உதுகாலம் ஏகோ வஸி. தத்த² மனுஸ்ஸா ஸங்க⁴ஸ்ஸ தே³மாதி சீவரானி அத³ம்ஸு. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘சதுவக்³கோ³ பச்சி²மோ ஸங்கோ⁴’தி. அஹஞ்சம்ஹி ஏககோ. இமே ச மனுஸ்ஸா ஸங்க⁴ஸ்ஸ தே³மாதி சீவரானி அத³ம்ஸு. யம்னூனாஹம் இமானி ஸங்கி⁴கானி சீவரானி ஸாவத்தி²ம் ஹரேய்ய’’ந்தி. அத² கோ² ஸோ பி⁴க்கு² தானி சீவரானி ஆதா³ய ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸம்முகீ²பூ⁴தேன ஸங்கே⁴ன பா⁴ஜேதும். இத⁴ பன, பி⁴க்க²வே, பி⁴க்கு² உதுகாலம் ஏகோ வஸதி. தத்த² மனுஸ்ஸா ஸங்க⁴ஸ்ஸ தே³மாதி சீவரானி தே³ந்தி. அனுஜானாமி, பி⁴க்க²வே, தேன பி⁴க்கு²னா தானி சீவரானி அதி⁴ட்டா²தும் – ‘‘மய்ஹிமானி சீவரானீ’’தி. தஸ்ஸ சே, பி⁴க்க²வே, பி⁴க்கு²னோ தம் சீவரம் அனதி⁴ட்டி²தே அஞ்ஞோ பி⁴க்கு² ஆக³ச்ச²தி, ஸமகோ தா³தப்³போ³ பா⁴கோ³. தேஹி சே, பி⁴க்க²வே, பி⁴க்கூ²ஹி தம் சீவரம் பா⁴ஜியமானே, அபாதிதே குஸே, அஞ்ஞோ பி⁴க்கு² ஆக³ச்ச²தி, ஸமகோ தா³தப்³போ³ பா⁴கோ³. தேஹி சே, பி⁴க்க²வே, பி⁴க்கூ²ஹி தம் சீவரம் பா⁴ஜியமானே, பாதிதே குஸே, அஞ்ஞோ பி⁴க்கு² ஆக³ச்ச²தி, நாகாமா தா³தப்³போ³ பா⁴கோ³தி.

தேன கோ² பன ஸமயேன த்³வே பா⁴திகா தே²ரா, ஆயஸ்மா ச இஸிதா³ஸோ ஆயஸ்மா ச இஸிப⁴டோ, ஸாவத்தி²யம் வஸ்ஸம்வுட்டா² அஞ்ஞதரம் கா³மகாவாஸம் அக³மம்ஸு. மனுஸ்ஸா சிரஸ்ஸாபி தே²ரா ஆக³தாதி ஸசீவரானி ப⁴த்தானி அத³ம்ஸு. ஆவாஸிகா பி⁴க்கூ² தே²ரே புச்சி²ம்ஸு – ‘‘இமானி, ப⁴ந்தே, ஸங்கி⁴கானி சீவரானி தே²ரே ஆக³ம்ம உப்பன்னானி, ஸாதி³யிஸ்ஸந்தி தே²ரா பா⁴க³’’ந்தி. தே²ரா ஏவமாஹம்ஸு – ‘‘யதா² கோ² மயம், ஆவுஸோ, ப⁴க³வதா த⁴ம்மம் தே³ஸிதம் ஆஜானாம, தும்ஹாகம்யேவ தானி சீவரானி யாவ கதி²னஸ்ஸ உப்³பா⁴ராயா’’தி.

தேன கோ² பன ஸமயேன தயோ பி⁴க்கூ² ராஜக³ஹே வஸ்ஸம் வஸந்தி. தத்த² மனுஸ்ஸா ஸங்க⁴ஸ்ஸ

தே³மாதி சீவரானி தே³ந்தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா பஞ்ஞத்தம் ‘சதுவக்³கோ³ பச்சி²மோ ஸங்கோ⁴’தி. மயஞ்சம்ஹா தயோ ஜனா. இமே ச மனுஸ்ஸா ஸங்க⁴ஸ்ஸ தே³மாதி சீவரானி தே³ந்தி. கத²ம் நு கோ² அம்ஹேஹி படிபஜ்ஜிதப்³ப³’’ந்தி? தேன கோ² பன ஸமயேன ஸம்ப³ஹுலா தே²ரா, ஆயஸ்மா ச நிலவாஸீ ஆயஸ்மா ச ஸாணவாஸீ ஆயஸ்மா ச கோ³தகோ ஆயஸ்மா ச ப⁴கு³ ஆயஸ்மா ச ப²ளிகஸந்தானோ, பாடலிபுத்தே விஹரந்தி குக்குடாராமே. அத² கோ² தே பி⁴க்கூ² பாடலிபுத்தம் க³ந்த்வா தே²ரே புச்சி²ம்ஸு. தே²ரா ஏவமாஹம்ஸு – ‘‘யதா² கோ² மயம் ஆவுஸோ ப⁴க³வதா த⁴ம்மம் தே³ஸிதம் ஆஜானாம, தும்ஹாகம்யேவ தானி சீவரானி யாவ கதி²னஸ்ஸ உப்³பா⁴ராயா’’தி.

ஸங்கி⁴கசீவருப்பாத³கதா² நிட்டி²தா.