218. அதிரேகசீவரகதா²

347. [பாரா. 461] தேன கோ² பன ஸமயேன ச²ப்³ப³க்³கி³யா பி⁴க்கூ² ப⁴க³வதா திசீவரம் அனுஞ்ஞாதந்தி அஞ்ஞேனேவ திசீவரேன கா³மம் பவிஸந்தி, அஞ்ஞேன திசீவரேன ஆராமே அச்ச²ந்தி, அஞ்ஞேன திசீவரேன நஹானம் ஓதரந்தி. யே தே பி⁴க்கூ² அப்பிச்சா² தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகசீவரம் தா⁴ரேஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அதிரேகசீவரம் தா⁴ரேதப்³ப³ம். யோ தா⁴ரேய்ய, யதா²த⁴ம்மோ காரேதப்³போ³’’தி.

[பாரா. 461] தேன கோ² பன ஸமயேன ஆயஸ்மதோ ஆனந்த³ஸ்ஸ அதிரேகசீவரம் உப்பன்னம் ஹோதி. ஆயஸ்மா ச ஆனந்தோ³ தம் சீவரம் ஆயஸ்மதோ ஸாரிபுத்தஸ்ஸ தா³துகாமோ ஹோதி. ஆயஸ்மா ச ஸாரிபுத்தோ ஸாகேதே விஹரதி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வதா ஸிக்கா²பத³ம் பஞ்ஞத்தம் ‘ந அதிரேகசீவரம் தா⁴ரேதப்³ப³’ந்தி. இத³ஞ்ச மே அதிரேகசீவரம் உப்பன்னம். அஹஞ்சிமம் சீவரம் ஆயஸ்மதோ ஸாரிபுத்தஸ்ஸ தா³துகாமோ. ஆயஸ்மா ச ஸாரிபுத்தோ ஸாகேதே விஹரதி. கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸி. ‘‘கீவசிரம் பனானந்த³, ஸாரிபுத்தோ ஆக³ச்சி²ஸ்ஸதீ’’தி? ‘‘நவமம் வா, ப⁴க³வா, தி³வஸம், த³ஸமம் வா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேது’’ந்தி.

தேன கோ² பன ஸமயேன பி⁴க்கூ²னம் அதிரேகசீவரம் உப்பன்னம் ஹோதி. அத² கோ² பி⁴க்கூ²னம் ஏதத³ஹோஸி – ‘‘கத²ம் நு கோ² அம்ஹேஹி அதிரேகசீவரே படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அதிரேகசீவரம் விகப்பேதுந்தி.

348. அத² கோ² ப⁴க³வா வேஸாலியம் யதா²பி⁴ரந்தம் விஹரித்வா யேன பா³ராணஸீ தேன சாரிகம் பக்காமி. அனுபுப்³பே³ன சாரிகம் சரமானோ யேன பா³ராணஸீ தத³வஸரி. தத்ர ஸுத³ம் ப⁴க³வா பா³ராணஸியம் விஹரதி இஸிபதனே மிக³தா³யே. தேன கோ² பன ஸமயேன அஞ்ஞதரஸ்ஸ பி⁴க்கு²னோ அந்தரவாஸகோ சி²த்³தோ³ ஹோதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா திசீவரம் அனுஞ்ஞாதம் – தி³கு³ணா ஸங்கா⁴டி, ஏகச்சியோ உத்தராஸங்கோ³, ஏகச்சியோ அந்தரவாஸகோ. அயஞ்ச மே அந்தரவாஸகோ சி²த்³தோ³. யம்னூனாஹம் அக்³க³ளம் அச்சு²பேய்யம், ஸமந்ததோ து³பட்டம் ப⁴விஸ்ஸதி, மஜ்ஜே² ஏகச்சிய’’ந்தி. அத² கோ² ஸோ பி⁴க்கு² அக்³க³ளம் அச்சு²பேஸி. அத்³த³ஸா கோ² ப⁴க³வா ஸேனாஸனசாரிகம் ஆஹிண்ட³ந்தோ தம் பி⁴க்கு²ம் அக்³க³ளம் அச்சு²பேந்தம் [அச்சு²பந்தம் (க.)], தி³ஸ்வான யேன ஸோ பி⁴க்கு² தேனுபஸங்கமி, உபஸங்கமித்வா தம் பி⁴க்கு²ம் ஏதத³வோச – ‘‘கிம் த்வம், பி⁴க்கு², கரோஸீ’’தி? ‘‘அக்³க³ளம், ப⁴க³வா, அச்சு²பேமீ’’தி. ‘‘ஸாது⁴ ஸாது⁴, பி⁴க்கு²; ஸாது⁴ கோ² த்வம், பி⁴க்கு², அக்³க³ளம் அச்சு²பேஸீ’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அஹதானம் து³ஸ்ஸானம் அஹதகப்பானம் தி³கு³ணம் ஸங்கா⁴டிம், ஏகச்சியம் உத்தராஸங்க³ம், ஏகச்சியம் அந்தரவாஸகம்; உதுத்³த⁴டானம் து³ஸ்ஸானம் சதுக்³கு³ணம் ஸங்கா⁴டிம், தி³கு³ணம் உத்தராஸங்க³ம், தி³கு³ணம் அந்தரவாஸகம்; பம்ஸுகூலே யாவத³த்த²ம்; பாபணிகே உஸ்ஸாஹோ கரணீயோ. அனுஜானாமி, பி⁴க்க²வே, அக்³க³ளம் துன்னம் ஓவட்டிகம் கண்டு³ஸகம் த³ள்ஹீகம்ம’’ந்தி.

அதிரேகசீவரகதா² நிட்டி²தா.