9. பப்³ப³ஜ்ஜூபஸம்பதா³கதா²

34. தேன கோ² பன ஸமயேன பி⁴க்கூ² நானாதி³ஸா நானாஜனபதா³ பப்³ப³ஜ்ஜாபேக்கே² ச உபஸம்பதா³பேக்கே² ச ஆனேந்தி – ப⁴க³வா நே பப்³பா³ஜேஸ்ஸதி உபஸம்பாதே³ஸ்ஸதீதி. தத்த² பி⁴க்கூ² சேவ கிலமந்தி பப்³ப³ஜ்ஜாபேக்கா² ச உபஸம்பதா³பேக்கா² ச. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘‘ஏதரஹி கோ² பி⁴க்கூ² நானாதி³ஸா நானாஜனபதா³ பப்³ப³ஜ்ஜாபேக்கே² ச உபஸம்பதா³பேக்கே² ச ஆனேந்தி – ப⁴க³வா நே பப்³பா³ஜேஸ்ஸதி உபஸம்பாதே³ஸ்ஸதீதி. தத்த² பி⁴க்கூ² சேவ கிலமந்தி பப்³ப³ஜ்ஜாபேக்கா² ச உபஸம்பதா³பேக்கா² ச. யம்னூனாஹம் பி⁴க்கூ²னம் அனுஜானேய்யம் – தும்ஹேவ தா³னி, பி⁴க்க²வே, தாஸு தாஸு தி³ஸாஸு தேஸு தேஸு ஜனபதே³ஸு பப்³பா³ஜேத² உபஸம்பாதே³தா²’’தி. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘இத⁴ மய்ஹம், பி⁴க்க²வே, ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘ஏதரஹி கோ² பி⁴க்கூ² நானாதி³ஸா நானாஜனபதா³ பப்³ப³ஜ்ஜாபேக்கே² ச உபஸம்பதா³பேக்கே² ச ஆனேந்தி ப⁴க³வா நே பப்³பா³ஜேஸ்ஸதி உபஸம்பாதே³ஸ்ஸதீதி, தத்த² பி⁴க்கூ² சேவ கிலமந்தி பப்³ப³ஜ்ஜாபேக்கா² ச உபஸம்பதா³பேக்கா² ச, யம்னூனாஹம் பி⁴க்கூ²னம் அனுஜானேய்யம் தும்ஹேவ தா³னி, பி⁴க்க²வே, தாஸு தாஸு தி³ஸாஸு தேஸு தேஸு ஜனபதே³ஸு பப்³பா³ஜேத² உபஸம்பாதே³தா²’’’தி, அனுஜானாமி, பி⁴க்க²வே, தும்ஹேவ தா³னி தாஸு தாஸு தி³ஸாஸு தேஸு தேஸு ஜனபதே³ஸு பப்³பா³ஜேத² உபஸம்பாதே³த². ஏவஞ்ச பன, பி⁴க்க²வே, பப்³பா³ஜேதப்³போ³ உபஸம்பாதே³தப்³போ³ –

பட²மம் கேஸமஸ்ஸும் ஓஹாராபேத்வா [ஓஹாரேத்வா (க.)], காஸாயானி வத்தா²னி அச்சா²தா³பேத்வா, ஏகம்ஸம் உத்தராஸங்க³ம் காராபேத்வா, பி⁴க்கூ²னம் பாதே³ வந்தா³பேத்வா, உக்குடிகம் நிஸீதா³பேத்வா, அஞ்ஜலிம் பக்³க³ண்ஹாபேத்வா, ஏவம் வதே³ஹீதி வத்தப்³போ³ – பு³த்³த⁴ம் ஸரணம் க³ச்சா²மி, த⁴ம்மம் ஸரணம் க³ச்சா²மி, ஸங்க⁴ம் ஸரணம் க³ச்சா²மி; து³தியம்பி பு³த்³த⁴ம் ஸரணம் க³ச்சா²மி, து³தியம்பி த⁴ம்மம் ஸரணம் க³ச்சா²மி, து³தியம்பி ஸங்க⁴ம் ஸரணம் க³ச்சா²மி; ததியம்பி பு³த்³த⁴ம் ஸரணம் க³ச்சா²மி, ததியம்பி த⁴ம்மம் ஸரணம் க³ச்சா²மி, ததியம்பி ஸங்க⁴ம் ஸரணம் க³ச்சா²மீ’’தி. ‘‘அனுஜானாமி, பி⁴க்க²வே, இமேஹி தீஹி ஸரணக³மனேஹி பப்³ப³ஜ்ஜம் உபஸம்பத³’’ந்தி.

தீஹி ஸரணக³மனேஹி உபஸம்பதா³கதா² நிட்டி²தா.