63. உபஸம்பதா³விதி⁴

125. தேன கோ² பன ஸமயேன உபஸம்பன்னா தி³ஸ்ஸந்தி குட்டி²காபி க³ண்டி³காபி கிலாஸிகாபி ஸோஸிகாபி அபமாரிகாபி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உபஸம்பாதே³ந்தேன தேரஸ [தஸ்ஸ (க.)] அந்தராயிகே த⁴ம்மே புச்சி²தும். ஏவஞ்ச பன, பி⁴க்க²வே, புச்சி²தப்³போ³ – ‘‘ஸந்தி தே ஏவரூபா ஆபா³தா⁴ – குட்ட²ம், க³ண்டோ³, கிலாஸோ, ஸோஸோ, அபமாரோ? மனுஸ்ஸோஸி? புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ? அனுஞ்ஞாதோஸி மாதாபிதூஹி? பரிபுண்ணவீஸதிவஸ்ஸோஸி? பரிபுண்ணம் தே பத்தசீவரம்? கிம்னாமோஸி? கோனாமோ தே உபஜ்ஜா²யோ’’தி?

தேன கோ² பன ஸமயேன பி⁴க்கூ² அனனுஸிட்டே² உபஸம்பதா³பேக்கே² அந்தராயிகே த⁴ம்மே புச்ச²ந்தி. உபஸம்பதா³பேக்கா² வித்தா²யந்தி, மங்கூ ஹோந்தி, ந ஸக்கோந்தி விஸ்ஸஜ்ஜேதும். ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பட²மம் அனுஸாஸித்வா பச்சா² அந்தராயிகே த⁴ம்மே புச்சி²துந்தி.

தத்தே²வ ஸங்க⁴மஜ்ஜே² அனுஸாஸந்தி. உபஸம்பதா³பேக்கா² ததே²வ வித்தா²யந்தி, மங்கூ ஹோந்தி, ந ஸக்கோந்தி விஸ்ஸஜ்ஜேதும். ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஏகமந்தம் அனுஸாஸித்வா ஸங்க⁴மஜ்ஜே² அந்தராயிகே த⁴ம்மே புச்சி²தும். ஏவஞ்ச பன, பி⁴க்க²வே, அனுஸாஸிதப்³போ³ –

126. பட²மம் உபஜ்ஜ²ம் கா³ஹாபேதப்³போ³. உபஜ்ஜ²ம் கா³ஹாபேத்வா பத்தசீவரம் ஆசிக்கி²தப்³ப³ம் – அயம் தே பத்தோ, அயம் ஸங்கா⁴டி, அயம் உத்தராஸங்கோ³, அயம் அந்தரவாஸகோ. க³ச்ச², அமும்ஹி ஓகாஸே திட்டா²ஹீதி.

பா³லா அப்³யத்தா அனுஸாஸந்தி. து³ரனுஸிட்டா² உபஸம்பதா³பேக்கா² வித்தா²யந்தி, மங்கூ ஹோந்தி, ந ஸக்கோந்தி விஸ்ஸஜ்ஜேதும். ப⁴க³வதோ ஏதமத்த²ம் ஆரோசேஸும். ந, பி⁴க்க²வே, பா³லேன அப்³யத்தேன அனுஸாஸிதப்³போ³. யோ அனுஸாஸேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன அனுஸாஸிதுந்தி.

அஸம்மதா அனுஸாஸந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அஸம்மதேன அனுஸாஸிதப்³போ³. யோ அனுஸாஸேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸம்மதேன அனுஸாஸிதும். ஏவஞ்ச பன, பி⁴க்க²வே, ஸம்மன்னிதப்³போ³ [ஸம்மனிதப்³போ³ (க.)] – அத்தனா வா [அத்தனாவ (ஸ்யா.)] அத்தானம் ஸம்மன்னிதப்³ப³ம், பரேன வா பரோ ஸம்மன்னிதப்³போ³.

கத²ஞ்ச அத்தனாவ அத்தானம் ஸம்மன்னிதப்³ப³ம்? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ². யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அனுஸாஸேய்ய’’ந்தி. ஏவம் அத்தனாவ அத்தானம் ஸம்மன்னிதப்³ப³ம்.

கத²ஞ்ச பன பரேன பரோ ஸம்மன்னிதப்³போ³? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ². யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் அனுஸாஸேய்யா’’தி. ஏவம் பரேன பரோ ஸம்மன்னிதப்³போ³.

