200. பலிபோ³தா⁴பலிபோ³த⁴கதா²

325. த்³வேமே, பி⁴க்க²வே, கதி²னஸ்ஸ பலிபோ³தா⁴, த்³வே அபலிபோ³தா⁴. கதமே ச, பி⁴க்க²வே, த்³வே கதி²னஸ்ஸ பலிபோ³தா⁴? ஆவாஸபலிபோ³தோ⁴ ச சீவரபலிபோ³தோ⁴ ச. கத²ஞ்ச, பி⁴க்க²வே, ஆவாஸபலிபோ³தோ⁴ ஹோதி? இத⁴, பி⁴க்க²வே, பி⁴க்கு² வஸதி வா தஸ்மிம் ஆவாஸே, ஸாபேக்கோ² வா பக்கமதி ‘‘பச்சேஸ்ஸ’’ந்தி. ஏவம் கோ², பி⁴க்க²வே, ஆவாஸபலிபோ³தோ⁴ ஹோதி. கத²ஞ்ச, பி⁴க்க²வே, சீவரபலிபோ³தோ⁴ ஹோதி? இத⁴, பி⁴க்க²வே, பி⁴க்கு²னோ சீவரம் அகதம் வா ஹோதி விப்பகதம் வா, சீவராஸா வா அனுபச்சி²ன்னா. ஏவம் கோ², பி⁴க்க²வே, சீவரபலிபோ³தோ⁴ ஹோதி. இமே கோ², பி⁴க்க²வே, த்³வே கதி²னஸ்ஸ பலிபோ³தா⁴.

கதமே ச, பி⁴க்க²வே, த்³வே கதி²னஸ்ஸ அபலிபோ³தா⁴? ஆவாஸஅபலிபோ³தோ⁴ ச சீவரஅபலிபோ³தோ⁴ ச. கத²ஞ்ச, பி⁴க்க²வே, ஆவாஸஅபலிபோ³தோ⁴ ஹோதி? இத⁴, பி⁴க்க²வே, பி⁴க்கு² பக்கமதி தம்ஹா ஆவாஸா சத்தேன வந்தேன முத்தேன அனபேக்கோ² [அனபேக்கே²ன (க.)] ‘‘ந பச்சேஸ்ஸ’’ந்தி. ஏவம் கோ², பி⁴க்க²வே, ஆவாஸஅபலிபோ³தோ⁴ ஹோதி. கத²ஞ்ச, பி⁴க்க²வே, சீவரஅபலிபோ³தோ⁴ ஹோதி? இத⁴, பி⁴க்க²வே, பி⁴க்கு²னோ சீவரம் கதம் வா ஹோதி, நட்ட²ம் வா வினட்ட²ம் வா த³ட்³ட⁴ம் வா, சீவராஸா வா உபச்சி²ன்னா. ஏவம் கோ², பி⁴க்க²வே, சீவரஅபலிபோ³தோ⁴ ஹோதி. இமே கோ², பி⁴க்க²வே, த்³வே கதி²னஸ்ஸ அபலிபோ³தா⁴தி.

பலிபோ³தா⁴பலிபோ³த⁴கதா² நிட்டி²தா.

கதி²னக்க²ந்த⁴கோ நிட்டி²தோ ஸத்தமோ.