198. அபவிலாயனனவகம்

321. பி⁴க்கு² அத்த²தகதி²னோ தி³ஸம்க³மிகோ பக்கமதி சீவரபடிவீஸம் அபவிலாயமானோ [அபவினயமானோ (ஸீ.), அபசினயமானோ (க.)]. தமேனம் தி³ஸங்க³தம் பி⁴க்கூ² புச்ச²ந்தி – ‘‘கஹம் த்வம், ஆவுஸோ, வஸ்ஸம்வுட்டோ², கத்த² ச தே சீவரபடிவீஸோ’’தி? ஸோ ஏவம் வதே³தி – ‘‘அமுகஸ்மிம் ஆவாஸே வஸ்ஸம்வுட்டோ²ம்ஹி. தத்த² ச மே சீவரபடிவீஸோ’’தி. தே ஏவம் வத³ந்தி – ‘‘க³ச்சா²வுஸோ, தம் சீவரம் ஆஹர, மயம் தே இத⁴ சீவரம் கரிஸ்ஸாமா’’தி. ஸோ தம் ஆவாஸம் க³ந்த்வா பி⁴க்கூ² புச்ச²தி – ‘‘கஹம் மே, ஆவுஸோ, சீவரபடிவீஸோ’’தி? தே ஏவம் வத³ந்தி – ‘‘அயம் தே, ஆவுஸோ, சீவரபடிவீஸோ; கஹம் க³மிஸ்ஸஸீ’’தி? ஸோ ஏவம் வதே³தி – ‘‘அமுகம் நாம [அமுகஞ்ச (க.)] ஆவாஸம் க³மிஸ்ஸாமி, தத்த² மே பி⁴க்கூ² சீவரம் கரிஸ்ஸந்தீ’’தி. தே ஏவம் வத³ந்தி – ‘‘அலம், ஆவுஸோ, மா அக³மாஸி. மயம் தே இத⁴ சீவரம் கரிஸ்ஸாமா’’தி. தஸ்ஸ ஏவம் ஹோதி – ‘‘இதே⁴விமம் சீவரம் காரேஸ்ஸம், ந பச்சேஸ்ஸ’’ந்தி. ஸோ தம் சீவரம் காரேதி. தஸ்ஸ பி⁴க்கு²னோ நிட்டா²னந்திகோ கதி²னுத்³தா⁴ரோ.

பி⁴க்கு² அத்த²தகதி²னோ தி³ஸம்க³மிகோ பக்கமதி…பே… ‘‘நேவிமம் சீவரம் காரேஸ்ஸம், ந பச்சேஸ்ஸ’’ந்தி. தஸ்ஸ பி⁴க்கு²னோ ஸன்னிட்டா²னந்திகோ கதி²னுத்³தா⁴ரோ.

பி⁴க்கு² அத்த²தகதி²னோ தி³ஸம்க³மிகோ பக்கமதி…பே… ‘‘இதே⁴விமம் சீவரம் காரேஸ்ஸம், ந பச்சேஸ்ஸ’’ந்தி. ஸோ தம் சீவரம் காரேதி. தஸ்ஸ தம் சீவரம் கயிரமானம் நஸ்ஸதி. தஸ்ஸ பி⁴க்கு²னோ நாஸனந்திகோ கதி²னுத்³தா⁴ரோ.

322. பி⁴க்கு² அத்த²தகதி²னோ தி³ஸம்க³மிகோ பக்கமதி சீவரபடிவீஸம் அபவிலாயமானோ. தமேனம் தி³ஸம்க³தம் பி⁴க்கூ² புச்ச²ந்தி – ‘‘கஹம் த்வம், ஆவுஸோ, வஸ்ஸம்வுட்டோ², கத்த² ச தே சீவரபடிவீஸோ’’தி? ஸோ ஏவம் வதே³தி – ‘‘அமுகஸ்மிம் ஆவாஸே வஸ்ஸம்வுட்டோ²ம்ஹி, தத்த² ச மே சீவரபடிவீஸோ’’தி. தே ஏவம் வத³ந்தி – ‘‘க³ச்சா²வுஸோ, தம் சீவரம் ஆஹர, மயம் தே இத⁴ சீவரம் கரிஸ்ஸாமா’’தி. ஸோ தம் ஆவாஸம் க³ந்த்வா பி⁴க்கூ² புச்ச²தி – ‘‘கஹம் மே, ஆவுஸோ, சீவரபடிவீஸோ’’தி? தே ஏவம் வத³ந்தி – ‘‘அயம் தே, ஆவுஸோ, சீவரபடிவீஸோ’’தி. ஸோ தம் சீவரம் ஆதா³ய தம் ஆவாஸம் க³ச்ச²தி. தமேனம் அந்தராமக்³கே³ பி⁴க்கூ² புச்ச²ந்தி – ‘‘ஆவுஸோ, கஹம் க³மிஸ்ஸஸீ’’தி? ஸோ ஏவம் வதே³தி – ‘‘அமுகம் நாம ஆவாஸம் க³மிஸ்ஸாமி, தத்த² மே பி⁴க்கூ² சீவரம் கரிஸ்ஸந்தீ’’தி. தே ஏவம் வத³ந்தி – ‘‘அலம், ஆவுஸோ, மா அக³மாஸி, மயம் தே இத⁴ சீவரம் கரிஸ்ஸாமா’’தி. தஸ்ஸ ஏவம் ஹோதி – ‘‘இதே⁴விமம் சீவரம் காரேஸ்ஸம் ந பச்சேஸ்ஸ’’ந்தி. ஸோ தம் சீவரம் காரேதி. தஸ்ஸ பி⁴க்கு²னோ நிட்டா²னந்திகோ கதி²னுத்³தா⁴ரோ.