தேன ஸம்மதேன பி⁴க்கு²னா உபஸம்பதா³பேக்கோ² உபஸங்கமித்வா ஏவமஸ்ஸ வசனீயோ – ‘‘ஸுணஸி, இத்த²ன்னாம, அயம் தே ஸச்சகாலோ பூ⁴தகாலோ. யம் ஜாதம் தம் ஸங்க⁴மஜ்ஜே² புச்ச²ந்தே ஸந்தம் அத்தீ²தி வத்தப்³ப³ம், அஸந்தம் நத்தீ²’’தி வத்தப்³ப³ம். மா கோ² வித்தா²யி, மா கோ² மங்கு அஹோஸி. ஏவம் தம் புச்சி²ஸ்ஸந்தி – ‘‘ஸந்தி தே ஏவரூபா ஆபா³தா⁴ – குட்ட²ம், க³ண்டோ³, கிலாஸோ, ஸோஸோ, அபமாரோ? மனுஸ்ஸோஸி? புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ? அனுஞ்ஞாதோஸி மாதாபிதூஹி? பரிபுண்ணவீஸதிவஸ்ஸோஸி? பரிபுண்ணம் தே பத்தசீவரம்? கிம்னாமோஸி? கோனாமோ தே உபஜ்ஜா²யோ’’தி?

ஏகதோ ஆக³ச்ச²ந்தி. ந, பி⁴க்க²வே, ஏகதோ ஆக³ந்தப்³ப³ம். அனுஸாஸகேன பட²மதரம் ஆக³ந்த்வா ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ². அனுஸிட்டோ² ஸோ மயா. யதி³ ஸங்க⁴ஸ்ஸ பத்தகல்லம், இத்த²ன்னாமோ ஆக³ச்சே²ய்யா’’தி. ஆக³ச்சா²ஹீதி வத்தப்³போ³.

ஏகம்ஸம் உத்தராஸங்க³ம் காராபேத்வா பி⁴க்கூ²னம் பாதே³ வந்தா³பேத்வா உக்குடிகம் நிஸீதா³பேத்வா அஞ்ஜலிம் பக்³க³ண்ஹாபேத்வா உபஸம்பத³ம் யாசாபேதப்³போ³ – ‘‘ஸங்க⁴ம், ப⁴ந்தே, உபஸம்பத³ம் யாசாமி. உல்லும்பது மம், ப⁴ந்தே, ஸங்கோ⁴ அனுகம்பம் உபாதா³ய. து³தியம்பி, ப⁴ந்தே, ஸங்க⁴ம் உபஸம்பத³ம் யாசாமி. உல்லும்பது மம், ப⁴ந்தே, ஸங்கோ⁴ அனுகம்பம் உபாதா³ய. ததியம்பி, ப⁴ந்தே, ஸங்க⁴ம் உபஸம்பத³ம் யாசாமி. உல்லும்பது மம், ப⁴ந்தே, ஸங்கோ⁴ அனுகம்பம் உபாதா³யா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ². யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அந்தராயிகே த⁴ம்மே புச்சே²ய்ய’’ந்தி? ஸுணஸி, இத்த²ன்னாம, அயம் தே ஸச்சகாலோ பூ⁴தகாலோ. யம் ஜாதம் தம் புச்சா²மி. ஸந்தம் அத்தீ²தி வத்தப்³ப³ம், அஸந்தம் நத்தீ²தி வத்தப்³ப³ம். ஸந்தி தே ஏவரூபா ஆபா³தா⁴ – குட்ட²ம் க³ண்டோ³ கிலேஸோ ஸோஸோ அபமாரோ, மனுஸ்ஸோஸி, புரிஸோஸி, பு⁴ஜிஸ்ஸோஸி, அணணோஸி, நஸி ராஜப⁴டோ, அனுஞ்ஞாதோஸி மாதாபிதூஹி, பரிபுண்ணவீஸதிவஸ்ஸோஸி, பரிபுண்ணம் தே பத்தசீவரம், கிம்னாமோஸி, கோனாமோ தே உபஜ்ஜா²யோதி? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

127. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரம். இத்த²ன்னாமோ ஸங்க⁴ம் உபஸம்பத³ம் யாசதி இத்த²ன்னாமேன உபஜ்ஜா²யேன. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் உபஸம்பாதே³ய்ய இத்த²ன்னாமேன உபஜ்ஜா²யேன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரம். இத்த²ன்னாமோ ஸங்க⁴ம் உபஸம்பத³ம் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமம் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரம். இத்த²ன்னாமோ ஸங்க⁴ம் உபஸம்பத³ம் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமம் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரம். இத்த²ன்னாமோ ஸங்க⁴ம் உபஸம்பத³ம் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமம் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘உபஸம்பன்னோ ஸங்கே⁴ன இத்த²ன்னாமோ இத்த²ன்னாமேன உபஜ்ஜா²யேன. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

உபஸம்பதா³கம்மம் நிட்டி²தம்.