187. கதி²னானுஜானனா

306. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன திம்ஸமத்தா பாவேய்யகா [பாடே²ய்யகா (ஸீ. ஸ்யா.)] பி⁴க்கூ², ஸப்³பே³ ஆரஞ்ஞிகா ஸப்³பே³ பிண்ட³பாதிகா ஸப்³பே³ பம்ஸுகூலிகா ஸப்³பே³ தேசீவரிகா ஸாவத்தி²ம் ஆக³ச்ச²ந்தா ப⁴க³வந்தம் த³ஸ்ஸனாய உபகட்டா²ய வஸ்ஸூபனாயிகாய நாஸக்கி²ம்ஸு ஸாவத்தி²யம் வஸ்ஸூபனாயிகம் ஸம்பா⁴வேதும்; அந்தராமக்³கே³ ஸாகேதே வஸ்ஸம் உபக³ச்சி²ம்ஸு. தே உக்கண்டி²தரூபா வஸ்ஸம் வஸிம்ஸு – ஆஸன்னேவ நோ ப⁴க³வா விஹரதி இதோ ச²ஸு யோஜனேஸு, ந ச மயம் லபா⁴ம ப⁴க³வந்தம் த³ஸ்ஸனாயாதி. அத² கோ² தே பி⁴க்கூ² வஸ்ஸம்வுட்டா², தேமாஸச்சயேன கதாய பவாரணாய, தே³வே வஸ்ஸந்தே, உத³கஸங்க³ஹே உத³கசிக்க²ல்லே ஓகபுண்ணேஹி சீவரேஹி கிலந்தரூபா யேன ஸாவத்தி² ஜேதவனம் அனாத²பிண்டி³கஸ்ஸ ஆராமோ, யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா தே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயம், கச்சி யாபனீயம், கச்சி ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸித்த², ந ச பிண்ட³கேன கிலமித்தா²’’தி? ‘‘க²மனீயம், ப⁴க³வா; யாபனீயம், ப⁴க³வா; ஸமக்³கா³ ச மயம், ப⁴ந்தே, ஸம்மோத³மானா அவிவத³மானா வஸ்ஸம் வஸிம்ஹா, ந ச பிண்ட³கேன கிலமிம்ஹா. இத⁴ மயம், ப⁴ந்தே, திம்ஸமத்தா பாவேய்யகா பி⁴க்கூ² ஸாவத்தி²ம் ஆக³ச்ச²ந்தா ப⁴க³வந்தம் த³ஸ்ஸனாய உபகட்டா²ய வஸ்ஸூபனாயிகாய நாஸக்கி²ம்ஹா ஸாவத்தி²யம் வஸ்ஸூபனாயிகம் ஸம்பா⁴வேதும், அந்தராமக்³கே³ ஸாகேதே வஸ்ஸம் உபக³ச்சி²ம்ஹா. தே மயம், ப⁴ந்தே, உக்கண்டி²தரூபா வஸ்ஸம் வஸிம்ஹா – ‘ஆஸன்னேவ நோ ப⁴க³வா விஹரதி இதோ ச²ஸு யோஜனேஸு, ந ச மயம் லபா⁴ம ப⁴க³வந்தம் த³ஸ்ஸனாயா’தி. அத² கோ² மயம், ப⁴ந்தே, வஸ்ஸம்வுட்டா², தேமாஸச்சயேன கதாய பவாரணாய, தே³வே வஸ்ஸந்தே, உத³கஸங்க³ஹே உத³கசிக்க²ல்லே ஓகபுண்ணேஹி சீவரேஹி கிலந்தரூபா அத்³தா⁴னம் ஆக³தாதி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, வஸ்ஸம்வுட்டா²னம் பி⁴க்கூ²னம் கதி²னம் [கடி²னம் (ஸீ. ஸ்யா.)] அத்த²ரிதும். அத்த²தகதி²னானம் வோ, பி⁴க்க²வே, பஞ்ச கப்பிஸ்ஸந்தி – அனாமந்தசாரோ, அஸமாதா³னசாரோ, க³ணபோ⁴ஜனம், யாவத³த்த²சீவரம், யோ ச தத்த² சீவருப்பாதோ³ ஸோ நேஸம் ப⁴விஸ்ஸதீதி. அத்த²தகதி²னானம் வோ, பி⁴க்க²வே, இமானி பஞ்ச கப்பிஸ்ஸந்தி. ஏவஞ்ச பன, பி⁴க்க²வே, கதி²னம் அத்த²ரிதப்³ப³ம். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

307. ‘‘ஸுணாது மே, ப⁴ந்தே, ஸங்கோ⁴. இத³ம் ஸங்க⁴ஸ்ஸ கதி²னது³ஸ்ஸம் உப்பன்னம். யதி³ ஸங்க⁴ஸ்ஸ பத்தகல்லம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிதும். ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. இத³ம் ஸங்க⁴ஸ்ஸ கதி²னது³ஸ்ஸம் உப்பன்னம். ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிதும். யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னம் கதி²னம் அத்த²ரிதும், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னம் இத³ம் ஸங்கே⁴ன கதி²னது³ஸ்ஸம் இத்த²ன்னாமஸ்ஸ பி⁴க்கு²னோ கதி²னம் அத்த²ரிதும். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