பி⁴க்கு² அத்த²தகதி²னோ தி³ஸம்க³மிகோ பக்கமதி சீவரபடிவீஸம் அபவிலாயமானோ. தமேனம் தி³ஸம்க³தம் பி⁴க்கூ² புச்ச²ந்தி – ‘‘கஹம் த்வம், ஆவுஸோ, வஸ்ஸம்வுட்டோ², கத்த² ச தே சீவரபடிவீஸோ’’தி? ஸோ ஏவம் வதே³தி – ‘‘அமுகஸ்மிம் ஆவாஸே வஸ்ஸம்வுட்டோ²ம்ஹி, தத்த² ச மே சீவரபடிவீஸோ’’தி. தே ஏவம் வத³ந்தி – ‘‘க³ச்சா²வுஸோ, தம் சீவரம் ஆஹர, மயம் தே இத⁴ சீவரம் கரிஸ்ஸாமா’’தி. ஸோ தம் ஆவாஸம் க³ந்த்வா பி⁴க்கூ² புச்ச²தி – ‘‘கஹம் மே, ஆவுஸோ, சீவரபடிவீஸோ’’தி? தே ஏவம் வத³ந்தி – ‘‘அயம் தே, ஆவுஸோ, சீவரபடிவீஸோ’’தி. ஸோ தம் சீவரம் ஆதா³ய தம் ஆவாஸம் க³ச்ச²தி. தமேனம் அந்தராமக்³கே³ பி⁴க்கூ² புச்ச²ந்தி – ‘‘ஆவுஸோ, கஹம் க³மிஸ்ஸஸீ’’தி? ஸோ ஏவம் வதே³தி – ‘‘அமுகம் நாம ஆவாஸம் க³மிஸ்ஸாமி, தத்த² மே பி⁴க்கூ² சீவரம் கரிஸ்ஸந்தீ’’தி. தே ஏவம் வத³ந்தி – ‘‘அலம், ஆவுஸோ, மா அக³மாஸி, மயம் தே இத⁴ சீவரம் கரிஸ்ஸாமா’’தி. தஸ்ஸ ஏவம் ஹோதி – ‘‘நேவிமம் சீவரம் காரேஸ்ஸம், ந பச்சேஸ்ஸ’’ந்தி. தஸ்ஸ பி⁴க்கு²னோ ஸன்னிட்டா²னந்திகோ கதி²னுத்³தா⁴ரோ.

323. பி⁴க்கு² அத்த²தகதி²னோ தி³ஸம்க³மிகோ பக்கமதி சீவரபடிவீஸம் அபவிலாயமானோ. தமேனம் தி³ஸம்க³தம் பி⁴க்கூ² புச்ச²ந்தி – ‘‘கஹம் த்வம், ஆவுஸோ, வஸ்ஸம்வுட்டோ², கத்த² ச தே சீவரபடிவீஸோ’’தி? ஸோ ஏவம் வதே³தி – ‘‘அமுகஸ்மிம் ஆவாஸே வஸ்ஸம்வுட்டோ²ம்ஹி, தத்த² ச மே சீவரபடிவீஸோ’’தி. தே ஏவம் வத³ந்தி – ‘‘க³ச்சா²வுஸோ, தம் சீவரம் ஆஹர, மயம் தே இத⁴ சீவரம் கரிஸ்ஸாமா’’தி. ஸோ தம் ஆவாஸம் க³ந்த்வா பி⁴க்கூ² புச்ச²தி – ‘‘கஹம் மே, ஆவுஸோ, சீவரபடிவீஸோ’’தி? தே ஏவம் வத³ந்தி – ‘‘அயம் தே, ஆவுஸோ, சீவரபடிவீஸோ’’தி. ஸோ தம் சீவரம் ஆதா³ய தம் ஆவாஸம் க³ச்ச²தி. தஸ்ஸ தம் ஆவாஸம் க³தஸ்ஸ ஏவம் ஹோதி – ‘‘இதே⁴விமம் சீவரம் காரேஸ்ஸம், ந பச்சேஸ்ஸ’’ந்தி. ஸோ தம் சீவரம் காரேதி. தஸ்ஸ பி⁴க்கு²னோ நிட்டா²னந்திகோ கதி²னுத்³தா⁴ரோ.

அபவிலாயனனவகம் நிட்டி²தம்.