215. சீவரரஜனகதா²

344. தேன கோ² பன ஸமயேன பி⁴க்கூ² ச²கணேனபி பண்டு³மத்திகாயபி சீவரம் ரஜந்தி. சீவரம் து³ப்³ப³ண்ணம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ச² ரஜனானி – மூலரஜனம், க²ந்த⁴ரஜனம், தசரஜனம், பத்தரஜனம், புப்ப²ரஜனம், ப²லரஜனந்தி.

தேன கோ² பன ஸமயேன பி⁴க்கூ² ஸீதுத³காய [ஸீதுந்தி³காய (ஸீ.), ஸீதூத³காய (ஸ்யா.)] சீவரம் ரஜந்தி. சீவரம் து³க்³க³ந்த⁴ம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ரஜனம் பசிதும் சுல்லம் ரஜனகும்பி⁴ந்தி. ரஜனம் உத்தரியதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உத்தராளும்பம் [உத்தராளுபம் (யோஜனா), உத்தராளுபம் (ஸ்யா.)] ப³ந்தி⁴துந்தி.

தேன கோ² பன ஸமயேன பி⁴க்கூ² ந ஜானந்தி ரஜனம் பக்கம் வா அபக்கம் வா. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உத³கே வா நக²பிட்டி²காய வா தே²வகம் தா³துந்தி.

தேன கோ² பன ஸமயேன பி⁴க்கூ² ரஜனம் ஓரோபேந்தா கும்பி⁴ம் ஆவிஞ்ச²ந்தி [ஆவிஞ்ஜந்தி (ஸீ.), ஆவட்டந்தி (ஸ்யா.)]. கும்பீ⁴ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ரஜனுளுங்கம் [ரஜனாளுங்கம் (யோஜனா)] த³ண்ட³கதா²லகந்தி.

தேன கோ² பன ஸமயேன பி⁴க்கூ²னம் ரஜனபா⁴ஜனம் ந ஸம்விஜ்ஜதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ரஜனகோலம்ப³ம் ரஜனக⁴டந்தி.

தேன கோ² பன ஸமயேன பி⁴க்கூ² பாதியாபி பத்தேபி சீவரம் ஓமத்³த³ந்தி. சீவரம் பரிபி⁴ஜ்ஜதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ரஜனதோ³ணிகந்தி.

தேன கோ² பன ஸமயேன பி⁴க்கூ² ச²மாய சீவரம் பத்த²ரந்தி. சீவரம் பம்ஸுகிதம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, திணஸந்தா²ரகந்தி.

திணஸந்தா²ரகோ உபசிகாஹி க²ஜ்ஜதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, சீவரவம்ஸம் சீவரரஜ்ஜுந்தி.

மஜ்ஜே²ன லக்³கே³ந்தி. ரஜனம் உப⁴தோ க³லதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கண்ணே ப³ந்தி⁴துந்தி.

கண்ணோ ஜீரதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கண்ணஸுத்தகந்தி.

ரஜனம் ஏகதோ க³லதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸம்பரிவத்தகம் ஸம்பரிவத்தகம் ரஜேதும், ந ச அச்சி²ன்னே தே²வே பக்கமிதுந்தி.

தேன கோ² பன ஸமயேன சீவரம் பத்தி²ன்னம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உத³கே ஓஸாரேதுந்தி.

தேன கோ² பன ஸமயேன சீவரம் ப²ருஸம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பாணினா ஆகோடேதுந்தி.

தேன கோ² பன ஸமயேன பி⁴க்கூ² அச்சி²ன்னகானி சீவரானி தா⁴ரேந்தி த³ந்தகாஸாவானி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி நாம [ஸேய்யதா²பி (?)] கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அச்சி²ன்னகானி சீவரானி தா⁴ரேதப்³பா³னி. யோ தா⁴ரேய்ய, ஆபத்தி து³க்கடஸ்ஸாதி.

சீவரரஜனகதா² நிட்டி²தா.