308. ‘‘ஏவம் கோ², பி⁴க்க²வே, அத்த²தம் ஹோதி கதி²னம், ஏவம் அனத்த²தம். கத²ஞ்ச பன, பி⁴க்க²வே, அனத்த²தம் ஹோதி கதி²னம்? ந உல்லிகி²தமத்தேன அத்த²தம் ஹோதி கதி²னம், ந தோ⁴வனமத்தேன அத்த²தம் ஹோதி கதி²னம், ந சீவரவிசாரணமத்தேன [ந க³ண்டுஸகரணமத்தேன (க.)] அத்த²தம் ஹோதி கதி²னம், ந சே²த³னமத்தேன அத்த²தம் ஹோதி கதி²னம், ந ப³ந்த⁴னமத்தேன அத்த²தம் ஹோதி கதி²னம், ந ஓவட்டியகரணமத்தேன [ந ஓவட்டேய்யகரணமத்தேன (ஸீ. ஸ்யா.), ந ஓவதே³ய்யகரணமத்தேன (க.)] அத்த²தம் ஹோதி கதி²னம், ந கண்டு³ஸகரணமத்தேன அத்த²தம் ஹோதி கதி²னம், ந த³ள்ஹீகம்மகரணமத்தேன அத்த²தம் ஹோதி கதி²னம், ந அனுவாதகரணமத்தேன அத்த²தம் ஹோதி கதி²னம், ந பரிப⁴ண்ட³கரணமத்தேன அத்த²தம் ஹோதி கதி²னம், ந ஓவத்³தே⁴ய்யகரணமத்தேன அத்த²தம் ஹோதி கதி²னம், ந கம்ப³லமத்³த³னமத்தேன அத்த²தம் ஹோதி கதி²னம், ந நிமித்தகதேன அத்த²தம் ஹோதி கதி²னம், ந பரிகதா²கதேன அத்த²தம் ஹோதி கதி²னம், ந குக்குகதேன அத்த²தம் ஹோதி கதி²னம், ந ஸன்னிதி⁴கதேன அத்த²தம் ஹோதி கதி²னம், ந நிஸ்ஸக்³கி³யேன அத்த²தம் ஹோதி கதி²னம், ந அகப்பகதேன அத்த²தம் ஹோதி கதி²னம், ந அஞ்ஞத்ர ஸங்கா⁴டியா அத்த²தம் ஹோதி கதி²னம், ந அஞ்ஞத்ர உத்தராஸங்கே³ன அத்த²தம் ஹோதி கதி²னம், ந அஞ்ஞத்ர அந்தரவாஸகேன அத்த²தம் ஹோதி கதி²னம், ந அஞ்ஞத்ர பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தம் ஹோதி கதி²னம், ந அஞ்ஞத்ர புக்³க³லஸ்ஸ அத்தா²ரா அத்த²தம் ஹோதி கதி²னம்; ஸம்மா சேவ அத்த²தம் ஹோதி கதி²னம், தஞ்சே நிஸ்ஸீமட்டோ² அனுமோத³தி, ஏவம்பி அனத்த²தம் ஹோதி கதி²னம். ஏவம் கோ², பி⁴க்க²வே, அனத்த²தம் ஹோதி கதி²னம்.

309. ‘‘கத²ஞ்ச, பி⁴க்க²வே, அத்த²தம் ஹோதி கதி²னம்? அஹதேன அத்த²தம் ஹோதி கதி²னம், அஹதகப்பேன அத்த²தம் ஹோதி கதி²னம், பிலோதிகாய அத்த²தம் ஹோதி கதி²னம், பம்ஸுகூலேன அத்த²தம் ஹோதி கதி²னம், பாபணிகேன அத்த²தம் ஹோதி கதி²னம், அனிமித்தகதேன அத்த²தம் ஹோதி கதி²னம், அபரிகதா²கதேன அத்த²தம் ஹோதி கதி²னம், அகுக்குகதேன அத்த²தம் ஹோதி கதி²னம், அஸன்னிதி⁴கதேன அத்த²தம் ஹோதி கதி²னம், அனிஸ்ஸக்³கி³யேன அத்த²தம் ஹோதி கதி²னம், கப்பகதேன அத்த²தம் ஹோதி கதி²னம், ஸங்கா⁴டியா அத்த²தம் ஹோதி கதி²னம், உத்தராஸங்கே³ன அத்த²தம் ஹோதி கதி²னம், அந்தரவாஸகேன அத்த²தம் ஹோதி கதி²னம், பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தம் ஹோதி கதி²னம், புக்³க³லஸ்ஸ அத்தா²ரா அத்த²தம் ஹோதி கதி²னம்; ஸம்மா சே அத்த²தம் ஹோதி கதி²னம், தஞ்சே ஸீமட்டோ² அனுமோத³தி, ஏவம்பி அத்த²தம் ஹோதி கதி²னம். ஏவம் கோ², பி⁴க்க²வே, அத்த²தம் ஹோதி கதி²னம்.

310. ‘‘கத²ஞ்ச, பி⁴க்க²வே, உப்³ப⁴தம் ஹோதி கதி²னம்? அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராய – பக்கமனந்திகா, நிட்டா²னந்திகா, ஸன்னிட்டா²னந்திகா, நாஸனந்திகா, ஸவனந்திகா, ஆஸாவச்சே²தி³கா, ஸீமாதிக்கந்திகா, ஸஹுப்³பா⁴ரா’’தி [ஸஉப்³பா⁴ராதி (க.)].

கதி²னானுஜானனா நிட்டி²தா.