65. சத்தாரி அகரணீயானி

129. தேன கோ² பன ஸமயேன பி⁴க்கூ² அஞ்ஞதரம் பி⁴க்கு²ம் உபஸம்பாதே³த்வா ஏககம் ஓஹாய பக்கமிம்ஸு. ஸோ பச்சா² ஏககோவ ஆக³ச்ச²ந்தோ அந்தராமக்³கே³ புராணது³தியிகாய ஸமாக³ஞ்சி². ஸா ஏவமாஹ – ‘‘கிம்தா³னி பப்³ப³ஜிதோஸீ’’தி? ‘‘ஆம, பப்³ப³ஜிதோம்ஹீ’’தி. ‘‘து³ல்லபோ⁴ கோ² பப்³ப³ஜிதானம் மேது²னோ த⁴ம்மோ; ஏஹி, மேது²னம் த⁴ம்மம் படிஸேவா’’தி. ஸோ தஸ்ஸா மேது²னம் த⁴ம்மம் படிஸேவித்வா சிரேன அக³மாஸி. பி⁴க்கூ² ஏவமாஹம்ஸு – ‘‘கிஸ்ஸ த்வம், ஆவுஸோ, ஏவம் சிரம் அகாஸீ’’தி? அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உபஸம்பாதே³த்வா து³தியம் தா³தும், சத்தாரி ச அகரணீயானி ஆசிக்கி²தும் –

‘‘உபஸம்பன்னேன பி⁴க்கு²னா மேது²னோ த⁴ம்மோ ந படிஸேவிதப்³போ³, அந்தமஸோ திரச்சா²னக³தாயபி. யோ பி⁴க்கு² மேது²னம் த⁴ம்மம் படிஸேவதி, அஸ்ஸமணோ ஹோதி அஸக்யபுத்தியோ. ஸேய்யதா²பி நாம புரிஸோ ஸீஸச்சி²ன்னோ அப⁴ப்³போ³ தேன ஸரீரப³ந்த⁴னேன ஜீவிதும், ஏவமேவ பி⁴க்கு² மேது²னம் த⁴ம்மம் படிஸேவித்வா அஸ்ஸமணோ ஹோதி அஸக்யபுத்தியோ. தம் தே யாவஜீவம் அகரணீயம்.

‘‘உபஸம்பன்னேன பி⁴க்கு²னா அதி³ன்னம் தே²ய்யஸங்கா²தம் ந ஆதா³தப்³ப³ம், அந்தமஸோ திணஸலாகம் உபாதா³ய. யோ பி⁴க்கு² பாத³ம் வா பாதா³ரஹம் வா அதிரேகபாத³ம் வா அதி³ன்னம் தே²ய்யஸங்கா²தம் ஆதி³யதி, அஸ்ஸமணோ ஹோதி அஸக்யபுத்தியோ. ஸேய்யதா²பி நாம பண்டு³பலாஸோ ப³ந்த⁴னா பமுத்தோ அப⁴ப்³போ³ ஹரிதத்தா²ய, ஏவமேவ பி⁴க்கு² பாத³ம் வா பாதா³ரஹம் வா அதிரேகபாத³ம் வா அதி³ன்னம் தே²ய்யஸங்கா²தம் ஆதி³யித்வா அஸ்ஸமணோ ஹோதி அஸக்யபுத்தியோ. தம் தே யாவஜீவம் அகரணீயம்.

‘‘உபஸம்பன்னேன பி⁴க்கு²னா ஸஞ்சிச்ச பாணோ ஜீவிதா ந வோரோபேதப்³போ³, அந்தமஸோ குந்த²கிபில்லிகம் உபாதா³ய. யோ பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேதி, அந்தமஸோ க³ப்³ப⁴பாதனம் உபாதா³ய, அஸ்ஸமணோ ஹோதி அஸக்யபுத்தியோ. ஸேய்யதா²பி நாம புது²ஸிலா த்³வேதா⁴ பி⁴ன்னா அப்படிஸந்தி⁴கா ஹோதி, ஏவமேவ பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேத்வா அஸ்ஸமணோ ஹோதி அஸக்யபுத்தியோ. தம் தே யாவஜீவம் அகரணீயம்.

‘‘உபஸம்பன்னேன பி⁴க்கு²னா உத்தரிமனுஸ்ஸத⁴ம்மோ ந உல்லபிதப்³போ³, அந்தமஸோ ‘ஸுஞ்ஞாகா³ரே அபி⁴ரமாமீ’தி. யோ பி⁴க்கு² பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி ஜா²னம் வா விமோக்க²ம் வா ஸமாதி⁴ம் வா ஸமாபத்திம் வா மக்³க³ம் வா ப²லம் வா, அஸ்ஸமணோ ஹோதி அஸக்யபுத்தியோ. ஸேய்யதா²பி நாம தாலோ மத்த²கச்சி²ன்னோ அப⁴ப்³போ³ புன விருள்ஹியா, ஏவமேவ பி⁴க்கு² பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபித்வா அஸ்ஸமணோ ஹோதி அஸக்யபுத்தியோ. தம் தே யாவஜீவம் அகரணீய’’ந்தி.

சத்தாரி அகரணீயானி நிட்டி²தானி.